Bial din tan dan

Tlabung bial hi tun hma chuan Lungsen bial-ah a awm thin a, Lunglei District Conference-in Tlabung chu bial hranga ding ve tawh tura a lo pass angin, Lungsen bial atangin Dt. 03.03.2006 khan Lunglei District-a bial pakhat ni turin ‘Tlabung bial’ tiin din a lo ni ve ta a ni. Conference hmasa ber hi Dt. 05.03.2006-ah Tlabung Local-ah neih a ni a, District Superintendent, Rev. Zalawma chuan he Conference hi hmanpuiin, Lungsen Bialtu Pastor, Pastor K. Lalchamliana leh Lungsen bial Secretary Evan. LH. Lalchhandama te chuan an telpui bawk. Tlabung bial din a nih lai hian Tlabung khaw chhunga Local Pathum, Tlabung, Zodin leh Chawnpui te chu Tlabung bial chhunga awm tura tih an ni a, Bial Kohhran member zawng zawng pawh mi 300 vel zet zawt chiah an tling a ni.

Pastor Quarters

Tlabung bial a din tirha bialtu Pastor hmasa ber chu Pastor B. Kamliana a ni. Bial hawn thar a nih hian Pastor Quarters kan la nei lo va, mi in luah hawh phawtin Pastor Quarters tur ngaihtuah tan a ni. Tuna Pastor Quarters hmun hi Rs. 42,000/- a lei a ni a, Quarters sak a nih hian kan hmun hma lei hi a lo zau tawk loh avangin, kan ram thenawm, Pu Vanlalnghaka, Tlabung chuan a ram chin eng emaw zat min pek belh bawk a, a chungah kan lawm hle a ni. Pastor Quarters sak dawnah hian Rev. Ralkapkunga Khiangte chuan lungphum phumin, Dt. 17.06.2013 atangin, Pastor R. Lalsangzuala hovin thahnemngai taka sak tan a ni ta a ni. Quarters sak a nih lai hian District atangin tanpuina mumal a la awm meuh lo va, theih tawpin bial chakna hmanga sak niin, Bialtu Pastor ruahmanna leh thahnemngaihna azarah, a chung slab chhun tura ruahmanin, 24"x 36" a liana relin, a slab-ah 30"x42"-a chhuna ni ta a ni. Theihtawp chhuaha sak chhunzawm zel niin, Dt. 30.09.2015-ah Pastor K. Vanlahruaia te chhung chuan luah lutin, Dt 18.10.2015-ah Rev. Ralkapkunga Khiangte chuan Pathian hnena hlanin a hawng a. A chhuat lei ringa slab hnuai chiah luah theiha eng emaw chen luah a nih hnuah, a chung sak zawmna tur Pastor R. Lalremsiama awm laiin, District-in Rs. 2,00,000 a pek hmangin a chung zar hul a ni a. Kum 2024 kumah Pastor Muanpuia Colney awm laiin District bawkin a chung sak pumna tur leh a hnuai renovate nan Rs. 6,00,000 a pe leh a, chumi hmang chuan a chung sak zawh niin a hnuai pawh nasa taka siam danglama ni ta a ni. Tun dinhmunah chuan Pastor Quarters zahpuiawm lo takin kan lo nei thei ta a ni.

Bialtu Pastor

A hma lama kan sawi tawh ang khan Tlabung bial a lo din tirh hian, Pastor hmasa ber chu Pastor B. Kamliana a ni. Pastor B. Kamliana’n a term a hman zawh hian, Rev. PC. Doliana chu Pastor re-employed-in thla ruk chhung, bialtu pastor atana dah leh a ni. Ani’n thla ruk chhung min rawn bial leh bawk. A hnuai a mi hi Tlabung bialtu Pastor awm tawh leh an awm kum chhungte chu a ni e.

1. Pastor B. Kamliana (30.03.2005 - 31.06.2008)
2. Rev. PC. Doliana (01.07.2008 - 31.12.2008)
3. Pastor R. Lalsangzuala (01.01.2009 - 31.12.2013)
4. Pastor K. Vanlalhruaia (14.03.2014 - 15.05.2018)
5. Pastor R. Lalremsiama (18.05.2018 - 31.03.2023)
6. Pastor Muanpuia Colney (01.04.2023 - till date)

Kohhranpui hruaitute

Bial din tirh atanga tun thlenga bial Secretary leh Treasurer lo ni tawhte leh an term chu a hnuai a mi ang hi a ni.

Bial din tirha Dept OB te

Sunday School Dept. :
Director : Upa P.C. Thanchuanga
Secretary : Bro. HD. Lalnunthara
Treasurer : Bro. HD. Lalnunthara

Mission Dept. :
Director : Upa P. Lalbiakthanga
Secretary : Rbt. P. Lalhmingthanga
Treasurer : Bro. P. Lalhmingthanga

LAD :
President : Rbt. R. Lalchhumi
Secretary : Sist. PC. Biaknguri
Treasurer : Sist. HS. Lalrinawmi

PYD :
President : Upa Laldingliana Ngente
Secretary : Rbt. Sanglaia
Treasurer : Rbt. P. Lalchhuanmawia

Bial chhung hmalakna

Bial chhung Kohhran chak theih nan Bial hruaituten Local tlawh kual thin a ni. District hmalakna bawhzuiin Local la din lohnaah din tura hmalak thin a ni a, Pastor R. Lalremsiama awm laiin Dinthar hmunah Kohhran din tura rammut niin, Pathianin Kohhran tha tak min pe a, tun dinhmunah Tlabung bialah Local pali (4) kan lo ni ve ta a ni. Pastor Quarter mamawh te, bialin theih ang angin bial Kohhranpui leh Department atang te-a theih tawpa ngaihtuah leh hmalak thin a ni. District Mission Department hruaitute duhsakna changin, tunah hian Home missionary, Dinthar hmunah rawih mek a ni a, Quarters pawh sak zawh a ni tawh a, Pathian ram a zau zel theihna tur atan hmalak mek bawk a ni.