Kohhran Din Chhoh Dan

Tlabung Zodin veng hmunah hian Sorkar Office leh hmun pawimawh te lo awm chho zelin, a khaw chhunga Sorkar hnathawk leh khaw dang atanga UPC member ni sa leh Sorkar mite pawh, Zodin lamah an an chho ve zel a, a tirah chuan Pu B. Lalhema (Tlabung Civil SDO) hmalaknain, Kohhran bik awm lovin Biak in pakhatah inkhawm thin a ni. Mahse, rinna hran nei ta chu inkhawm ho reng a theih ta lo a, Tlabung Local rem tihnain Zodin Local UPC chu din a lo ni ta a ni. Date 19 September 1982 (Sunday) ah chuan Pu Chhota (Zodin) UPC Inah, Upa Lianthangpuia, Tlabung Local Upa hovin patling kan kal khawm a, Zodin Local UPC chu din a lo ni ta a ni.

Kohhran Hruaitu Hmasate

Date 19 September 1982-ah hian Kohhran hruaitute inruat nghalin, heng mite hi ruat an ni:

• Chairman : Pu Zahranga
• Secretary : Pu Lalhmingsanga
• Asst. Secretary : Pu Lalkhuma
• Treasurer : Pu R. Siamhlira

Committee member-te :
Pu Chhota, Pu Lunghnema, Pu Liankhuma te an ni. Kohhran a din tirh lai hian member 40 vel an ni. Biak in an la neih loh avangin Pu Chhota inah hian inkhawm thin a ni.

Ni 1 November 1982-ah Sectional Pastor (Lungsen Section), Pastor Hualzika hovin Pu Lunghnema te inah Committee an nei a. Heng mite hi rawngbawltu nemngheh an ni:

1. Zahranga
2. R. Siamhlira
3. Lalkhuma
4. Lallunghnema
5. K. Ngaihzuala
6. Chhota
7. Lalhmingsanga

Kohhran a din tirh hian member-te an phur hle a, sumtuak nan thlai leh thil dangte an thawhkhawm a, an hlim hle thin a ni.

Biak In Leh A Hmun Neih Dan

Biak in hmun tur pawh Sorkar-ah dil nghal a ni a, pass an hmuh hma atangin hmun ruak a nih avangin Biak in sak a ni. Tlabung Local memberte nen hnatlanga sak niin, sum leh pai tha leh zung pawh an seng nasa hle. November 1982-ah Biak in hmasa ber, 24/18 Feet-a zau chu luah luh a ni. A chung di, a bang dap, a chhuat pawh lei rin nghal a ni.

Date 12.12.1983-ah Sorkar Order LRDA-132/83/2 MISC Pass No 2 of 1983, Sq Meter 1875 laia zau chu a pe chhuak ta a, Kohhran te pawh an lawm hle a ni.