Sunday School

Mizorama, Pentecost kohhran a lo din tirh lai khan kohhran hmasa (PCI leh BCM) ten Sunday school hi an lo kalpui tawh avangin kalpui ve nghal zel a ni a, kohhran dinna a piangah Sunday school chu kalpui a ni ta zel a. Tichuan Mizoram chu District pakhat chauh a ni rih a, kohhran a lo thang duang zel a, Dt. 16 March, 1957 ah chuan Theiriat Circle Conference-ah Chhim bial chu District hran emaw Sub District emaw neih ve a, Sap-te hnena thlen ve chu an lo pass ta a. Chumi hnu 1961-ah Thangte-ah District Conference neih a ni leh a, District Conference a hranga neih chu an pass leh ta a, mahse District hran emaw Sub District emaw pawhin a la awm chuang lo a ni awm e; kohhran a lo thang ve zel a District hran dilna pawh chu hotuten an bawhzui ve zel a, tichuan Dt. 29th August, 1965 ah chuan Lunglei District chu din a lo ni ve ta a ni. A tirah chuan South Mizoram District tih a ni. 1975 ah Chhimtuipui District a lo pian takah chuan South Mizoram District tih chu a dik ziktluak ta lo deuhin a lang a, 1980 atangin Lunglei District tih hming a lo pu ta a ni. Tichuan Sunday School pawh chu kalpui nghal a ni a, Zirlaibu leh zawhnate pawh District hian a intum rih a ni. Amaherawh chu Beginner atanga Adult thleng chu awm kim vek hleih theih a ni lo a, Local puitling leh hung deuh-ah chuan Department chu awm kim mahse awm kim hlei thei rih lo chu an tam zawk hial ang. Tunah erawh chuan Local 116 vel-ah Sunday School chu neih theih a lo ni ta a, Local fahrah zual tih loh-ah chuan Department kan awm kim thei ta zel hi hmasawnna ropui tak a ni. Tichuan Sunday School chu hun engemaw chen chu kohhranpuiin a keng kawh mai thin a, amaherawh chu Office Bearers te’n meeting neiin ruahmanna an siam mai pawh a awm bawk a, 1990 vel atang khan Conference mumal taka neih a lo ni ta a, kohhranpui khawmpui rual a neih mai thin a ni. Kum 1975 hma lam kha chuan zirlaibu pawh District-in a theih ang angin a inbawl khawr/insiam ve mai a, 1975 atang erawh chuan North East India Sunday School Department enkawlna hnuaiah zirlaibu pawh ruahman a lo ni ta a ni. District Sunday School chanchin kimchang zawk chu Zirtirtu Puitu-ah hmuh theihin a awm. Sum leh pai lamah pawh hma kan sawn ve hret hret zel a, tunah hian Sunday School Hall sa an awm chuan Rs 10,000/- tanpuina pek ve thin an ni. Tin, kum 25 a zawna Sunday School a thawk (Zirtirtu/Office Bearers) te chu Chawimawina pek an ni bawk. Term hmasaah khan hruaitu hmasa ten Zirtirtu Puitu (Teachers Manual) an lo tlangzarh tawh bawk. Tin, District Official te an pension in thlahna thilpek hlan thin an ni bawk.