Thu hma :

Zawlpui bial hi Lunglei District-a Pastor bial naupang leh te berte zing a mi a ni a. Pastor bial 20 awm (as on 2021) zingah bial 19-na niin, 2021 Statistic-a a lan danin member tam lamah pawh, bial member nei tlem ber dawttu a ni. Lunglei khaw thlang lama awm niin, Tlabung road-ah Phairuang lei thlen hma chiahin, PB Road (Phairuang to Bunghmun road)-ah pengin, Belthei khua atanga kawngpui dung zela kalin, Bolia veng/Tuisenchhuah thlengin Zawlpui bial hian a huam a ni.

Bial din tan dan :

Zawlpui Bial hi tun hma chuan Thenhlum bial leh Lungsen bial ten an insem thin a. Tuisen, Bolia leh Zawlpuite hi Thenhlum biala awm thin an ni a, Belthei leh Putlungasih te hi Lungsen bialah an bet thin thung. Hun eng emaw ti atang khan PB Road-a Pastor bial hawn a, Kau lui ruam hi hmun khata dah khawm tha tihna a lo awm tawh thin a. A chhan berah pawh Thenhlum atang hian Zawlpui hi 40 kms dawna hla a ni a, Lungsen atang hian an bial Kohhran hla ber, Putlungasih hi 40 kms vel zeta hla a ni bawk a. Chu bakah, Thenhlum leh Lungsen bialte hian Local Church enkawl an lo ngah deuh ve ve bawk a.

District Conference vawi 48-na chuan, PB road-a Pastor bial thar hawng tura dilna chu Lungsaen bial atangin a lo lut a, an zir chianna chu District Conference vawi 49-naah chuan report an pe a ni. Kum 2014-a District conference vawi 49-na Rorel No.1-na chuan, PB road-ah Pastor bial thar hawn ni se, Pastor thut hmun atan Zawlpui ni se tiin a lo pass ta a ni.

Bial bul tanna :

District Conference rorel bawhzuiin, District Board chuan Zawlpui Pastor bial chu rawn dinin, a hun laia District Superintendent, Rev. C. Darkhuma chuan a rawn hawng ta a ni. Bialtu Pastor hmasa ber atan Pastor H. Rothuama chu a rawn dah ta bawk a. Bial ramri te pawh ruahman fel niin, Belthei atangin Bolia veng/ Tuisenchhuah thlengin Kohhran panga dah luh a ni ta a, Chungte chu :

1. Belthei
2. Putlungasih
3. Zawlpui
4. Boliaveng
5. Tuisenchhuah

Pastor Quarters :

Kum 2005 atang khan District Mission Department chuan Zawlpui hi Field Evangelist/Home Missionary Station atan a lo ruahman tawh a. Missionary Quarters pawh daprap tak takin Evan.Andrew Lalremsanga sailo kaihhruaina hnuaiah tun din a lo ni tawh a, A hnu ah Evan. R.Lalsangzuala awm lehin, Kum 2011 khan District Mission ruahmanna hnuaiah Home Missionary, Evan. Zoramchhana Sailo awm lain Assam type-in Missionary Quaters tha tak sak a ni a. Pastor bial hawn a lo nih pawh khan Missionary Quarters awm sa chu District lamin cheibawl tha hlekin, Pastor Quarters atan luah chhunzawm a ni ta a ni.

Zawlpui Section Board Vawi 6-na, Putlungasih Biak ina, Dt. 27.10.2018-a Rorel No. 6-na chuan, Pastor Quarters repair chungchang a rel a. District lam hian Pastor quarters hi min la sak thatsak dawn rih lo a nih chuan, min repair-sak tura thlen ni se tiin a rel a. District Board 194-na, Ni 4.12.2018 Rorel No. 5-naah ngaihtuah a ni. District Building and Property Board lamin Zawlpui Pastor Quarters sa tura a lo thlen ve bawk avangin, repair tawh lova 2019-a sak turin a pass ta a ni.

Dt. 20.03.2019-ah hetih hun laia District Superintendent, Rev. R. Lalrosanga chuan Quarters lungphum a rawn phum a, April thla atangin sak tan a ni ta a ni. Quarters sak nan hian Building and Property Board lamin an dil angin, District Board chuan 14.5 lakhs a sunction a, chu mi hmang chuan Building and Property Board chuan chak takin Quarters sak hna chu a thawk ta a ni. Sum awm ang angin Quarters hi September 2019-ah luah theih tura sak peih a ni a, October thla tirah, a hun laia bialtu Pastor, Pastor Muanpuia Colney chuan a luah lut ta a ni.

Bial hruaitute :

Zawlpui bial hi kum 2014 May thlaah hawn a ni a, hemi hnu lawk hian bial hruaitu hmasa berte form nghal an ni a, a hnuaiah hian bial hruaitu lo ni tawhte chu tarlan a ni.

Kohhranpui