PANGZAWL LOCAL CHANCHIN

Ni 7th August, 1954 kum khan Pangzawl Lalpa, Pu Besawha (Thankunga) chu UPC thurin ang leh zirtirnaah a lo awm tawh a. Chutih lai chuan Pastor Zakamlova chuan Pangzawl khuaah hian rawngbawlna rawn neiin, Pu Besawha, Pu Thanzauva F/o Lalnghinga leh Pu Pasuka Sailo F/o Lalvuana te chuan an lo zawm ve nghal a. Amaherawhchu, Lalpa hi a mi leh sate hian an thlawp loh avangin, Lalpa ber mah ni se, amah mai hian thlamah tawngtaina te neiin, amahin hun a hmang thin a ni. Kum 1955 a lo nih chuan, a fapa Pu Thanzauva leh Pu Pasuka, Pu Kamlova te chuan rawn zawmin, Kohhran angin an lo ding chho ta a ni. Hetiang anga Kohhran din a lo nih hian Pu Besawha te inah chuan inkhawmna te an nei ve thin a, anmahni pual taka Biak in sak a han din erawh chu, an la puitlin thei mai lo va. Kum 1958 kumah chuan Biak in an nei tan ve ta a. Lal in tlang hnuaiah kal kawng a kal a, chumi kawng hnuaiah chuan Maurapin 12x18 ft-a lianin an sa a, he tih hun lai chuan in sakna hmanrua atan mau leh thingtuai, a chung atan di emaw, Thilthek emaw chu an hman tlanglawn ber a ni.

Kum a lo vei zel a, ram a lo buai hma deuh hian, thingzaia Biak in sak te pawh chu an tum ve hle mai a, mahse rambuai chuan a rawn nan tak a vangin, an thingzai chhek khawl sa chu a kang fai ta vek mai a. An ruahmanna chu an puitlin thei ta rih lo a ni. Rambuaina vanga sawi khawmna hmun a nih angin, veng hrang hrang atanga lo kal, UPC members te nen chuan an han ti ho ta hlawm a, hetih hun lai tak hian members 200 bawr chu an ve awm e. Amaherawhchu, a veng inthen danin a zir deuh vang nge, Kohhran chu hmun khata lawi khawm reng ta lo chuan, hmun hnihah Kohhran chu rambuai lai vek hian inkhawmna buaitsaih a lo ni ta a ni.

Kum 1972 kum khan sawi khawm chu an darh leh ta a, mahni hmun ngai lam te panin an thlawhhma lak rem chan dan te an dap kual ta hlawm a, Kohhran te pawh chu a awmna ngai, Pangzawl Kohhran ho bik te chauh chu, Evan Pasuka hovin Kohhran hlim tak niin hun an hmang chhunzawm ta zel a, he mi hnu hian Pu Enmawia in hmun chu Biak in hmun atan leiin 1978 kumah, Thingzai hmangin Biak in duhawm tak chu an din ve ta a ni. Rambuai hnu hian melveng atangin Banglavengah sawn phei a ni a, Hun eng emaw ti chhung chu Bangla vengah Biak in hi a awm a ni. Nimahsela Kohhran member tam zawk, melveng lamah hian an awm si a, remchang zawk nia hriain Kum 1996 kum khan Biak in pawh Melveng lamah bawk sak a lo ni leh ta zawk a ni. Tun thleng hian rambuai hnuah Biak in hi vawi 4 lai sak that a ni tawh. Tunah hian a ban RCC hmanga sak mek niin, Member 26 an ni mek. Tun thleng hian Pangzawl Local-ah hian Licence nei mi pahnih Evan. Pasuka Sailo leh Evan. H. Lalsuaka te an lo nei tawh a ni.

Tun dinhmun a Kohhran hruaitu te : Local Chairman : Evan H. Lalsuaka
Secretary : Upa TC. Lalramnghaka
Treasurer : Upa H. Suakkhuma