Sâwi khâwm hma UPC :

17 January, 1954 kum-ah Mizorama UPC hruaitu pa ber, Pu Zakamlova chu Khuanghlumah lo kalin, Khuanghlum Lal inah a thleng a. UPC thurin leh kalphungte sawiin mi thenkhat rilru verh zawng tak a lo ni a, Kohhran pawh an din nghal ta mai a ni. A tirah chuan an tam lem lo va, heng a hnuaia kan tarlante hi Kohhran din tirha member te an ni.

1) Pu Lalngura (Lal)	2) Pi Chhimtawni (Lalnu)
3) Pu Zabuaia	4) Pi Doziki
5) Pu Chhunruma	6) Pu Rosiama
7) Pu Thanzauva	8) Pu Thanlunga
9) Pu Lianhnuna	10) Pu Liantluanga
11) Nl. Hautluangi

Heng mite hi a rualin an inpe vek lo va, Pi Chhimtawni leh Pi Doziki te hi an hma fal deuh a, an hnu-ah an rawn inpek belh ta zel a ni. Heta kan tarlan bakah hian belhchhahtu pawh an awm zel a, Pu Saihlira Sailo ( Lal fapa) pawhin sipai atanga a chawlh hnu-ah a rawn zawm ve a. An hruaitu hmasate chu Chairman Pu Zabuaia leh Secretary Pu Lalngura te an ni a, a bak chu hriat theih a ni tawh lo a ni.

He tih hun laia Baptist Kohhran Bialtu chu, Pu Pastor Sawiluaia niin Thlarau thianghlim hnathawh a hre thiam lo hle thin a. Chuvangin hla te pawh an phuah el khum hial thin a ni awm e. Hetiangin, “Pastor Luaia, i bial fang rawh, i tan vanram kai a har awm e, Thlarau thianghlim, ramhuai i ti zel a,” tiin. Khuanghlum khuaa UPC din a nih hian Biak in te pawh hun reivak lo hnuah chuan an han nei ve nghal a. Sawi khawm hma hian tum hnih Biakin hi an sa hman a ni awm e.Thlarau awmpuina an chang a, mi tlem te mah ni se; an hlim em em mai thin a, an inpumkhat hlawm hle thin a ni. Amaherawhchu, Kohhran lian zawk leh an chhuahsan lam tan chuan a lawmawm lohna lai a awm ve te pawh a ni ang, an hmusit zuiin an nuihzat thei hle thin a, ‘Papawl ho’ tiin an ko thin.

Kum 1962 leh ram buai inkar kha an tawng san lai leh, member pawh an tam ber lai a ni a, member pawh 150 vel lai an tling a ni. Sawi khawm hma, Khuanghluma la awm laia hruaitu hnuhnungte chu :

Chairman	Pu Chhunruma
Vice Chairman	Pu Rosiama
Secretary	Pu Hrangdailova
Asst. Secretary	Pu Thanzauva
Treasurer	Pu Liantluanga
Fin. Secretary	Pu Lianhnuna

Heti chin hi Khuanghlum khuaa sawi khawm hmaa UPC chanchin kan hriat theih te chu a ni. A hnu lam sawi khawm, kum 1966 atanga Kohhran chanchin kan hmuh theih te chu kan han tarlang leh dawn a ni.

Sawi khawm hnu lam UPC :

Sawi khawmnaa lut khaw hrang hrangah hian, Thiltlang leh Keltan khua tih lohah chuan UPC an awm vek a, Kohhran dangte ang bawkin hun harsa tak an rawn hma chhawn theuh a ni. A lo dawngsawng tur ber Pangzawl Kohhran lah chu, Biak In an lo neih loh lai a ni ve si a, baihvai ang reng takin an lo lut hlawm a ni. Sawi khawm a nih ang hian Kohhran lamah pawh a tir lamah chuan, Kohhran bik awm loin Kohhran hrang hrangte chu Kohhran pakhatah an awm khawm vek phawt a. Chumi hnu rei lo teah mahni Kohhran angin an awm hrang leh thuai a ni. Mahni khaw bil Kohhran theuh anga Biak In hran theuh han sual tur chuan, UPC Member an lo tlem hlawm deuh bawk nen, Kohhran pakhatin an awm khawm ta a. Kohhran tina hruaitute chuan rawngbawlna hum an chelhzui vek a ni. Hetia an lawi khawm lai hian member pawh 200 chuang zet chu an ni. Biak In an neih hma chuan Pangzawl Kohhran inkhawmna hi mi mal in Pu Pasuka in leh Pi Biakthangi inah an inkhawm thin.

He mi hnu deuhah hian Hnahchang Baptist Kohhranin, an Biak In hmun atana an laih zawl sa chu Joint Committee-in khaw dang nena Kohhran pakhata lawi ho tura a rel vangin, chutih laia AO chuan Biak in hmun lo mamawh ve mek UPC chu a pe ta a, anni tan pawh thil lawmawm tak a ni awm e. Hnatlang runpui a reh deuh hlek hnuah chuan, he hmunah hian Biak In pawh an sa ta a ni. Khaw hrang hrang atanga Kohhran hruaitu lo lut kan hriat theihte chu hengte hi an ni :

1. Hnahchang kohhran atangin :

• i) Upa Darchhunga
• ii) Upa Hrangkhuma
• iii) Upa Darzawna

Rawngbawltute :

• i) Upa Raltawna
• ii) Upa Thangzuala
• iii) Pu Thankima
• iv) Pi Haukhumi

2. Khangbawk Kohhran atangin :

• i) Upa Lalauva (Evan)
• ii) Upa Thansanga
• iii) Upa Haukhama

Rawngbawltute :

• i) Upa Thanglaia
• ii) Pu Liankhama
• iii) Upa Biaksanga

3. Pangzawl Kohhran atangin :

• i) Upa Pasuka (Evan)
• ii) Upa Laibuaia
• iii) Upa Ralbuta

Rawngbawltute :

• i) Pu Thanzauva Sailo
• ii) Pu Thangchhingpuia
• iii) Pu C. Lalchhawna
• iv) Pi Biakthangi

4. Khuanghlum kohhran atangin :

• i) Upa Chhunruma
• ii) Upa Hrangdailova
• iii) Upa Liantluanga

Rawngbawltute :

• i) Pi Rokungi
• ii) Pu Lianhnuna
• iii) Pu Thanzauva
• iv) Pu Thangliana

5. Local Church Board Committee Hruaitute :

Pangzawl sawi khawma hnua Pangzawl Local UPC hruaitu kan hriat theihte chu hengte hi an ni :

1967-1968

Chairman	Evan. Pasuka
Secretary	Upa Hrangdailova

1969-1970

Chairman	Evan Lalauva
Secretary	Pu C. Lalchhawna

Khuanghlum Local UPC an in dang :

Kum 1969-ah chuan Melveng lama awmte tan inkhawmna a hla deuh bawk a, Khuanghlum UPC Kohhran chu an in dang ve ta a. Melveng Pu Lalliana kawmchhak, Primary school kawmcharah Biak in sak a ni. He Kohhrana hruaitute kan hriat theihte chu hengte hi an ni :

Chairman	Upa Chhunruma
Secretary	Upa Hrangdailova

Sawi khawm zawh hnu lam :

Kum 1972 kumah pangzawl sawi khawmna atangin an kal darh leh tan ta a, Khuanghlum khawho pawh Khuanghlum khaw hluiah let tawh lovin, tunah an awm mekna hmunah hian awm hmun an khuar a, Khuanghlum ram huam chhung tho a nih avangin Khuanghlum hming a pu chhunzawm ta zel a a ni.

Tuna Middle School-II awmna (Khuanghlum veng) ah hian Biak in sak niin kum thum chhung chu luah a ni a, a hmun hi tha viau mahse; tuna Pangzawl Community Hall Khuanghlum veng hmunah hian sawn leh a ni. Biak in hi peih fel tep tawh a nih laiin, Pioneer lamin an hmun hlui a nih avangin an rawn chuh buai a, chuvangin tuna Khuanghlum peng chungah hian sawn leh a ni a. Pioneer hovin Biak in hi min saksak vek nghe nghe a, a chhuat te pawh mawi hnai takin min zut mamsak a ni. He hmunah hian Biak in hi vawi 3 lai sak that a lo ni tawh a, hmun laili leh ualau tak ni mahse; zahpah lo taka hnuhma lo nei duh mai an lo la awm leh thin erawh chuan, rilru a tina thinin, Lalpa Thuthlung avanga ringtu ten kan chan hi, khawvel thil tak chuan hriat thiam a har hle thin a ni. Tuna kan tarlan karah hian thil tam tak tarlan loh a awm a, hun harsa leh hreawm pawh Pathian hruaina avangin, kan mi hmasa ten theih tawpin sul an lo su a, an zarah Kohhran duhawm leh thangduang tak kan lo ni thei ta hi a lawmawm hle a ni.

Kum 1985 a lo inher chhuak a, Hnahthial bial atanga in dangin Pangzawl bial thar a lo piang a, Bialtu Pastor nei hrangin Khuanghlum Local chu Bialtu Pastor thuthmun a lo ni ta a ni. Khuanghlum Local atang hian Pastor pathum an lo chhuak ve tawh a, chungte chu Kum 1957-ah Pu Zabuaia, Pastorah lak a ni. Kum 1994-ah Evan Enmawia lak a ni. Kum 2005-ah Evan PC. Lalfakawma lak a ni.

Kum 1985 Pangzawl bial in dan atang hian, Khuanghlum Local te pawhin hun harsa tak karah Pathian malsawmna avangin, Kohhranhote pawhin hma sawn ve zelin, kum 2020-ah chuan member 200 chuang lai a lo ni ve ta a, Biak in luah lai Khuanghlum venga mi chu NH 54 laih zauh turin a tihchhiat dawn avangin, District-ina ram min leisak Pu Saikaia te thenawm, Pu C. Lalthangvunga ram, Venghlunah Biak in thar sak tan a ni ta a ni. Biak in thar sak nan hian Compensate eng emaw zat hmuh niin, Biak in lian leh changtlung tak sain, November ni 16, 2024 khan Rev. C. Lalrintluanga, District Superintendent-in a hawng.

2025 - 2026 Kohhran hruaitute :

Chairman	Upa Rosanga Sailo
Secretary	Bro. Vanlalzika
Treasurer	Upa Lalhmingsanga