Luangmual hi khaw naupang tê niin Lunglei chhim lama awm a ni a, Lunglawn atangin V.C hran nei a in dang niin 2nd Bn MAP hmunpui leh Supply Godown awmna hmun a ni. Tunah hian chhungkaw 450 vel a awm a mihring 2000 chuang khawsakna hmun a ni.

Tun hma chuan Luangmual-ah hian 2nd Bn MAP Kohhran ( fellowship a nih mah zawk awm e. Kohhran hrang hrang lawi khawmna) chauh a ding a, hetih hun laia UPC Kohhran member thenkhatte pawh Battallion Kohhranah hian an lawi mai a, a lawi ve lote pawh kan thenawm veng hnai vaia kan Biak In awmnaah te an inkhawm bawk a. Chutia Kohhran ding ta lo chu Kohhran din duhna te lo awmin Ni 17 February 2002 (Sunday)-ah Chanmari Bialtu Pastor Rev. Saidawla leh Bro. Chhawnthanga (Farm Veng) te lo kalin, Bro. J. Laltanpuia leh mi thahnemngaite insawm khawmin inkhawmna neih a ni a, khuang a awm loh avangin khuang atana awm remchang ber Plastic Litre 5 dawng hman mai a ni. Inkhawm banah Kohhran a din theih ang em? tih ngaihtuaha sawi ho a ni a, Ni 10 March 1990 ( Inrinni) ah Kohhran din tha tih tlan a ni a Kohhran din hma atan Acting Chairman-ah Bro. Zahaia (L) leh Secretary atan Bro, Rualchhawna te ruat an ni.

Ni te a liam a, rorelnain a pass angin Chanmari Bialtu Pastor Rev. Saidawla leh Chanmari bial hruaitute lo kalin, Ni 10 March 1990-ah chuan ‘UNITED PENTECOSTAL CHURCH, LUANGMUAL LOCAL’ chu Pathian hruainain din a lo ni ta a, a lawm nan Vawkpa 46 inches-a lian talhin ruai nen ropui taka lawm a ni.

Kohhran ding thar min lawmpuitu mi pali (4) Krista-a unaute - Lalthakima, Rintluanga, Lalhnema leh Lalhmingmawia ten Rs. 1100/- min pe a. Tin, Kohhran din nî hian Unaupa Chhawnthanga’n, Khuang min pe a, Unaupa Saptawna’n Dâr min hawhtir bawk. Kohhran Chairman hmasa ber Evan. Rumliana’n Bible lian pakhat, Petromax leh Kohhran hla bu min pe bawk a ni.

Hetia Kohhran a lo din takah chuan hruaitu turte thlanga Kohhran Form chu thil tih mak mawh a ni ta a. A hmasa ber ni turin hetiang hi Kohhran Form dan leh hruaitute chu an ni :

Rev. Saidawla (Chanmari Section Pastor) leh Bial hruaitute - Evan. Dârhmingthanga, Evan. CH. Rongaia (Section Secretary, Chanmari), Evan. Zopianga (PYD President, Chanmari Section) leh Evan. Lalthanzama ( Bial Sunday School Director) te Pastor tawiawmin an lo kal a. Tualchhung lam atangin Evan. Rumliana, Bro. L.H. Vanlalawia, Bro. F. Rualchhawna, Bro. J. Laltanpuia, Bro. Saptawna, Bro. Zahaia, Bro. Dingluaia, Bro. Lalramzauva, Bro. P.C. Lalhmangaiha leh Bro. J.F. Malsawma te, Committee-ah hian tel. Chairman Rev. Saidawla’n Committee min kaihruai a, fuihna thu tha tak tak sawiin Pathian hnenah a tawngtai a. Minute Secretary atan Evan. CH. Rongaia a ruat a, Kohhran Form-na neih a ni.

Kohhran din hnua Lalpa Isua hminga Baptisma chang hmasa ber chu Bro. P.C. Lalrosanga a ni a. Ani hi mi thar, Lalpan Baptist Kohhran atanga min pek a ni. Lalpa chu fakin awm rawh se. Chan ni hi Ni 04.04.1990 a ni a, Evan. Rumliana’n Baptisma hi a chantir. Nau hlan hmasak ber chu Imanuel Lalnundanga S/o J. Vanlaldika niin, Ni 13.05.1990 khan hlan a ni. Tin, Kohhran din hnua rawngbawltu lak hmasak ber ni turin Ni 06.05.1990-ah Bro. Thanghrima lak a ni.

Hma lakna tur tam tak a lo awm tak avangin, he mi kum vek hian Building Committee din tha tih a ni a, hetiang hian hruaitu thlan nghal a ni :

Ni 27.12.1990 atangin Biak in hmasa ber tur sak a nih huna hman atan, Thing zai tan a ni a, chartin pakhat zel Rs. 25/-in Upa L.H. Vanlalawia leh Bro. J. Laltanpuia te zaitir an ni.

Biak In nei lova Kohhran ding kan nih avangin, unaupa Tlanlawma te Inah kan inkhawm thin a. Pathian leh Kohhranhote zo tak leh lawm takin min thleng a, Kohhran din kum hian unaupa F. Rualchhawna te Inah Christmas leh Kumthar zaikhawmna neih a ni a. Ruai vawi li (4) lai kan siam a ni.

Kum 1990-ah hian Kohhran member sawm riat leh pathum (83) kan awm a, chung zingah chuan : Puitling - 55 leh Naupang - 28 awmin, Mipa - 46 leh Hmeichhia - 37 kan ni. Chhungkua sawm leh pariat (18) awmin LAD member sawm leh pasarih an ni. Tin, Kohhran din kum hian PRZ-ah Rs.10,423 zet a rawn lut a ni.

Pathian hruainain kum 1991 a lo thleng a, Kohhran form kum a nih angin kan Local pawh in-form thar ngai a lo ni a. Chutih mek laiin Kohhran min hmangaihtu leh thil peka thahnem ngai em em, a hmu tawh apiangin-a Vânram kai tura an dah thin, kanLocal Chairman Evan. Rumliana, a hmangaih Lalpa tana full time-a rawngbawl a duh tak avangin, a hnathawh lai pawh ui zo lovin Police Department-a Sub-Inspector hna atangin min pension-san ta si a. Ani tel lova Kohhran a han kal tur chu kan huphurh tak zet a. Chutia baihvai taka kan awm lai chuan Lalpan, Kohhran hmangaihtu leh rawngbawlna kawnga thahnem ngai em em reng thin, Chairman atan Upa Thanghrima min han pe leh ta a, a kaihhruaina hnuaia Kohhranhoten hmasawnna kawng zawha kan kal mek laiin eizawnna lama kan hotu ten Chawngte Post lamah min sawnsak leh ta si a. Arpui no hruai, Mu-in a pui a laksak ang maiin kan baihvai leh ta a. Chutih lai te chuan, eizawnna lama kan hotute leh Kohhran danga hruaitu thenkhatte chuan, “UPC Kohhran chu an hotupa a awm tawh si lo va, an ral mai ang”, tiin min tawng khum thin a, rilru a na ngawih ngawih thin a ni. Hmusittu leh seltute awm reng thin mahse; ‘Isuan Ram neih a thulh thei lo’ tih ang maiin ral a hnekin kan pung zel a, nasa takin hma kan sawn zel zawk a ni. Kohhranhoten Upa pakhat chauh kan neih tak avangin, Upa atan unaupa J. Laltanpuia thlan belh a ni. Kum 1991 Kohhran in-form-ah hian member kan la tlem avangin, PYD in-form hrih loh mai tha kan ti tlang a, kan sum neih sa Rs.11 pawh Church Board-ah pek luh a ni a, Building sumah dah a ni.

Kum 1991-ah hian ni bik siamin, July ni 28-ah special takin ‘Zuk leh Hmuam’ dona ni hman a ni a. Zirtirtu hran ruat bik awm lovin Rawngbawltu ten thu tawi insawi chhawkin thingpui ruai nen hlung takin hun kan lo hmang tawh a ni.

Luangmual Pentecost Kohhran ten Thlarauah te, hmangaihna leh inpumkhatnaah te, thil pekah leh property-ah te hmasawnna hmel thar hmua malsawmna kan dawn zelna chhan ber chu, Kohhran hruaitute inpekna nasat vang a tih loh theih loh. Kohhran tan a nih tawh phawt chuan, eng lai mahin tha chuang sen an hreh ngai lo va, Thingphurh hnatlang nei dawn ila, phurh tur lo zawng lawkin an lo kit lawk diam mai thin a, chutiang zelin thawhlawmah ni se, hma an hruai thei zel a, Thuthlung sawi an peihin kohhran chhungkua kan kual an peih em em a, an thahnemngaihna aw ‘kei ma’n’ an tih zel theihna te kha, tun thleng hian bengah a la ri nawn fo a, thenkhat ten thawhlehna tha zawk nghakin rih sang mual min lo kaisan tawh a, an phu ang ngeiin an hmangaih Lalpan lawmman chhe thei lo a la pe dawn a ni.

Kohhran din tirh atanga inkhawm nana kan hman, Unaupa Tlanlawma te In chu thlamuang taka kan awm laiin Cyclone-in min nam thluksak hlauh mai a, Kohhran Record bu leh Khuang a ti chhe tel vek bawk a, hrilh a hai duh hle mai. Heta tang hian, Biak In kan sak hma chu Unaupa F. Rualchhawna te Inah kan inkhawm ta thung a,. Kan dinhmun te thlirin Biak In mamawhna a sang hle tawh a, Biak In hmun lei nan Rs. 5000/- chauh Kohhranin kan nei si a, chutia rilru buai taka kan awm lai chuan Upa Thanghrima’n ram inlei tawm a lo rem ti hlauh mai a, ani’n Rs. 5,000/- bawk thawhin a hmingin LSC No. 597.01, Lallawmsawngi D/o Hualhnuna ram chu Rs. 10,000/- in kan lei ta a, Kohhran nen intiat chiahin kan inphel nghal a ni.

Ni 18.01.1992-ah Biak In hmun sam fai hnathlang neih tan a ni a. Hnathlang thawk chhuak zawng zawng mi pasarih (7) kan ni. Tha thlah lovin Biak In sak chhunzawm zel a ni a, Ni 25.01.1992-ah Biak In ban phun tan a ni. United Pentecostal Church, Luangmual Local Biak In hmasa ber tur, a dung 24 feet leh a vang 15 feet chu Lalpa tanpuinain Thla riat (8) chhunga sak zawh a lo ni ta a.

A hmasa ber ni turin Ni 08.08.1992 Inrinni zanah Biak In tharah kan inkhawm ta a. Upa L.H. Vanlalawia’n inkhawm min kaihruai a, Evan. Rumliana’n Pathian thuchah min hrilh thung a ni. Biak In hmasa ber chu Ni 27.03.1993 (Inrinni)-ah hawn a ni a. Ni 26.03.1993 (Zirtawpni) zan atangin Biak In hawn programme hman tan a ni a, hetiangin :

Biak In hawn lawm nan Bawngchal pakhat leh ar pahnih talh a ni a. Ruai ropui tak thehin hun kan hmang a ni. Hemi ni vekah hian Baptisma khur hawn a ni a, mi pali (Puitling vek)-in Lalpa Isua hmingin Baptisma an chang a, an zinga pahnih phei chu mi thar an ni. Baptisma chantirtu hi Rev. Rumliana niin, ani hi Luangmual Kohhran dintute zing a mi leh Church Board Chairman hmasa ber kha a ni. Biak In hawn programme kan hman chhung hian Thlarau lam hla vawi sarih kan rem a ni. Thlarau Thianghlima a mi te min pawl a, mi thar te min pe a, Biak In tha tak min petu kan Pathian neih chhun Lalpa Isua hming chu fakin awm leh rawh se.

Biak In hmasa ber sak nan hian Rs. 27,345/- leh Tha 252 sen a ni a. A chung Rangva hi District PYD-te min tumsak a ni.

Pathian hruainaa 1994 kum a lo her chhuah meuh chuan, Biak Inah kan leng ta meuh lo va. Ni 11.08.1994 (Inrinni)-ah mi sawm pali (14) hnatlang thawk chhuakin fit 6-a tih sei a ni a. Hemi ni hian kan zo hman vek. Mahse, hna te a laklawh avangin kanbang tlai hle mai a. Inkhawm tura lo kal ten min rawn pui zel bawk a, Torch light eng leh Lighter engah hna kan chhunzawm zel a, a hlimawmin a ropui dangdai hle a ni.

Lalpan mal min sawm a, Kohhran member-te pawh kan pungin Za chuang lai kan lo ni ve ta reng mai a. Kan duh zawng leh mamawhte pawh a lo sang ve zel a. Ring taka Isua Pathian-na leh Chanchin tha famkim puan nan ‘Au rinna’ kan mamawhin kan awt hle mai si a. Church Board member ten theih ang tawk tawk thawhin, Thing phurh hnatlang vawi 3 kan nei bawk a. Tlak lam liam, kham karah hah leh thlan tui far zawih zawihin, au rinna kan neih hun tur suangtuah chung zelin, hlim takin kan thawk a. A tawpah zawng kan sual chhuak ta nge nge a, Rs. 5,000/- man Au rinna, Ahuja kut chhuak ngat kan lei thei ta a ni.

Au rinna hmanrua kan nei tha tawh bawk nen, Ni 21-30 June 1996 chhungin Speaker-ah Evan. KVL. Hmangaihkima hmangin Crusade kan nei a. Kan hmanraw thar te a ring tha bawk a, kan thawm hre phak apiangte lo kal khawm zelin, Pathianin Thuhriltu rawngbawlna te mal a sawm a; Kohhran member tam takin kan lo pung a. Kum 1994-a Kohhran member 135 ni thin kha, Kum 1996-ah chuan member 220 zet kan lo ni ta! Pathian-in min hmangaih tak zet a ni. Kum 1996-ah hian Kohhranhoten hma kan sawn nasain, malsawmna kan dawn nasat kum a ni a. Biak In pahnihna tur; a dung 36 feet leh a vang 24 feet-in, Biak In hman lai mek chhung khungin RCC-a sak a ni a. Kohhran chhungkua chhiatnia kan inralna Rs. 150/- ni thin pawh Rs. 500/- a tih san a ni. Kum 1995 atangin thawhlawm hi a khawn-a-khawn tan a ni a, 1996 atangin Upa Bial siam a ni bawk.

Kohhran hmasawnna kal zelah chak zawka hma lak a nih theih nan, Department siam belh tha tihna a lo awm a. Ni 05.03.2000-ah Pentecostal Men Department din a ni a. Hruaitu hmasa berte hetiang hian thlan an ni :

Kum 2000-ah hian Sunday School Hall, a dung 30 ft. leh a vang 24 ft.-a sak a ni. Pathian malsawmna changin Kohhran member kan pung zel a. Bank Loan Rs. 2,50,000/- lain, Kum 2004-ah Biak In a dung 48 ft., a vang 32ft., a liang 16ft. leh Kawngkharpui pahnih 4x6½ft.-in tuna kan hman lai hi sak a lo ni leh ta a. Ni 65 chhungin inkhawm theiha peih vek a ni. Biak In kan sa lian telh telh a, kan sa zo hma tial tial thung a, a chhan chu; a te ber atanga a lian ber thlenga kan in pekna nasat vang a ni.

Kum 2005 atangin Minor Sunday School Department a hrana neih a ni a. Superintendent atan Upa R. Lalrumliana leh Secretary/Treasurer-ah unaupa J.P. Rinsiama te thlan an ni. Kum 2007-ah Rawngbawltu Biodata siam a ni a, Kohhran inenkawlna dan pawh siam that a ni.

Kum thar lama Biak In hawn kan rilruk avangin Ni 19.07.2009-a Joint Committee chuan, Biak In chei nan Loan Rs. 4,00,000/- lak tha kan ti a. Hna thawh tur atan hengte hi ruahman an ni :

Biak In leh a Compound chei leh thawm that hna kan thawh mek laiin, Veranda ban kan phun chu, “Vantlang ram in nek,” tiin, kha tih laia kan VC ten Revenue Department-ah min hek a. Chutia Complain a luh takah chuan Department lamin Stay order min pe a. Hna tul tam tak, laklawh tak tak te chu chawlhsan lo thei lo kan nih tak avangin, rilru a hrehawm duh hle mai. Chutia rilru khingbai taka kan awm lai chuan Revenue Department-in ram buai teh fel turin official pahnih - F. Lalchhandama leh Rosiamliana te a rawn tir a. Kan khawtlang hruaitu Pu Rualkhuma (VCP), Pu Zobiaka (Vice President) leh Pu K. Lalrawngbawla (VC member) te hriatpui leh hmuhpuiin uluk takin Kohhran ram chu teh that a ni a. Vantlang kawng lamah Kohhran ram 1 metre dawn a la awm zawk thu leh, dik lohna kan neih loh thu te hriat fiah a ni ta a. Stay order pawh hlih zui niin lawm takin hna kal laite pawh chhunzawm a ni leh ta a ni.

Tichuan, Pathian khawngaihnain Biak In chei leh thawm that hna-te kan zo fel a. Ni 06.11.2010 (Inrinni)-ah Kohhran din tirh atanga Biak In pathumna chu ropui taka hawngin, min hawnsak tur leh Speaker atan Rev. R. Lalrosanga hman a ni. A lawmna ruai atan Bawng pakhat, Vawk leh Ar talh a ni a. Biak In hawn min lawmpui tur leh hmanpui tura kan mi sawm te nen hlim takin hun kan hmang thei a ni.

Kum 2013 kum khan Biak In thlanga Pi Hmangaihzuali W/o Pu Thanmawia ram hi Kohhranin kan mamawh em em reng a. He ram tel lo hian hunpui kan hmang thei lo a ni ber a. Tun huna kan mamawh aia a let tam takin hun lo la kal turah kan mamawhna a sang dawn a ni tih hriain, kan hotute nen vawi tam lei tura an indawr hnuah Rs. 8,00,000/-a inleisak turin kan inbe thlu thei ta a. Loan Rs. 10,00,000/- (Nuai sawm) pukin a chhiar ang zat chuan kan lei thei ta a ni.

Kum 2015 March ni 10-ah, Kohhran din champha vawi 25-na lawmna hun hman a ni a, Committee peng hrang hrangte siamin an mawhphurhna theuh te zo taka hlen chhuakin, Silver Jubillee chu tisa leh thlarau lam ruai te kil hovin hlung leh nuam taka hman a ni.

Hun te lo kal zelin Kohhranten nasa takin hma kan sawn zel a, kum 2019 a lo her chhuah leh meuh chuan Biak bûk thar sak duhna a lo awm leh ta a, Kohhran rawngbawltu, Department hruaitu leh Chhungkaw aiawh pakhat theuh kalkhawm chuan Biak In thar sak ni se tiin ruahmanna a siam leh a, a tul leh pawimawh te Church Board kutah dah a ni a Church Board lam ten theih tawp chhuah nghalin Budget atan Rs. Nuai 250-300 ruahman a ni a, a len zawng, a chung lan dan tur leh pawimawh dang te ruahman felin Biak In sak dan tur buaipuia mi thiam te lo rawn turin mi pathum - Upa LH. Lalrinmawia, Upa Lalhmingsanga leh Rbt. K. Lalrintluanga te a ruat a, ani’n theih tawp chhuahin hma an la a, Kum 2021 March thla a her chhuah meuh chuan, Biak in, a vawi li-na atana sak dan tur chu peih fel a ni leh ta a, Building Committee din a ni a, hetah hian Chairman-ah Upa LH. Lalrinmawia, Secretary-ah Rbt. K. Lalrintluanga, Treasurer-ah Upa Lalhmingsanga te ruat an ni bawk.

March ni 10 2021 hi a kum 31-na niin, hemi chhung hian Kohhran ten harsatna tam tak kan tawkin beidawn rum rum chang te kan nei lo a ni bik lo va, amaherawhchu, kan hruaitute thahnemngaihna te, mi thahnemngaite tawngtaina te leh mipuite inpekna leh thawhrimna te Lalpan mal a sawm a, tun dinhmun hi kan chuang kai thei a, kan lawm tak zet zet a ni.

Pathian khawngaihnain Luangmual Local hian General, District leh Bial atanga target kan neih pek theih loh kan nei ngai lo va. Target piah lam, Ramthim field hrang hranga Biak In sakna tur leh hmun leina etc., tura Tangka thawh a ngaih changin, Pathian zarah kan la ti hlawhtling ve zel a. Kohhran ding thar kan hriatte chu District pawn lam pawh ni se, theih ang tawkin kan tanpui fo bawk a ni.

Luangmual Local-a kan hruaitute hi rawngbawltu lak leh chher chhuah kawngah an rilru a zauin an thil phal hle a. Malsawmna tam tak kan dawn phah niin kan hria. Kum 1991 Kohhran in-form-a rawngbawltu paruk (6) chauh awm kha, tunah chuan Licence holder, Upa leh rawngbawltute nen, kan vaiin sawm leh paruk (16) zet kan lo awm tling ta reng mai a ni. Kohhran din tirha member 73 chauh ni thin kha, tunah chuan member 500 dawn kan lo ni ta reng mai. Tin, Local naupang te ni si hian, Pastor pakhat leh Home Missionary te bakah, Full time Worker te chher chhuah an ni tawh bawk a ni.

Luangmual Local hruaitute hian Chanchintha famkim puan darhna kawngah leh, Thlarau Thianghlim Baptisma chang tura rawngbawlna kawngah hma an la nasain an ngai pawimawh em em thin a. Chungte avang chuan Camping te, Crusade vawi eng emaw zat mai neih tawh a ni a. Tin, Luangmual Local hi chawimawi uar ber Local kan ni hial awm e. Vawi hnih-thum tal chawimawina hmang lo hian kum a liam khat em em a, kum khata vawi 7 tlin chang kan nei hial thin a ni. Mi thahnemngaite inpekna zarah lamtual ruaka inkhawm kan nei ngai meuh lo a ni. Eng pawh ni se, chung zawng zawng thlen theihna chhan chu min hmangaihtu kan Pathian neih chhun, Isua Krista vang a ni a, Ani’n kan duhna leh thahnemngaihna beitham tak te mal min sawmsak thin vang a ni.

United Pentecostal Church; Luangmual Local Kohhran chanchin in chhiar atang hian Lalpan a mite, a thlahthlam ngai lohzia leh kawng engkimah a thawhpui zel thin a ni tih hi in hriat ka duh tak zet a. Tin, chhiartu zawng zawngte, Lalpa leh a Kohhranhote thahnemngai taka hmangaih leh zual turin Lalpan malsawm che u rawh se.