LUANGMUAL BIAL CHANCHIN LEH RECORD-TE

Luangmual bialah hian Pastor hran dah rih lovin, Rev. PR.Dawla District Mission Director-in kumin 1999 chhung chu lo enkawl phawt se tha kan ti.

Bial thar hi Ni 1 April 1999-ah in dang se, Ni 4 April 1999 (Pathianni)-ah bial thar hawnna inkhawm, Luangmual Biak inah District hruaituten neihpui se, bial hruaitute chu Section Board-in remchang hmasaah ruat se tha kan ti’ tiin.

April ni 6, 1999-ah chuan Luangmual Local UPC Biak Inah Luangmual bial thar hruaitu turte chu Form a ni ta a, hetah hian District Superintendent Rev. Chalchhunga chuan telpuiin, bialtu Pastor atana ruat Rev. PR. Dawla’n hun a kaihruai a, Upa JF. Malsawma, Luangmual chuan minute ziah hna thawkin Upa Hrangthantluanga Luangmual, Upa Hrangchungnunga Lunglawn Zaia Veng leh Bro. Hruaikhawma te an kal khawm a ni. Luangmual bial form-na hmasa berah hian bial Secretary/Treasurer atan Upa Thanghrima Luangmual Local thlan a ni a, bial Missions Department, bial Pentecostal Youth Department (PYD), bial Ladies Auxiliary Department (LAD), bial Sunday School Department-te a form nghal a, bial Pentecostal Children Department (PCD) hi January ni 8, 2009-ah kum 2009-2010 hruaitu Form rualin Form tel nghal a ni thung.

Luangmual bial a din tirh atanga tun thleng hian, bialtu Pastor fel leh tha tak tak bial min hmangaih em emtu, Pathianin mi pasarih (7) min pe tawh a, bial hruaitu (Secretary leh Treasurer) bial tana tha leh sung tam tak seng a, bial hmangaihtu eng emaw zat Pathianin min pe hi kan vanneiin kan lawm hle a ni. Tin, kan bial hian kan din tirh atangin bial inenkawlna atan Budget mumal tak leh fel takin kumin (2025) thleng hian kan ruahman a, District lam atanga Sawmapakhat leh Buhfaitham Target kan neih te Local hrang hrangah semin kan phak tawkin kan pe ve thin. Heng bakah hian bial sum dik leh fel taka vawn a, enkawl a nih theih nan kum 1999 atanga kumin thleng hian Treasurer-te Account hi kum tin vawi hnih Audit thin a ni a, kum 2020 atang khan bial inkaihhruaina dan pawh fel fai takin a bu-a siam a ni a, tunah hian hman mek a ni.

Luangmual bial hruaitu lo ni tawh te, Luangmual bial hmalak tawhna hrang hrangte bakah thil chhinchhiah tlak tak tak te lo tarlang ila :

1. HRUAITUTE

Hengte hi bialtu Pastor awm tawh zawng zawngte leh bial OB lo ni tawhte an ni.

Bialtu Pastor-te :

Bial Secretary-te :

Bial Treasurer-te :

2. PASTOR QUARTERS

UPC Luangmual Section Board vawi 1-na UPC Luangmual Local Biak Ina neih rorel 4-na chuan Pastor Quarters hmun hi ngaihtuah ni se tha a ti a, lo ngaihtuahturin Rev. PR. Dawla, Section Pastor, Upa Thanghrima, Secretary/Treasurer, Luangmual Section, Upa Hrangthantluanga, Chairman, Luangmual Local leh Upa JF. Malsawma, Secretary/Treasurer, Luangmual Local te a ruat a, kum 1999 atan Pastor Quarters Target Rs. 7500 siam nghalin Luangmual Rs. 2000, Lunglawn Rs. 1500, Thangte Rs. 1000, Vaisam Rs. 500, Section LAD Rs.1500 bakah Section PYD Rs.1000 ah te a then a ni. Pastor Quarters pual hian rawngbawltuten Rs.100 theuh a hmahruai ni se tih a ni a, heng pawisa te hi Local Target-ah rin nghal an rel bawk.

Kum 2000-ah pawh Pastor Quarters Target hi siam leh a ni a, Local hrang hrangah Rs. 15,000 sem ral a ni. Pastor Quarters lei tur ngaihtuahtuten 2nd Bn. MAP Luangmual ram/In hmun, a dung 16 Metre, a vang 23 Metre Rs. 45,000-a an lei thu an report a, Section Board vawi 2-na, rorel 5-na December ni 3, 1999-a neih chuan a pawmpui a ni. Quarters tur hmuh a nih hnu hian Section Board vawi 3-na January ni 14, 2000-a neih chuan Pastor Quarters hi a dung 36ft, avang 16ft.-a sak ni se tiin a rel a, Building Board a din nghal a, heng mite hi Building Board hmasa berte an ni.

Hemi hnu hian Luangmual Bial Conference vawi 1-na, Rorel No. 1-na chuan, Building Secretary/Treasurer hi kawp lovin Secretary hran neih ni se tiin a rel a. Secretary atan hian Upa LH. Vanlalawia chu a ruat nghal bawk.

Pastor Quarters chu Building Board-te hmalakna leh bial chhunga Local hrang hrangte inpekna avangin sak peih a ni ta a, a luah luh ni atan October ni 6, 2000 ruahman a ni a, October ni 7, 2000-ah a lawmna leh Pathian hnena hlanna neih chhunzawm a ni. He hunah hian bial chhung Local tina rawngbawltute bakah bial huap Department hrang hrang OB te an tel a, tlai lamah chaw ei ho a ni. Pastor Quarters luah luh a nih hnu hian Quarters sakna man ba chu bial chhung Local leh Department hrang hrangah target siamin tuak a ni a, Electric Connection tihna pawh bial chhung Local-te leh Department te-a intuk leh a ni a, kawngkhar siamna man chu bial board member-ten Rs. 50 theuh thawhin an tuak bawk a ni.

Pastor Quarters awmna hmun (tuna Upa LH. Lalrinmawia In bul, LH. Lalnunmawii te awm mekna hi a ni) hian kawngpui a an loh avang leh, Biak in atanga a hlat deuh avangin duh thu a sam lo a, District hruaitute duh thu pawh a sam zan loh avangin, hmun dang ngaihtuah ni se tiin Section Board vawi 35-na, June ni 11, 2005-a neih chuan a rel a. A hmun leh hma te lo thlithlai turin Rev. C. Zohmingliana, Rev. Lianhranga leh Upa R. Lalrumliana te a ruat nghal bawk. Section Board chuan PWD Chowkidar Quarters hmun Pastor Quarters atana dil hi chak zawka bawhzui an rel angin, chak taka bawhzuiin Mizoram Chief Minister leh Minister dangte hmu turin bialtu Pastor Rev. C. Zohmingliana chu Aizawlah vawi 3 ngawt a kal a, an kalna tur hian bial Department hrang hrangte bakah, Local hrang hrangah target siam hial a ni. Nasa taka bawhzui a nih hnuin Ni 9.11.2009 (Monday)-ah bialtu MLA, Pu S. Laldingliana chu amah ngei Luangmualah lo kalin, khawtlang hruaitu VC leh YMA hriatpuinain tuna kan Pastor Quarters hmun hi min pe fel ta a ni.

Pastor Quarters thar neih a nih takah chuan sa turin bul tan chhoh nghal a ni a, November ni 18, 2009 khan bialtu Pastor Rev.C.Zohmingliana chuan lungphum a phum a, hemi ni hian Quarters sak hna hi bial huapin hnatlanga chhunzawm a ni. Pastor Quarters sak nan hian District atangin Rs. 2,15,000 bakah a chung siamna dawn a ni. Pastor Quarters sa tur hian bial Board chuan Building Board din lovin, bialtu Pastor Rev. C. Zohmingliana chu Manager atan a ruat a, bial Secretary Upa H. Rohmingliana chu lo tawiawm tura ruat a ni bawk. Anni hmalaknain Pastor Quarters chu chak taka sak a ni a, sum neih sa a zawh hnu hian Rs. 1,00,00 sum awm remchang apiang puk a ni a, he sum hi bial Department hrang hrang leh Local hrang hrangte hnenah Target pe-in rulhtir an ni. Pastor Quarters sak nan hian bial sum Rs. 3,00,000 hman ral a ni. Bialtu Pastor Rev. C. Zohmingliana’n bial a chhuahsan kum, 2010 April thlaah chuan luah theiha peih hman a ni a, April ni 23, 2010 khan District Superintendent Rev. R. Lalrosanga chuan hawngin Pathian hnenah a hlan a ni. Bialtu Pastor thar Rev. C. Hmingthanfala’n Ni 28.4.2010-a Luangmual a lo luh hian Quarters thar hi a luah nghal a ni.

Pastor thar hnuaiah hian hmalak chhunzawm zel a ni a, la peih fel loh lai thenkhatte chhunzawm zel niin, Luangmual bial Kohhranpui rorelna pawhin a ngai pawimawh hle. Kum 2011 atangin Pastor Quarters target hi intuk thar leh a ni a, kum 2023 thleng khan Pastor Quarters changtlun theihna tur hian Local hrang hrangin an Target-te tha takin an pe thin a ni. Kum 2011 atanga Pastor Quarters Budget ruhman zat lo tarlang ila:

Heng sum lo lut atang hian Pastor Quarters-a thawh tur tul pawimawh ang ang te siam chhunzawm zel a ni a, Pastor Quarters hnuaia mikhual Room siam hi ni 29.6.2012 khan bial board vawi 78-na chuan a remti a, District-ah a siamna tur dil niin Rs. 15,000 hmuh a ni. District atanga sum hmuh leh Quarters Target tangkawpin Pastor Quarters hnuai, mikhual Room chu a bangah Brick hmangin tha taka siam a ni.

Kum 2015-a Luangmual bial Conference vawi 16-na, Luangmual Local Biak Ina neih chuan Pastor Quarters Extend ni se a ti a, Budget atan Rs. 35, 000 a ruahman a, Local hrang hrangah a sem nghal bawk. Tin, sum ruahman hian Extend-na tur a daih dawn loh avangin Appeal-a tuak belh a ni a, District Board vawi 187-na, kum 2016 December-a neih chuan Pastor Quarters Extend nan hian Rs. 1,50,000 min pe bawk. Heng sum tlingkhawm hmang hian Pastor Quarters chu Extend a ni a, a hma aia zau leh nuam a lo ni leh ta a ni.

Pastor Quarters hmasa leh a hnuhnung sak a nih chhung hian bial chhunga Local hrang hrang Kohhan member-ten thahnemngai takin an tha leh zung, sum leh pai an seng nasa em em a, Luangmual bial members te thawh hona avang liau liauin, Pastor Quarters tha tak kan nei thei hi a lawmawm hle a ni. Tin, a sak mai duh tawk lovin bial chhunga Department leh Local hrang hrang atangin leh, Local Department atangte pawhin Pastor Quarters-a hman tur thil tangkai tak tak, kum tinin kan la dah reng te hi a va lawmawm em. Ni 18.7.2008 khan Luangmual bial kohhranpui leh LAD tangrual chuan, Pastor Quarters-ah hian Inverter Rs. 16000 man an dah a ni. Kan tanrualna avangin Pastor Quarters chhung nuam leh changtlung tak kan neih phah a ni.

3. SECTION CONFERENCE NEIHNA HMUN HRANG HRANG

Kum 1999-a Luangmual Section a lo pian hnu khan kum 2000 atangin bial Conference hi neih nghal a ni a, Conference Report bu hi kum 2014 atangin siam a ni a, tun thlengin chhunzawm zel a la ni.

Hengte hi bial Conference neih tawhna hrang hrangte a ni:

• Section Conference vawi 1-na hi Luangmual Local-ah Dt.3-6.2.2000-ah neih a ni.
• Section Conference vawi 25-na hi Luangmual Local-ah Dt.9-11.2.2024-ah neih a ni.

4. VAISAM FIELD

Luangmual bial Conference vawi 10-na, Lunglawn Zaia Veng Local-a Ni 14 February 2009-a neih Rorel No. 1-na chuan, bial chhungah Evangelist rawih ve ni se, a awmna tur atan Vaisam ruatin a bial atan Chithar, Thangpui leh bial thut hmun Vaisam khua ni se tiin a rel a, kum khat chhung atan rawih phawt ni se, a rawihna tur sum hi Local tin Biak Inah appeal-a tuak ni se tha tih a ni.

Vaisam hmuna thawk tur hi April ni 25, 2009 khan Luangmual Local UPC Biak Inah Section Board vawi 59-na rorel 2-na chuan mi 3 interview atangin Bro.T. Zahmingliana Luangmual Local chu a la a, a thawh tan hun atan May ni 1, 2009 a ruahman bawk.

Vaisam Evangelist hi Luangmual bial Kohhranpuiin a chhawr reng theih loh avangin, kum khat hnu, 2010-ah District Mission Department chuan Home Missions Field-ah puangin thawktu chhawr lai hi a chhawr chhunzawm leh ta a, a hlawh erawh District Kohhranpuiin a tum thung a ni.

Tichuan, 2011 kum tir lam vek hian Vaisam Field-thawktu atan Evan. L. Hmingsanga, Rangte chu lak leh a ni a, Quarters hmasa a chhiat avangin Quarters hmun atan Pu Vanhnuaialha In hmun chu District Mission Department hian Rs. 10,000/- in a lei a. Tichuan In hi Quarters atan hman nghal a ni. Kum 2013-ah Evan. Muanpuia Colney chu Vaisam-ah hian chhawrin a awm leh a, ani awm lai hian Evangelist Quarters thar chu sak that a ni a, a sakna tur sum hi bial chhung Local hrang hrangah Appeal-in tuak a ni a, bial mipuite leh Vaisam Local-te thawhrimna avangin Vaisam Evangelist Quarters tha tak kan nei a, tun thleng hian Home Missionary-te chen nan hman a ni.

Vaisam hmuna Missionary-a thawk tawhte :

Vaisama Missionary-a awm tawh te reng reng hian, Vaisam Kohhran an hmangaihin thahnemngai takin hna an thawk thin a, Luangmual bial pawhin an chungah hian lawmthu kan sawi tak meuh meuh a, an thawhrimna avangin bial pawhin nasa takin hma kan sawn a ni.

6. RAWNGBAWLNA & LUANCHHUAHNA

Luangmual bial a din tirh atang hian, hmasawnna kawng hrang hrang zawh chhoh a nih theih nan hmalakna hrang hrang neih a ni a, bial chhung leh pawnah pawh rawngbawlna hrang hrang neih niin, a din tirh atanga tun thlengin bial chhungah Financial Campaign neiin hun hman a ni deuh reng a, bial huap Seminar, bial huap Crusade bakah luan chhuahna kawng hrang hrangin neih a ni a, a langsar zualte minute leh Record bu a lang atangin lo tarlang ila:

1. April ni 13, 2002-ah bial chhunga rawngbawltute bakah, bial leh Local-a Department OB te tan Luangmual Local-ah Seminar buatsaih a ni a, Resource Person atan District Superintendent hman a ni.
2. Dt.17-25.6.2006 chhungin Luangmual bial hmalaknain bial huap Crusade, Lunglawn Zaia veng Biak Inah neih a ni a, Speaker atan Sist. Mary Lalnunsangi, Sesawng chu hman niin, chhun inkhawm loh hunah Evan. F. Khualluta Inah tihdam rawngbawlna neih thin a ni a, damlo tam takin damna an chang a ni.
3. Luangmual bial hmalakna hian Crusade Ni 26.7-16.8.2007 chhung hian Vaisam hmunah neih a ni a, Speaker atan Sist. Vanlalrawni hman a ni. Crusade hmanga rawngbawlna hi a tla tha hle mai a, BCM upate hian Isua hminga thu sawi tawh lo turin Speaker hi an ti a, haw turin an vau a, a la chhunzawm zel chuan thisen a chhuak lo ang tih kan sawi thei lo tiin an vau a, hemi tum hian mi 4-in Isua hmingin Baptisma an chang a ni. (BCM – 1, Presbyterian – 1, Salvation Army – 2)
4. Kum 2007 October thla khan NEI huapin rammut beihpui thlak a ni a, hetah hian Luangmual bial chhunga Vaisam leh Thangte-ah pawh bial hmalaknain rammut hi neih a ni a, hetah hian Thangte-ah Rev. C. Zohmingliana, Upa Hrangthantluanga Luangmual leh Bro. Darthuama Luangmual te an kal a, Vaisamah hian Bro. LH. Lalrinmawia Luangmual, Upa Hrangchungnunga Lunglawn Zaia veng leh Upa Lalhmangaiha Lunglawn te an kal a, thahnemngai takin rawng an bawl a ni.
5. Kum 2009 khan Christian Education Centre (CEC) School tanpui nan Luangmual bial hian Rs. 500 pek a ni.
6. Kum 2010 khan Luangmual bial hian General Headquarters Office sak tanpui nan Rs. 12,000 a pe.
7. Kum 2011 khan bial leh Local hrang hranga sum enkawltuten tangkai taka an hman turin Account vawn dan Booklet siam a ni a, hei hi Upa Lalrochhara Sailo Luangmual chuan a buatsaih a ni.
8. Luangmual bial hian kum 2012 khan Orphanage naupang 2 Sponsor nan Rs. 3500 pek a ni a, kum 2014 khan ASC Home tan Rs. 8500 a pe bawk.
9. Ni 24-26.5.2013 khan Sertlangpui-ah bial 3 infin Revival neih a ni a, Luangmual bial atangin member thahnem tak kan kal ve a ni.
10. Kum 2017 khan Vaisama Bro. C. Lalfakzuala In kang tanpui nan bial hmingin Rs. 2000 pek a ni.
11. Kum 2017 vek hian bial PYD Zaipawlte tanpui nan Rs. 2000 pek a ni.
12. Ni 29.5.2017 khan Chithar ah bial hmalaknain Crusade neih a ni a, Speaker atan bialtu Pastor Rev. B. Kamliana chu hman a ni.
13. Bial chhunga awm Vaisam Local-te Biak In sak tanpui nan May ni 6, 2018 khan Luangmual Local, Lunglawn Zaia veng Local leh Thangte Local-ah te Appeal neihsak a ni.
14. Kan bial chhung a mi Pastor atana lak T. Zahmingliana Luangmual chu August ni 29, 2018 khan bialin lawmpui nan Citation mawi tak a hlan.
15. Luangmual bial hmalakna hian April ni 3, 2019 atanga tanin Sethlun Local-ah Evan. F. Lalsanglura Speaker ah hmangin Crusade neih a ni.
16. April ni 11, 2021 khan Thangte Local-ah bial chhunga Upa leh Rawngbawltute pualin Seminar neih a ni a, thupuiah ‘Hruaitute mawhphurhna’ tih chu hman a ni a, Resource Person atan bialtu Pastor Rev. Lalbiakdika Chawhte hman a ni.
17. Kum 2021 khan raltlante tanpuina pek ve nise tiin bialin a rel bawhzuiin Local hrang hrangah tanpuina tur hi khawn a ni a, hetah hian hengte hi hmuh a ni a, tanpuina atan hian bial hmingin pek a ni:
    • Naupang thawmhnaw bag 6
    • Puitling thawmhnaw bag 7
    • Puanthuah (Mutbu) bag 2
    • Bungbel bag 1
    • Buhfai bag 50, Dal leh a dangte
    • Pawisa Rs.8300
18. Kum 2021 khan bial Missions Department-in Thangpuiah rawngbawlna a neih mek support nan bial chuan Rs. 2000 a pe.