UPC HNAHTHIAL VENGLAI LOCAL

Hnahthial hi Mizoram chhim chhak lama awm, National Highway 54-in a paltlang khua a ni a. Venglai Local hi Hnahthial khaw laili chhuah lam, hmun rem taka awm a ni. Hnahthial Venglai Local hi a hma chuan Hnahthial Tarpho Local tih a ni thin a. Kum 2008-a Mizoram sorkar thu chhuak anga Hnahthial Veng hming hrang hrang thlak a lo nih takah chuan, Tarpho Veng chu Venglai ti-a thlak a ni a. Ni 2.11.2008-a Local Church Board Committee chuan Local hming pawh hi thlak ve ni se. Hnahthial Venglai Local tih ni se tiin he hming hi a lo pu ta a ni.

KOHHRAN DIN TUR A HMALAK DAN:

Kum 1952 September thla khan Rev. Saihnuna (L) leh Rev. Lalbiakthanga (L) ten Tarpho khuaah rawngbawlna an nei a. An rawngbawlna a tla thain Pathianin mal a sawm hle mai a. Ni 30 September, 1952-ah Tarphoah chuan UPC Kohhran an din ta a. Chhim bialah chuan UPC dinna hmasa ber a lo ni ta nghe nghe a ni. Hun a lo kal zel a, kum 1966 khan Mizoram chu ram buaiah puan a lo ni ta a. Khaw hrang hrang te chu sâwi khâwm an ni a. Tarpho pawh Hnahthialah sâwi khâwm niin Ni 7.2.1967-ah Hnahthialah an chhuk ta a. Sipai awpna hnuaiah an awm avangin, inpawl hona leh programme engmah an nei mumal thei ta lo va. Mahse khawtlang hruaitute leh mi thahnemngaite azarah, Kohhranho te pawhin zalenna an hmu chho hret hret a. Pastor Ralianga hovin inkhawmna leh rawngbawlna hrang hrang an nei ve ta zel a. Biak in te sa a, Kohhran te mumal zawka kal duhna leh beiseina lian tak neiin, hma an la chho tan ta a. Khawtlang hruaitute leh thuneitute hnenah Biak in hmun turte dilin phur takin hma an la chho ta a ni.

KOHHRAN DIN CHHOH DAN :

Biak in hmun atana duh taka an dil, tuna Hnahthial Venglai Baptist Biak in hmun hi Citizen Committee chuan a pe a. Ni 7 May 1967-ah Biak in sak tan a ni a. Ban pali (4) an phun hman a. Mahse mi thenkhatin an rawn tihbuai avangin hmun dang an dap leh ta a. Tuna Biak in hmunah hian June 1967-ah an sa leh ta a. Lungrual tak leh tluang taka sain rei lote-ah an nei thei ta a. Biak in chung hi sipaiin an tumsak a ni. Ni 15 August 1967-ah Rev. Tebawnga, District Pastor thawk lai chuan a hawng ta a ni. Heta tang hian Hnahthial Tarpho Local tiin din chhoh a lo ni ta a. A tirah chuan Tarpho leh Khawhri khua UPC te an lawi deuh ber a ni. A tirah Hnahthial Tarpho Local tih nimahse; tunah chuan Hnahthial Venglai Local tia hming a put tawh avangin, hetiang hian kan sawi chhunzawm tawh ang.

Kohhran din tirh chhoh lai hian ram an la nasa hle mai a. An ram lakna hmanrua tha ber chu Debate a ni. Vawi khat chu Hnahthial Leite Venga khawhar in pakhatah, Rev. Ralianga leh Baptist Pastor pakhat chuan Debate an nei a. Kar khat dawn lai an debate a ni awm e. Chung an debate-ah chuan Pathian zarah hnehna changin Kohhranmember pawh nasa takin an pung ta a. Ni sawm chhung zet chu ni tin chawl miah lovin, Baptisma chang an awm chho reng a. Sipai hotute leh A.O Office lamah Kohhran Upa te leh Curfew Pass (Baptisma chan nan) dilin an buai thin hle a ni. Hemi tum hian mi 110 velin Isua hmingin Baptisma an chang ta nghe nghe a ni. Kohhran ding tir chu a thang duang hle mai a. Hnahthial khaw chhungah Biak in pakhat chauh a la awm bawk a. Chhim biala Local pakhata lawiah chuan kha tih hun lai atanah chuan an tam ber hial awm e.

KOHHRAN HRUAITU LO NI TAWH TE :

Kohhran hruaitu lo ni tawhte hi record kan lo neih that vak loh avangin, hun hmasa lam a mi tarlan theih kan nei meuh lo va. Kohhran din tirh laia hruaitu pawimawh te pawh, an nihna nena tarlanna kan hmuh chiah loh avangin, a langsar zual kan hriat theih te chu Rev. Ralianga, Mizoram Evangelist hmasa te zing a mi, Kohhran dang hmaa tlawm ngai lo, Evan. Sainghinglova (L), Upa Khualinga (L), Upa Zatawna (L) leh Upa Bawra (L) te an ni.

BIAK IN SAK CHHOH DAN :

Kohhran din tirh June, 1967-a Biak in sak chu a hmasa ber niin, Kohhranhote inpekna leh lungrualna avangin hun rei lote chhungin sak zawh a ni a. Thu hmasa lama sawi tawh ang khan a chung hi sipaiin an tumsak nghe nghe a ni. Ni 15 August 1967-ah Rev. Tebawnga, hetih laia Lunglei District Pastor chuan a hawng a ni.

KOHHRAN A THIL THLENG LANGSAR ZUALTE:

Kohhran hmalakna leh chetvelna ah thil thleng pawimawh leh chhinchhiah tur tamtak a awm thei ang a. Mahse a langsar zual tlem ka han tarlang ang e.

Kohhran ding tan tir chhovah Thlarau Thianghlim hnathawh ropui tak tak sawi tur a la tam hle a. Kum 1973 Krismas chu Kohhran Committee-in ruahmanna a siam ang a, hlim taka hman a nih hnuah hlimna kal zel chhawm nun nan, mimal chawimawina te a lo lut tan a. Upa Dengbawia chuan vawkin a chawimawi a, an hlim hle mai. Thlarau ram atanga hmutu pakhat chuan ‘Evan. Sainghinglova’n bawnga a chawimawi a ngai’ a ti ve leh a. Ani pawh chuan bawngin a chawimawi ve leh mai a. Thlarau Thianghlim hnathawh a so san zel avangin kumthar 1974 chhovah pawh, mimal leh Kohhran chawimawina a indawt chho ta zel mai a. He hlimna kal chhovah hian ruai vawi 13 vel theh a ni.

He hlimna hian Hnahthial khawpui chhung hi a nghawr tak meuh meuh a. Hlimna chhimtu pawh an tamin ennawma thlirtu pawh tam tak an awm a. Lo pawh vat lawk thei lovin an awm a. Thenkhat phei chuan ‘tam hruai’ ti te pawhin an lo chhalsak hial a ni. He hlimna hian mi thar seng luh leh Baptisma rawngbawlna lam chu a hring chhuak vak lo nain, Thlarau lama intuh nghehna leh insawh nghehna a keng tha hle nia hriat a ni a. Thlarau Baptisma chang thar, Kohhran enkawlna atana ban pawimawh tak tak an chhuak nual a. Tun thlenga Kohhran enkawltu pawimawh tak tak te hi, he hlimnain a hrin chhuah te hi an ni nawk a ni.