HNAHTHIAL ELECTRIC KOHHRAN

Hnahthial Electric Kohhran hi Hnahthial hmar lam venga awm a ni a. Tun hma chuan Tarpho Local, Hnahthialah an lawi thin. An tan fur khua leh thlasik khuaah te inkhawmna a hlat leh hreawm thin em avangin, inkhawm hran mai chu an tum ve ta a. Tichuan dilna lehkha siamin Tarpho (H) Church Board-ah an theh lut ta a ni.

Chutih laia Bialtu Pastor Rev. Zalawma hovin, Ni 17 January, 1980 zanah an ngaihtuah ta a. In dan chu phalsak an ni ta a ni. Tichuan Ni 21 January 1980 zanah Tirhkoh K. Bawithanga inah, Committee member 6 kal khawmin Bialtu Pastor Rev. Zalawma’n Hnahthial Electric Kohhran chu a form ta a ni.

Chutih laia Rawngbawltute chu :

1. Pu Aichhinga 2. Evan K. Bawithanga 3. Pu Chhanpiala 4. Pu C. Bawithanga te an ni. Kohhran form-na hmasa berah hian form an ni. Upa atana ruatte : 1. Upa Chhanpiala 2. Upa Aichhinga Church Board OB tur te ruat nghal an ni bawk.

Section Board member turah Upa Aichhinga thlan a ni. Kohhran din tan tirh lai hi an member tlem ber lai a ni a. Member 40-in bul an tan a ni. An in dan hnuah Electric Kohhrana Baptisma chang hmasa ber te chu Pi Sawihnuni leh a thiante an ni.

Kohhran din tirha thil pawimawh deuhte :

Kum 1980 Kohhran ding tir te an ni a. An hlimin an phur tlang hle a ni. Pawl a lo din chuan mamawh leh tul a lo tam avangin rim takin an thawk a. Biak in sak an tan nghal a, an thawk nasa hle a ni. Kohhran ni pawimawh leh kutpuiah te programme siamin hlim takin an hmang thin a ni.

Pentecost Day Hmasa ber Upa Aichhinga te inah zaikhawm a ni a. Bro. C. Bawithanga Zaikhawmna Chairman a ni.

Beirual hun hmasa ber Zantin inkhawmna hun neih a ni a. Mi thar ho te duhsak a hun siamsak an ni.

BIAK IN DIN CHHOH DAN:

Tarpho Local atanga kan in dan tirh hian Biak in hi Maurapin 1980, May thla khan sak zawh a ni a. Bialtu Pastor Rev. Zalawma’n a hawng. Hei hi kum 10 zen zawn luah a nih hnuin sak that duhna a lo awm ta a. Tichuan Ni 6.2.1992 Dar 11:15AM-ah hetih hun laia Bialtu Pastor Rev. C. Darkhuma hovin, Biak in thar tur lung an phum a ni. Biak in chung tur rangva lei nan District atangin Rs. 6,000 puk a ni a. Tukverh darthlalang te pawh tlawmngaia tum tur inruat a niin, Ventilation frame leh pulpit te pawh mimal leh department ten thawhkhawm zelin 1992, September thlaah khawr pum a ni a. Ni 18.9.1992 zanah Bialtu Pastor-in Pathian hnena hlanna neiin, Ni 20.9.1992, Sunday zingah Kohhran member-te nen ropui takin Biak in thar hi luah luh a ni a. Ni 29.11.1997, Inrinniah Rev. Zalawma’n ropui takin a hawng ta a ni. Biak in sak nan hian Rs. 63,261 vel sen ral a ni.

Hun a lo kal zel a. Khawvel changkang zelah Biak in thar duhna a lo piang leh ta a. Kohhran a fahrahin member tlem te kan ni a. Biak in sak kan rel tan tirh hian, sum leh pai lamah pawh kan rethei hle mai a. Kum 2014 kum tir lamah Building Committee din niin Biak in sak that hna hi a theih ang anga tan nghal a ni a. Cheng 40,000 vel bawr chauh Building Committee hian kan nei a ni. Biak in hlui hi thiat kher lovin, luah chungin a theih ang anga sak chhoh zel a ni a. Bank loan Rs. 4,00,000 puk niin District atangin a chung khuhna tur Rs. 2,00,000 kan dawng a. Tin, sum mamawhna a nasat em avangin loh theih lohin kan Biak in hmun ram te pawh hralh then a ni.

Kum 2 zet chu Biak in hlui hi thiat lova sak pah zel a nih hnuin, loh theih loha thiah a lo tul ta a. Biak in sak chhung zawng deuh thaw, chu Sis. Zochhawni in hnuaiah inkhawm niin, ani hian luah man chawi miah lovin min luahtir a, a chungah Kohhranhote kan lawm hle a ni. Sis. Zochhawni in hnuaia kan inkhawm hma hian, hun rei tak chu Church Board Chairman, Upa C. Chhunhranga te inah inkhawm a ni tawh bawk a ni.

Kohhranhote kan inlungrual em em a, Biak in sak kawngah pawh pheikhai rual takin mimal leh pawl/department angin tha kan thawh ho thin a ni. Tunah hian Biak in hi sak pum ni tawhin luah leh mek a ni tawh a. Hun remchang hmasa bera hawnna neih turin chei chhoh pah mek zel a ni.

Department din kum:

• 1. Sunday School Department hi Ni 21.1.1980-ah Kohhran form rualin din ve nghal a ni a. Ni 24.1.1980 zanah zirtirtu turte pawh ruat an ni.
• 2. Missions Department hi Ni 21.1.1980-ah Kohhran form ruala din ve nghal a ni a.
• 3. LAD : Ni 11.2.1980-ah Church Board-ah din an dil a. An dilna te chu ngaihtuah a nih hnuah thutlukna siam mai thei lovin, Ni 16.2.1980 Sunday inkhawm banah nuhote rawn tha lehin din a ni ta a ni.
• 4. PYD te hi Ni 23.2.1981-ah din tan a ni.