KOHHRAN DIN TURA HMALAK A NIH DAN/KOHHRAN DIN A NIH DAN :

Kum 1947 khan Lunglawn khuaah Harhna (hlimna) nasa tak a lo thleng a, chuta hlim sang zual deuhte chu zaikhawmna in atangin an hnawt chhuak a. An zinga hruaitu deuhte chu, Pu Bualzika, Pu Lalkhuma, Pi Thangpuii te an ni. Kum 10 dawn chu khawhar leh hrilh hai takin an awm a, chutih lai chuan Pathian thlarau pawlna changin an nun chhungril chu a hlim viau thin tho bawk.

Kum 1955-ah Thuhriltu Upa Lalthianghlima Mualcheng North a mi chu, Pathian thu hrilin Lunglawn khua-ah hian a kal a, anniho chu Upa Lalthianghlima ho chuan Pu Bualzika inah an inkhawm hrang ta a; Kum 1956 kum tirah chuan Pastor Lalthima, Chawngtui khuain anni ho chu a rawn tlawh ve leh a, hemi tuma rawngbawlnaah hian mi 30 laiin Lalpa Isua Krista hmingin Baptisma an lo chang ta a ni. Pu Lalkhuma chu Baptisma chang hmasa ber a ni nghe nghe. Heta tang hian Kohhran chu a lo indin chho ta a ni.

Lunglawn U.P.C. Kohhrana mi hmasate :

Kum 1956 Kum tir lama Kohhran lo ding hi ‘Lunglawn U.P.C. Kohhran’ tia a hming vuah a ni. (‘Heng hun lai hian Ramthar Veng leh Salem Veng hi la awm lovin, tun hnua Lunglawn khua atanga lo in dang chhuak ve chauh an ni tih hria ila’). He Kohhran lo ding tharah hian Upa leh Rawngbawltute hetiang hian an inruat a. Upa pahnih leh Rawngbawltu panga an ni.

• Chairman : Upa Lalkhuma
• Secretary : Upa Kamliana
• Rbt. Pa Sina
• Rbt. Laipawnga
• Rbt. Thangpuii
• Rbt. Rualkhumi
• Rbt. Laizawni.

Hetia Kohhran din a nih hnu rei vak lovah hian, Pastor Lalthima chuan tlawh lehin Kohhran Member 70 (Sawm sarih) lai an lo ni ta a ni. Hemi hnuah hian Kohhran hi tluang takin a kal chho zel a ni.

‘Kohhran din, hun leh ni chiah hi ziaka chhinchhiah hmuh mai tur a awm loh avangin, chiang taka tarlan a har hle mai. Mi hmasa dam lai kan biakte pawhin, an hriat dan inang lo deuh a awm nual mai! Lunglawn khuaah hian Biak In din hma pawhin, Kohhranhote hi fel taka inenkawlna neiin an lo awm tawh ni ngeia rin theihin, Lunglawn Lal hnuhnung ber Fanu, Pi Hmingi chuan heti hian asawi a, “Tuna Radio Station kawtah hian (Pu Vula te leh PHE Water Tanky inkar a sawina), Drama Hall hlui tawh a awm a, chumi chu phiat faiin Sunday School te kan kai a, kei pawhin ka zirtir thin. Ka pa (Lunglawn Lal hnunghnung ber) pawh kha U.P.C. a ni a, a thlan lunga U.P.C. tih ziah a duh thu leh, Thlan khawihtute chhungkaw bil kan nih loh avangin kan ziak thei ta lo,” tiin lungleng takin, kum 2016 kum tir lama Kohhran aiawha amah kawmtute chu min hrilh a ni. (Kan Local Church Diamond Jubilee Souvenir-a telh tur thu la khawmtute chuan, Pi Hmingi hi hmai chhanah ngei kan kawm a, a sawi laiin a thusawite hi ziakin kan lo chhinchhiah a ni).- Evan MS Dawngliana Hnamte.

Ramthar U.P.C. Mel khat :

Kum 1983ah chuan Lunglawn atangin Ramthar Veng chu, Village Council hran neiin a lo awm ta a. Hetih hun laia Biak In awmna pawh chu Ramthar Village Council Area-a lo nih tak avangin, ‘Lunglawn U.P.C. Kohhran’ tih zel chu a lo rem ta lo va. Ni 14.9.1986 (Sun) Church Board Committee chuan, ‘Ramthar U.P.C. Mel khat’ tiin thlak a lo thlak ta a ni. Kohhran member hi heng hun lai hian mi 100 (za) pawh tling mang lo an la ni. ‘Ramthar Local’ ti pawhin sawi leh koh a ni bawk thin.

Ramthar A.O.C. Local :

Hun a lo kal zel a, Ramthar Veng chhungah, U.P.C. Kohhran (Local Church) Biak In pahnih a lo awm tak avangin, lehkha kal vel a buai loh nan leh hriat hran kan lo awlsam zawk nan tiin, Church Board Committee chuan hming dang invuah leh thain a hria a. Ni 14.7.2002-ah chuan, ‘U.P.C. Ramthar A.O.C. Local’ tiin hming a lo puttir leh ta a ni. Hetiang hi nimahsela, koh, sawi leh ziah a remchan zawk avangin ‘Ramthar A.O.C. Local’ tiin kan sawiin, kan ziak tam zawk mah a, tun thleng hian he hming hi kan pu chho ta zel a ni.

BIAK IN HMUN HMA LEH SAK A NIH DAN :

Biak In sak vawi khatna :

Kum 1956-a Kohhran dina hma lak chhoh a nih khan, Biak In sak ve nghal niin Thingtuai ban, Di in chung chihin, a bang dapa sak a ni a. Biak In dung sei zawng 18 ft a ni. A sakna hmun hi Lunglawn Thakthing Veng tlangah hian a ni a, tun thleng hian a veng hming hi thlak la ni lovin, kohna berah an la hmang reng bawk a ni. Hemi laia Kohhran member-te zinga hnatlang tam deuh hming kan la hriat theih chu Pu Zataia, Pu Sangsela, Pu Vaihuaia, Pu Saitawna, Pu Kamlala, Pi Parmawii, Pi Dartawti te an ni.

Biak In sak vawi hnihna :

Biak In sak hmasak berna hmun hi kum 20 (sawmhnih) vel lai, a in ngai hman a nih hnuin, Biak In hmun ngai reng hmang thei kan ni ta lo va, ‘Hemi Biak In hmun chungchang thu-ah hian sawi dan leh hriat dan inang lo deuh a awm nawk mai. Pakhatna-ah chuan : ‘Pu Sawithanga ramah kan sa hawh a, ani’n, ‘insawn tawh rawh u’ a tih vangin kan insawn ta a ni’ tih leh, Pahnihna-ah chuan, ‘Ngaih tha taka hun kan hman laiin, kan Biak In hmun chu tute’n emaw Pass an lo insiam a, Kohhranhoten an hriat chhuah meuh chuan, khua a lo tlai ta reng mai a, Kohhranhote lungchhiain an hrilhhai hle a ni” tiin. A pahnihna hi Kohhranin thu inhlan chhawn zel leh ziaka kan dah awm lai mek a ni’. Biak In hmun tur thar ngaihtuah leh a ni a. Revenue-ah dil niin Assam Rifle ram (Camp) hnuaiah 6500Sq.Ft. laia zau chu, Ni 23.5.1975-ah hmuh a ni a. Kohhranhote an lawm hle a, nimahsela hemi hmun hi Biak In sakna remchang lo nia ngaiin, Pu Thlangtawna ram (tuna Biak In dinna) nen inthleng a ni ta ni. Hemi hmunah hian Kum 1975 kum tawp lamah Biak In pahnihna tur chu sak a lo ni leh ta a ni. A dung 18ft, a vang 14ft, thingzai, Tile leh Rangva Ina sak a ni.

Biak In hi sa thar lovin Kum 1984 April thlaah, a kawt lamah 6ft-in a dung zawngin pun a ni thung a ni.

Biak In sak vawi thumna :

Kohhran Member-te an lo pung ve zel a, Biak In pawh chu sak that leh mai a lo ngai ta a ni. Kum 1986 Church Board Committee hmasa chuan, Biak In sak that a lo rel leh ta a, hemi tum hian Church Board member-te’n, a ban tur Thingzai Inchi nga bial (Pas Pas) pakhat theuh tumin ,phun duh huna phun theih nghal mai tura peih fel saa dah ni se tiin an rel nghe nghe a ni. Biak In dinglai chu thiat lova zawi zawia sak hnan chhoh zel a ni a. Kum 1990 kumah sak zawh a lo ni leh ta a ni.

Hemi hun lai hian Biak In sakna turin thingzai hnatlang te neih thin a ni.

Biak In sak vawi li-na :

Kum 1998 a lo her chhuah leh meuh chuan, Biak In sak thar ngai a lo ni leh ta a. Ni 28.6.1998 Church Board rorelna chuan hemi atang hian, Biak In sak hnatlang ko leh tanin Inrinni tin, Kohhranpui hnatlang a puang leh ta a ni. Theih ang anga hmalak chhoh zel niin, Ni 26.1.1999 Church Board rorel 6-na chuan, Building sum Rs. 2,030/- chiah a awm thu a tar lang nghe nghe. Ni 11.9.1999-ah chuan Biak In luah lai chu thiah a ni ta a, hemi chhung thla hnihah hian Evan. Ropianga te inah, Kohhranhote chu inkhawm thin a ni. Biak In chu luah luh theih a nih ve leh, kum 1999 November thla chuan luah luh leh niin, Ni 30.2.2002 (Inrinni)-ah Rev. Zalawma, District Superintendent chuan a hawng ta a ni.

Ni 14.7.2002 a lo her chhuah leh meuh chuan, Biak Inah chuan Kohhranhote an leng lo leh ta deuh mai a. Hemi nia Church Board Committee chuan Biak In sak belh (extend) ni se tiin a rel leh ta der mai a ni. Ni 6.10.2002 Church Board Rorel No. 1 chuan, sum neih ang anga hna tan ni se tia a lo rel angin thawh tan nghal a ni. Pathian zarah leh Kohhranhote thawhrimna avangin rei lo teah sak zawh a ni.

Biak In sak vawi nga-na :

Kum 2005-ah chuan Biak In thar sa tura ruahman a lo ni leh ta a, Sum leh pai neihsa nei lova bul tan thin a nih avangin, Plan mumal tak a awm thei lo va, ruahmanna fel neih a har hle thin. Hemi tuma Biak In sak hna pawh hi a tir te-ah chuan, RCC-in Biak In hnung lam hi lo ruahman tan ila tiin thawh chhoh deuh bawrh bawrh mai a ni, han thawh kal zel takah chuan Biak In sak pum law law duhin, a chawp zelin sak chhoh a ruahman zel a ni.

Kum 2009-ah chuan Biak In chu luah luh theiha sak pum a lo ni ta a. Biak In luah lai chu thiah niin (Biak In hi thiat lo va sak hnan a ni), kum tawp lamah chuan thiah fel a ni. Tichuan, Biak In sak thar mek chu Kum 2010, January thlaah luah luh a ni ta a ni. Luah reng chungin tul leh pawimawhte hnathawh chhoh zel a ni a, Biak In chhung lama tul pawimawh hmasa leh bungrua leh a chei mawi tul apiang te tih chhoh zel a ni. Ni 28.12.2016-ah khan Diamond Jubilee lawmna Programme nen, Biak In hawn chu a ruala hman nghal a ni. He Biak In hi tun thlenga luah niin a dung - 58 ft, a vang - 30 ft, a chhawng -Chhawng thum. (Hmun awih a nih avangin Biak In pum ni lovin, a zahve chin hnuai lamah a chhawng a, a hnuai ber hi Choka atan hman a ni a, a chung chiah hi Sunday School Hall atan hman a ni thung.) Gallery – 18ft. x30ft. Biak In chhungah hian mi 300 -350 leng nuam tawk tura ruahman a ni.

Sawi belhna :

Tuna Biak In hmun hi a tirah chuan a te hle mai a. 20 ft. X 24 ft sakna tur pawh a leng tha mang lo va, chuvang chuan hmun hma zauh a nih theih nan, kawng hrang hrangin tan lak a ni. A hmasa atan Kum ? ah Biak In hnung lam, Pu Saihnawla ram chu Rs. 10,000/- (sing khat) in lei a ni. Tin, Biak In dung zuiin chhuah lam zawng, Pi Biaktluangi ram chu District Headquarters atangin Rs 100,000/- (nuai khat) in min lei sak bawk a ni. (Biak In hmalam atanga punin 5 ft a ni a, tichuan arh hlekin Biak In bang atanga 11ft-a arhin, heta tanga ngil thlain Biak In hnunglamah a liam thla a ni). Biak In hmun LSC Pass nei tur hian nasa takin kan bei a, rin aiin a awlsam lo hle mai. Rbt. H. Lalthanzama chu Kohhran aiawhin Pass kan neih theih nan buaipuitir a ni a, a inpekna leh thahnemngaihna azarah rang takin Pass fel fai neiin kan awm ve ta a ni.

Tin, Biak In sa tur hian kan Kohhranin Loan kan la thin a. Chungah chuan kan Upa F. Thangnghilhlova’n tlawmngaih chhuahin Guarrantor-ah min tan sak thin bawk a. Kohhran thawh honain a tih theih baka tlawmngaih chhuah thei kan lo awm zel hi kan lawm em em a ni. Hetiang hi Loan kan lak dan dinhmun a ni.

THIL THLENG CHHINCHHIAH TLAK :

Local Church (Tualchhung Kohhran) in dantir an ni. Kum 1993 a lo her chhuak a, Kohhran member-te awmna hla tak tak leh, tun hma veng khat ni reng, veng thar lo awm a, ‘Ramthar’ veng hming pu a lo nih takah chuan, Tualchhung Kohhran dang Lunglawn lama awmtir leh chu tha tihna a lo awm chho va. Mi 11 (Sawm Pakhat) laite chu Pu Rohmingliana inah inhmu khawmin, ‘Kohhran In dan’ ve mai chu tha tiin thu an ti tlu ta a. Chu an thu tlukna chu Ni 13 June 1993 Kohhran General Meeting, Bialtu Pastor Rev. PC. Lalrosanga hova neih chuan ngaihtuahin, lungrual takin remtihsak an ni a. An Kohhran hming atan ‘Lunglawn U.P.C.’ tih chu tha tih a ni. Tun hnuah erawh ‘Lunglawn Zaia Veng’ tia hriat lar an lo ni ta a. Kohhran in dan ni hi Ni 13 June 1993 nia chhal a ni.

Tun dinhmun:

Ramthar AOC Local-ah hian member 292 (kum 2025 report-ah) an awm mek a. Upa - 5, Senior Upa - 1, Licence Holder - 1, Rawngbawltu - 7 an awm mek.

Kum 2025-2026 chhunga Local hruaitute chu :

• Chairman : Upa P. Lalsangliana
• Vice Chairman : Upa PC. Lalnundanga
• Secretary : Upa K. Lalhmunmawia
• Treasurer : Upa F. Thangnghilhlova
• Fin. Secretary : Rbt V. Chuandailova
• Statistician : Rbt K. Lalrinmawia