ZOTUITLANG KHUA CHU :

Rambuai avanga Hnahchang khua, Pangzawla sâwi khâwm tak te chu, ram a ralmuan deuhah Mizoram Sorkarin mahni khaw lama let leh phalna order a tih chhuah khan, Hnahchang khaw mi thenkhatte chu Pangzawl atangin kum 1975 khan an rawn let leh a. Hnahchang tlang kai ta lovin, Zotuitlangah hian an awm ta a ni. A tirah chuan In 10 emaw chauh an ni. Hmun hrang hrang atangin rawn pem lut an awm ve zel a, In te lo pungin mipui pawh kan lo tam ve ta zel. 2021 khan In dinglai 128 awmin mihring 605 an cheng a ni.

KOHHRAN LAM :

A tirah chuan pawl bik sawi lovin hmun khatah an lawi khawm vek thin. Hun a lo kal zel a, rin dan hrang hrang nei te, huang khata lawi ho chu a lo har tial tial a, tichuan BCM lam te, Salvation Army (SA) leh UPC te chuan mahni theuha lawi hrang turin an inbuatsaih a, kum 1976 khan an in dang ta hlawm a ni.

UPC LO DIN DAN :

Kohhranhote a hranga an lo awm takah chuan, khatih laia Haulawng bialtu Pastor, Rev. Hrangchhina chuan Zotuitlang UPC te chu Ni 1 May 1976-ah chuan hruaitu turte ruatin a rawn form ta a ni. Kohhran din tirh lai hian Chhungkua (5) panga leh member 20 (sawm hnih) vel an ni. Kohhran hruaitu hmasate chu :

• Chairman : Upa. Hrangkhuma
• Secretary/Treasurer : Upa. Darzawna
• Rawngbawltute : Bro. T. Aichhunga, Sist. Lallianthangi

BIAK IN CHUNGCHANG THU :

Kohhran a din tirh hian, Biak in an nei nghal mai lo va, Upa Hrangkhuma te Inah an inkhawm thin a ni. Pathian thlarauin a awmpui a, hlim takin hun an hmang thin. Biak in hmun tur hi khaw tlang hruaitu ten, Kohhran tin, an mahni duh lai tak an thlantir hlawm a, tichuan UPC Biak in hmun, tun thlenga an luah lai hi, Upa Hrangkhuma F/o Rev. T. Aichhunga (Pensioner) hian a duh lai taka thlan a ni.

Biak in 1-na :

Biak in hmasa ber hi kum 1978-ah Maurap Inin sak a ni. A sak pawh an sa zo hma hle nghe nghe. Vanduaithlak takin Biak in hmasa ber chu thliin a chhem thlu hlauh mai a, Biak in nei lovin kum 2 dawn an awm ta a ni. Hetia Biak in an neih loh chhung hian Upa Darzawna te inah an inkhawm thin a ni.

Biak in 2-na :

Kum 1982-1983 velah Biak in sak that zai an rel leh ta a, member-te an lo pung zel a, PYD te pawh a lo ding chho va, Biak in 2-na tur chu phur takin an tuak chho ta a ni. Lungrual takin Biak in chu Thingzai ren hmanga sak zawh a ni ta a ni.

Kum 1985 kum chuan Valcheng veng te pawh Zotuitlang lamah an lawi ta bawk a. Member pawh hemi kum hian 140 lai an lo tling ta a, Department pawh a ding kim ta a ni.

Biak in 3-na :

Kum 1996-ah Biak in sa turin an inbuatsaih leh ta a. Ni 25 February 1996-ah Biak in sak bul tan a ni. Biak in hi a dung 51ft leh a vang 27ft-a liana sak a ni. Biak in sakna tur hian, Brick te an rawh a, Vawk leh Puan te ticket-in an zuar a, hetianga Biak in sakna tura an thawh chhuah hi Rs. 273,422/- (Nuai hnih, sing sarih, sang thum za li sawm hnih pahnih) lai a tling nghe nghe a ni.

Biak in hi a Liang thleng RCC-a sak a ni. Kum 3 leh thla 2 hnuah Mawi takin an sa zo ta a, Ni 31 May 1999-ah Rev. H. Chalchhunga, District Superintendent chuan hawnna leh hlanna a nei a ni. Biak in hawn ni hian Pastor 9 (pakua) laiin an telpui bawk. Biak in hawn lawmna ruai atan, Lawichal pakhat, Vawkpa lian pakhat leh Ar paruk talh a ni. Biak in hawnna programme hmanna hi Dr. Lip (Pu Hranghrima) Lunglei Bazar chuan Video-in a cover-sak a, Kohhran hote an lawm hle a ni.

Biak in 4-na :

Hun a lo kal zel a, member-te pawh an pung ve zel a. Biak in hmasa a lo hluiin, a lo te ta deuh bawk nen, kum 2019-ah chuan Biak in thar sak zai an rel leh ta a. Tichuan, Ni 6 April 2019-ah Bialtu Pastor, R. Lalsangzuala’n hunserh hmanga bul tanin a lungphum a phum a, Biak in chu sak tan leh a ni. A theih dan danin Kohhranhote an tang tlang a, Biak in sakna tur hian, an tha leh zung bakah, sum leh pai lamah an thawh hona a tha hle. District atangin Biak in sak tanpuina Rs. 350,000/- an hmu bawk. Biak in thar tur hi a dung 70ft leh a vang 34ft-a duan a ni. Pathianin rem a ti ang a, Biak in thar ropui leh tha tak nei ngei turin an inbuatsaih a ni.

ZOTUITLANG KOHHRAN HUN TAWN CHHINCHHIAH TLAK TE :

Zotuitlang Kohhran hian a din tirh atangin Pathian awmpuina leh malsawmna an dawng nasa hle, a vai chuan sawi sen rual a ni lo, a then azar chauh han tarlang ila :

Kum 1985-a, Valcheng Local, member 44 lai maiin lungrual taka Lalpa rawng bawlho tura an han fin rawih mai chu, Kohhranhote an va hlim em. He hun hi mitthlain an thlir let thin a, an nun ti hlimtu a ni ta reng a ni.

Kum 1997-ah ‘Zion Commando Team’ te an Speaker, C. Vanlalena (tuna General Missions Director ni mek) hovin Camping nei turin an chah lut a, he camping-ah hian Pathian thlarau thianghlim malsawmna an dawng nasa hle. Camp chhuah ni a, Camp-na hmun atanga zai chung zela Biak in an han pan leh, tap leh Hallelui tuar tuar chunga Biak in chhung an han lut te kha a va ropui em! Thlarau Baptisma te, Tui Baptisma te, mi eng emaw zatin an chang thar a ni. “Khatiang boruak kha, engtikah tawng leh ang i maw?” an ti vawng vawng thin.

Kum 2006 Krismas leh 2007 kumthar lawmna zaikhawm hi Upa Saisiama te inah nghah a ni a. Thlarau malsawmna an dawng nasa em em a, thla khat leh a chanve chhung zaikhawmna an nei a, ruai pawh vawi 12 lai an theh nghe nghe. Mipui lam mai ni lovin, rawngbawltu atang pawhin thlarau Baptisma chang thar eng emaw zat an awm a ni. Khatiang ang taka hun hmanna ang kha thleng leh tak ang maw.

Ni 1 May 2001-ah Kohhranin ‘Silver Jubilee’ ropui takin an lawm a. Kha mi hun leh ni kha, theihnghilh theih rual a ni lo vang. Jubilee Souviner te buatsaihin Jubilee lung te phun a ni bawk.

Jubilee hriatrengna lungphun tur lung la tur a, Valcheng ram Mauphir Lung, lian tha tak mai an zawn chhuah ni, mi 100 chuang thawk chhuakin an zawn boruak te kha a ropuiin a hlimawm a, theihnghilh phal rual a ni lo.

UPC NEI GOLDEN JUBILEE LAWM THU :

NE India UPC kum 50 (Golden Jubilee) tlin lawmna Kohhranho ten an nei bawk. Jubilee hriatrengna Lungphun tur zawnna hun hlimawm leh ropui tak chu, Ni 15.02.2000-ah neih a ni a, a lawmna hun tak chu, Ni 17.02.2000 zan atangin, Ni 18.2.2000 zan thlengin Inkhawmna leh zaikhawmnain hun hman a ni.

Jubilee ni takah, Upa R. Saisiama leh Upa C. Dokhuma ten Jubilee dar an vua a ni. Jubilee lawm chhung hian Bro. T. Thanmawia inah zaikhawm a ni a, Jubilee ni tlai lamah ruai ropui taka theh a ni. He Jubilee hi tisa leh thlarauvah an hlawkpui hle.

Ni 25.1.2009-a Church Board rorelin Sunday School Hall sak a rel a, phur takin an sa a, Church Board remruatnain Joint Committee an nei a, chumi tum chuan an Hall sak chu ‘Diamond Jubilee Hall’ tih ni se, an ti a.

UPC North East India kum 60 tlinna ni tak, Ni 18.2.2010-ah chuan, Zotuitlang Local te chuan, Programme siamin a lawmna hun siam a ni a. Zaikhawmna te nen hlung taka hmangin ruai te theh a ni.

Tin, NEI UPC kum 60 tlinna (Diamond Jubilee) pual hian, a hriatrengna Lung phun a ni bawk. Chu bakah Sunday Cchool Hall chu, chumi pual atan chuan hlanin, ‘Diamond Jubilee Hall’ tiin an vuah ta bawk.

ZOTUITLANG UPC A DIN HNU A, KOHHRANA A BER KAI TE :

• Chairman hmasa ber : Upa. Hrangkhuma
• Secretary hmasa ber : Upa. Darzawna
• Treasurer hmasa ber : Rbt. T. Aichhunga
• Chairman ni rei ber : Upa. R. Thlamuana (17yrs)
• Secretary ni rei ber : Upa. Hmuakliana (30yrs)
• Treasurer ni rei ber : Upa. R. Duhawma (17yrs)
• Hmeichhe rawngbawltu hmasa ber : Sist. Lallianthangi
• Baptisma chang hmasa ber : Zahuata (12.9.1977)
• Pastor chhuak hmasa ber : Rev. T. Aichhunga

KOHHRAN LEH DEPARTMENT DIN NI :

• Kohhranpui : 01.05.1976
• Misiion Dept. : 20.02.1983
• Sunday School : 980
• LAD : 1981
• PYD : 26.02.1983
• PCD : 1985
• PMD : 26.08.1997

TUN (2025) DINHMUN :

Tunah (2025 ah) hian Zotuitlangah Pentecost Kohhran hi chhungkua 50, member 232 an awm mek a ni.

2025-2026 KOHHRAN HRUAITUTE:

• Chairman : Upa R. Thlamuana
• Vice Chairman : Upa R. Lalduhawma
• Secretary : Evan. H. Hmuakliana
• Assistant Secretary : Rbt. C. Rothangpuia
• Treasurer : Rbt. H. Rodawngliana
• Statistician : Rbt. RL. Hmingthanzuala