MAUSEN LOCAL KOHHRAN CHANCHIN

Mausen khua hi Haulawng leh Pukpui ke-a inkal pawhna (zo kawng), Haulawng atanga 7 Km-a hla, Tlang chunga awm a ni a. Khaw nuam leh thawveng tak a ni thin. Zoram buai avangin Kum 1968-ah Lunglei Zotlang lamah hruaikhawm an ni a. Ram a ralmuan deuh hnuah Sawrkarin mahni khaw lama kir leh phalna Order a siam khan, kum 1973-ah mi eng emaw zatte chu let lehin, khua chu an awp lum leh a ni.

Hun a lo kal zel a, kawngpui dung te tha taka a lo tlang takah chuan hmasawnna kawng a nih zawk beiseiin, Mausen tlang atang chuan a thlang kawngpui dung kawnah, Kum 1986-ah an insuan thla leh ta a. Chutah pawh chuan rei tak awm lovin, khaw zauh zelna hmun te a lo rem lem lo bawk nen, kum 1995-ah tuna an awmna hmun, hman lai deuh chuan 'Arbaikawn' an tih hmunah hian an insawn thla leh ta a ni. Tun thleng hian chu hmunah chuan Mausen khaw hming pu zelin an awm thla leh ta a ni.

KOHHRAN LO PIAN DAN LEH HRUAITU HMASATE

Kum 1962 April thlaah hmar lam mi, Evan. Thinhnema'n Mausenah hian rawng a rawn bawl a, a rawngbawlna atang chuan mi pasarih laiin Isua hmingin Baptisma an chang a, kohhran erawh form a ni rih lo. Kum 1963-ah Pastor J. Laltluanga te pafain Mausenah rawngbawlna an nei leh a, hemi tum hian mi 43 laiin Isua hmingin baptisma an chang leh ta a. Member thar an lo awm belh zeuh zeuh takah chuan Pastor Hrangchhina chuan 1963 kum hian Kohhran chu a form ta a ni.

Hruaitu Hmasate (1963) :

• Chairman : Upa Chalmawia
• Secretary : Bro. Chalkivara

Upate :

• Thantawna
• Lalkhuma

Rawngbawltute :

• Vanhrila
• Pathiauva

KOHHRAN KAL CHHOH ZEL DAN LEH INSAWN THLAK ZEL DAN

A tira member 40-50 vel lek kha, Pathian awmpuina avangin an lo pung zel a, kum 1968-ah meuh chuan member 140 vel an tling hman a. Vanduaithlak takin rambuai a lo nih tak avangin kum 1968-ah Zotlang, Lunglei-ah sâwi khâwm an ni a, Mausen tlang chu luahtu awm lovin a ram ta rih a ni.

• Mausen Tlang Luah Leh Lai (1973) : Sawrkar order angin kum 1973-ah Mausen tlangah mi eng emaw zat an let leh a. Kohhran pawh Preaching Point-a dah rihin bul tan a ni a. Chuta hruaitute chu Lalkhuma, Biakzuala, Rochawngpuia, leh Hrangthanga te an ni.
• Mausen Kawn (1986) : Kum 1986-ah Mausen kawnah insawn thlain Kohhran tha tak din chhoh zel a ni. Hemi hun laia hruaitute chu Upa Lalkhuma (Chairman), Rbt. C. Lalzawnthanga (Secretary), leh Rbt. Rochawngpuia (Treasurer) te an ni.
• Tuna Awmna Hmun - Arbaikawn (1995) : Kum 1995-ah tuna Mausen hmunah (Arbaikawn) hian insawn thlak a ni a, Biak in an la neih loh avangin Pi Nuthuami inah inkhawm thin a ni. Preaching Point-a awm rihin, kum 1998-ah District-in Kohhran puitlingah a hlangkai ta a ni.

BIAK IN SAK CHHOH DAN LEH TUN DINHMUN (2025)

Mausen tlangah kum 1962 kum tawpah Biak in sa tanin 1963 kum tir lamah luah luh a ni. Kum 1986-a Mausen kawna an insawn thlak hnuin biak in sa nghalin kum 1987-ah Bialtu Pastor Rev. C. Darnghaka'n a hawng a, kum 1990-ah kawngpui bulah sawn thlak a ni. Tuna Mausen hmunah kum 1995-a an insawn hnuin 1996-ah Assam type (dung 21 ft, vang 17 ft) sa a ni. Kum 2013-ah sak tha tura hmalain, Building Board indinin kum 2017 atangin Biak in thar sak tan a ni a, tunah hian sak kal mek a ni.

Tun (2025) Dinhmun : Member 64 leh chhungkua 11 an awm mek a ni.

2025-2026 Kohhran Hruaitute :

• Chairman : Upa TC. Lalzarzova
• Secretary : Upa R. Lalhmingthanga
• Treasurer : Upa C. Zadinga
• Statistician : Rbt. B. Lalawmpuia