HMUNTLANG KHUA

Hmuntlang khua hi Rambuai hma hian In 103 vel awmin mihring 500 chuang awmna khua a ni. Haulawng atangin Chhim chhak lamah 8 Km vela hlaah a awm. Hmuntlang khua hi Baptist Kohhran hlang deuh thaw awmna khua a ni thin. Salvation Army tlem te an awm ve thin bawk. January ni 30, 1967-ah India sipai ten, Jet-fighter pahnih hmanga an bomb chiam avangin khua luah thei lovin, Haulawngah sâwi khâwm an ni a. Boruak ziaawm hnu, 1974 kumah mi eng emaw zat pem letin, tun thlengin khua chu an luah zui ta reng a ni. 2021 kumah hian In 25 awmin mihring 142 an cheng mek a ni.

Hmuntlang khuaah hlimna : Kum 1960-61 chhovah Baptist Kohhranah hlimna nasa tak a tla a, taksa insawi hlawk hlawkna te, tawnghriatloh te, lam dan ze hrang hrang te a thleng nasa a, a chang leh chang ve lo te inkarah boruak eng eng emaw te awmin, chu chuan Kohhranah ngaihdan leh duh dan a ti phir hle a. Hetih hun lai vel hian, Pu Sainghina, Dahrawk, Lunglei Police hotupa chu Hmuntlangah lo kalin, Hmuntlang Lal, Pu Lalphunga inah a thleng a. Ani hi thil sawi thiam tak a ni a. Hlimna thu te, chu hlimna chhana Mizorama UPC lo ding tawh chanchin te thiam takin a sawi a. Ngaithlatute pawh an hlim hle a ni.

Hmuntlang khua hian khaw siper, ‘Khawngbawk’ an tih chu a nei a. A tirah chuan In ruk (6) emaw chauh a awm a, Baptist Kohhran vek an niin, Hmuntlangah Biak in khatah an lawi ho vek a ni. Khua atangin 1 Km leka hla a ni. Anni pawh hlimna hian a kal kan bik lo.

UPC KOHHRAN LO DIN CHHOH DAN

He hlimna hian bu a khuar thuk zel a, mihlim ho chuan Kohhranah leng ta lo riauva inhriatna an nei lian chho zel a, Pu Lalnghenga inah an inhmu khawm leh tal tal thin. Kum 1962 March chawlhni vawi hnihnaa, Pu Lalnghenga ina Hmuntlang mi hlim leh Khawngbawk mi hlimte inhmu khawmte chuan, “Pastor J. Laltluanga, UPC Pastor, Haulawnga rawngbawl mektu hi koh ni se, kan duh leh kan zawm ang a, kan duh loh leh kan zawm lo mai ang a” an ti a. Tichuan, Haulawnga rawngbawl mek, Pastor J. Laltluanga chu an chah ta a. Haulawng atangin Sist. Hmingliani, Haulawng Lal fanu leh B. Thlamuana ten an rawn zui a, R. Sechala, Pukpui chu a lo tel bawk.

Mi hlim ho chuan Pu Lalnghenga inah an inkhawmpui a, Pathianni hun an hmang. Thusawi a thiam si, tawnghriatloh te nen a bei nasa mai a, mi thinlung a hneh hle. Pathianni an hmang zo va, Thawhtanni a lo thlen chuan Baptisma chang duh an awm tan ta a. Pu Lalnghenga leh Pu Rengchhunga ten hma hruaiin Baptisma khur an hawng ta a ni. Hemi kar hian ni tin Baptisma khur hawn a ni a. Member pawh 56 vel zet an lo awm ta a ni.

Kohhran a ding ta : Member 56 vel zet an lo tlin takah chuan mumal taka kal a, Kohhran kalphung pangngai anga an kal theih nan, Ni 7.4.1962 (Pathianni)-ah, Pastor J. Laltluanga chuan hruaitu turte ruatin kohhran chu a formed ta a ni.

Kohhran hruaitu hmasaber te chu :

• Chairman : Upa. Vanthangpuia (Upa.Vanbiala)
• Secretary : Upa. Lalnghenga
• Treasurer : Upa. Tawnluia

Rawngbawlna nei thei turin heng mite hi ruat an ni :

1. Lungmuana
2. K. Zaihnuna
3. Vanchhuanga
4. Bualzika
5. Aihrangaa
6. Hranghleia
7. Hualzika
8. C.Zonghinga

Tin, hmeichhe lamah pawh Thlarau mi, mi pawimawh tak tak an awm bawk.

Tichuan, Hmuntlang khuaah, ‘United Pentecostal Church’ chu Ni 7.4.1962 (Pathianni)-ah chuan a lo ding ta a ni. Hetia Kohhran a lo din hian, Khawngbawk lam mi hlim rual, Isua hminga Baptisma chang vete pawh kha an tel ve vek a. Hmun khatah an lawi ho chho ta reng a ni.

BIAK IN NEIH DAN LEH SAK CHHOH ZEL DAN

Kohhran a din tirh chuan Pu Lalnghenga Inah an inkhawm thin a, a dawltute inpe hle mahse; mimal ina inkhawm reng chu felin an hre lo va, chuvangin Biak in sak thuai tul an ti a, Biak in hmun tur an ngaihtuah ta a ni.

Biak in hmun chungchang : Hmuntlang Veng tawp lam, ‘Len-veng’ an tih hmuna Salvation Hall hmun hlui, laih zawl sa chu Biak in hmun atan an ti fel a, chu chu an chei ta nghal a ni.

Biak in sak vawi 1-na : Kohhran member pawh 120 vel zet an lo tling chho ve ta a. 1962 October thla tawp lamah chuan Biak in chu sak tan a ni ta a. Kohhranhote an phur tlang bawk a, Biak in chu Krismas-a luah hman turin, tha takin maurap Inin an sa zo ta a ni. Tichuan, Khawngbawk UPC te nen he Biak inah hian hlim takin an lawi ho a ni.

He Biak in hi kum 4 emaw chauh an luah hman tihin, India sipai leh Mizo sipai, Hmuntlanga an inkah avangin Hmuntlang khua chu, Ni 30 January 1967-ah Jet Fighter pahnihin an bomb rawn a. Biak in pawh chu a chhe tel ve ta a ni. Hmuntlang UPC te pawh hmun hrang hrangah an tlan darh ta a ni.

Hmuntlang UPC atangin Khawngbawk Local UPC a ding : Kohhran a lo din tirh atangin Hmuntlang UPC Biak inah chuan, Khawngbawk lam UPC te nen an lawi ho chho zel a. Kum 1964 a lo her chhuah chuan, Khawngbawkah chuan In 20 lai mai awm tawhin, UPC member pawh an lo pung chho ve zel a. Veng kar te a hlat deuh avangin Hmuntlang lama lawi reng lo va, indan ve mai thaa hriain Church Board-ah an thlen ta a. Hmuntlang Local Church board pawhin an lo rem tihpui a. Tichuan member 40 lai niin, 1964 kum chuan ‘Khawngbawk UPC’ chu an lo indang ta a ni.

Mizoram buai nghawng avanga Hmuntlang khua Jet-fighterin a bomb chiam khan, India sipai ten Hmuntlang khua luah phal lo va, Haulawnga an sâwi khâwm tak vek rual khan, Khawngbawk pawh, India sipai ten inkulh nana hmangin khua an luahsak ta bawk a, chutiang avang chuan an lo tiltiak zo ta bawk a ni.

Hmuntlang khua luah leh hnua kohhran te : Ram a lo zalen leh deuh tak avangin, Mizoram sawrkarin hruai khawm mipuite tan, an mahni khaw lama kir leh phalna Order a ti chhuak a, chutiang a lo nih takah chuan Hmuntlang khua chhungkaw eng emaw zatte pawh, kum 1974 khan an kir leh ta hlawm a ni.

Kir leh zingah hian UPC chhungkua eng emaw zat, member 40 vel an awm a ni. Anni ho chu Biak in an sak leh hma zawng, Pu C. Zonghinga te inah an inkhawm thin a. He mi kum vek hian, Kohhran/Local pangngaia awm leh turin Bialtu Pastor, Rev. Hrangchhina hovin hruaitu turte chu ruat thar an ni leh ta a ni. Hmuntlang luah leh hnua hruaitu hmasaber te chu :

• Chairman : Upa. C.Zonghinga
• Secretary : Tv. Hrangdailova
• Treasurer : Rbt. Biakhnuna

Biak in din thar leh dan : Kum a lo vei a, hetih lai hian Hmuntlang khuaa awm, Baptist Kohhran Upa C. Thanzama te chu Lunglei venghlunah pem an tum avangin, an in hi UPC Kohhran te chuan Rs. 40/- (sawm li)-in an lei a, an thiat vek a, a ren zawng zawngte la khawmin, tuna Biak in hmunah hian kum 1975-ah Biak in chu an sa ve leh ta a. He Biak in hi Hmuntlang khuaa UPC Biak in sak vawi 2-na a ni.

Biak in 3-na : Biak in hmasa luah chungin Biakin thar an tuak pah leh ta ngat ngat a, hetih hun lai hian Kohhran member 33 vel chiah an ni. Biak in pawh chu sa zo ve lehin, Ni 21 March 1982-ah bialtu Pastor Rodawla chuan Biak in chu hawngin Pathian hnena hlanna a nei a. He hun hi Ruai nen hlim takin hun an hmang a ni.

Biak in 4-na : Hun a lo kal zel a, Biak in pawh a chhe lai te thawm that zel a ni a. Kum 2004-ah thliin a tih chhiat avangin a thar sa turin hma an la leh ta char char a ni. Tichuan, 2007-ah Assam Type-in an sa zo leh ta a. Ni 10 October 2020-ah Rev. C. Darkhuma’n Biak in thar chu hawngin Pathian hnena hlanna a nei a, Ruai nen hlim takin hun hman a ni.

Biak in 5-na : Biak in pawh a lo hluiin a lo rawih ve zel a, Hmuntlang khuaah Kohhran a din atanga a vawi 5-na ni turin Biak in sa tha tura hmalak leh mek a ni a. Kohhran hoten theih ang angin sum an tuak leh mek a ni. Tunah hian kohhran member 42 niin Pathian hruainain Biak in tha tak tun din leh ngei an tum a ni.

TUN (2025) DINHMUN LEH HRUAITUTE

Tun (2025) dinhmun : Tunah (2025 ah) hian Kohhran hi chhungkua 9 member 39 an awm mek a ni.

2025-2026 Kohhran hruaitute :

• Chairman : Upa R.Lalengzauva
• Vice Chairman :
• Secretary : Rbt.C.Lalmuanpuii
• Assistant Secretary :
• Treasurer : Upa Saisiama
• Statistician : Rbt.Lalthansangi