KOHHRAN DIN TURA HMALAK DAN

Bualpui ‘V’-ah hian kum 1964-ah Pu Saikhuma, Rahsiveng te, Pu Thangliana, Pukpui te, Ni Rothangi (lam thiam) Sekhum te leh mi dang eng emaw zat ten Crusade/Campaign an rawn nei a, Pu Vuka Inah inkhawmna neih thin niin, favang laiin Pastor Chuauruma’n heng mite hi Baptisma a chantir :

• i) Chawngdailova
• ii) Pu Vuka
• iii) Ch. Rosanga
• iv) Dothuami
• v) Lalzela
• vi) Doliana
• vii) Doruma
• viii) Thangliana
• ix) Vanzika
• x) Chuauliana

Hemi kum vek hian Pu Sangkhuma kawmchhakah Biak In sak nghal a ni bawk. A kum leh lawkah heng mite hian Baptisma an chang ve leh a ni :

• i) Siammawia
• ii) Tlanglawma
• iii) Saikaphnuni

Chhipphir khuaa hruai khawm an nih hnu hian hmun hrang hranga pem darh an awm avangin an tiltiak leh rih a ni.

Hun a lo kal zel a, Kohhrana rinawm taka lo la awm tang tangte azarah District PYD ruahmannain kum 1996-ah Evangelist Rawngbawla dah a ni a, Kohhran member awm ang angte inaikhawm lehin, Pathianniah Bro. H. Hrangmawia te inah inkhawmnate an nei chho tan leh ta a, hetih lai hian member pali - Sis. Saikaphnuni, Bro. H. Hrangmawia, Bro. F. Lalawmpuia leh Sis. Rozikpuii te an awm a. Pastor H. Enmawia’n Kohhran a form nghe nghe a ni. Missionary hna thawk tur hian Rbt. Lalnghinglova te, Evan. Zoramchhana te awm chho lehin member awm ang ang ten, hlim takin hun an hmang thin a, hun a lo kal deuh a, member tlem te tan chuan inkhawmna neih reng te a lo harsa a, inkhawm mumal hlei thei lovin an awm chho leh ta a ni.

KOHHRAN DIN THAR LEH TUR HMALAKNA

Kum 2012 atangin District-in Missionary field-ah puangin Evan. Rochungnunga Renthlei an dah leh a, ani hian kan Kohhran mi Baptist lama awm tawh te sâwk khawm lehin bul an tan leh ta a ni. A tirah chuan member - 6 velin bul an tan leh a. Kristmas-ah te pawh Sa Kg 2 hmangin ruai an siam mai thin. Kohhran din tirh, Biak in neih hma hian Bro. H. Hrangmawia inah inkhawm thin a ni. District leh Bial tangkawpin kum 2013-ah Evangelist Quarter chu Pu H. Lalnunmawia’n ram min pekah sak a ni a, Quarter-ah hian inkhawm chhunzawm nghal a ni. Kum 2015-2016-ah Evan. Lallawmsanga rawn awm chhunzawmin, Kohhranhote pawhin a remchan ang zelin sumtuakna te an nei thin a ni. Pastor Lalbiakdika Chawhte hmalakna avangin Pu H. Hranghnuna’n Biak in hmun tur min pe a. Ni 20.8.2016-ah Rev. R. Lalrosanga’n Lungphum a phum a, District-in pawisa rawn tumin Bialin Biak In sak a ni. Dt. 19th October 2016 (Inrinni) chhun 12:00-ah Rev. PC. Lalrosanga’n Lalpa Isua hmingin a hawng a ni. Kum 2017-2018-ah Evan. R. Lalremsiama awm lehin,Kohhranhote nena thawh hona tha tak nen Biak In thutthleng leh Pulpit te siamin Biak In pawh a changtlung hle a ni. Ni 10 May 2018 atangin Evan. R. Lalrokhawma awm lehin, thawh hona tha tak nen Kohhranin nasa takin hma a sawn a, Quarter pawh remchan zawkna vangin Pu Chhungremthanga In, Biak In bula mi nen inthlengin sak that nghal a ni a, Ni 17 December 2018-ah luah luh a ni.

Home Missionary inpekna leh Kohhran member-te nena thawh hona tha tak avangin Pathian hruainain, Ni 14 March 2021 (Pathianni) ah Rev. LH. Lalchhandama, Bialtu Pastor, Chhipphir Bialin Local Form-in Kohhran puitlingah puan a ni ta a ni. Hetiang hian Local hruaitute leh Department hruaitute ruat an ni :

• Chairman : Upa H. Hrangmawia
• Vice Chairman : Upa F. Lalawmpuia
• Secretary : Rbt. R. Lalrinzuala
• Asst. Secretary : Rbt. H. Lalrinzuali
• Treasurer : Rbt. Chuauzami

TUN DINHMUN

Tun dinhmunah hian kohhran member 14 (kum 2025 report) an awm mek a, Upa - 2 leh Rawngbawltu - 6 an awm mek bawk. Biak in leh Home Missionary Quarters tha tak neiin an awm mek a. Rbt. Vanlalpeka chu Home Missionary niin a awm mek.

Kum 2025-2026 chhunga kohhran hruaitute chu :

• Chairman : Rbt. Vanlalpeka, Home Missionary
• Vice Chairman : Upa Hrangmawia
• Secretary : Rbt Lalrinzuala
• Asst Secretary : Rbt. Lalramdintluanga
• Treasurer : Rbt Chuauzami
• Statistician : Rbt Lalrinzuali