KOHHRAN DIN TURA HMALAK DAN

S. Chawngtui-ah hian Pentecost Kohhran a din dawn hian mi hlimho chu Baptist Kohhran-ah leng lovin, chuta leng lo ho chu inkhawm hrangin ‘Pa Pawl’ tiin an kal a; chuta tang chuan Pentecost Kohhran lo ding tur chu a inmung chho tan ta a ni.

Baptist Kohhran atanga chhuak ho chuan UPC chu Ni 21 August 1954 khan an din ta a, a dintute chu - Pu Saichhunga te nupa te, Pu Zathiauva te nupa (Pu Zathiauva hi Primary Zirtirtu a ni) te, Pu Zachhinga te nupa te, Pu Hranghrima (Upa Dr. H. Lalruata pa) te leh Pu Lengbilha te an ni. Hemi hnu hian khawtlanga mi pawimawh tak takte pawh UPC-ah hian an lo lut ve ta zel a, a din kum la la hian member 100 an tling nghal deuh mai a ni. October, 2021 khan member 300 chuang hlek an ni tawh a ni. Kohhran din tirha hruaitute chu heng mite hi an ni:-

• Chairman : Zathiauva
• Secretary : Dingluaia

Anni bak hi kum 1987 hmalam record hmuh tur a awm loh avangin tih lan a ni lo.

BIAK IN NEIH DAN LEH SAK DAN

S. Chawngtui Local hian Biak In pathum tung ding tawhin 2021 khan Biak In pali-na tur tun din a ni bawk.

Biak In hmasa ber hi tuna Forest Department Quarters awmna hmunah hian awmin Rev. Zakamlova’n Biak In lungphum hi a phum nghe nghe a ni. Hemi hmunah hian rambuai hma zawng an inkhawm a ni. Ram a buai a, Hnahthial-ah S. Chawngtui khua chu khawm a ni a, chumi hnu S. Chawngtui khuaa kir leh hnuah tuna mual bulah hian a pahnihna chu tun din leh niin, a hmun a zimin a chep deuh avangin tuna Biak In hmunah hian insawn phei a ni leh ta a ni. Tuna Biak In hi 2001-ah Sr. Upa Hrangawia’n lungphum phumin sak tan a ni a, 2010 khan hawn a ni. Tichuan, Biak In pali-na tur atan ni 7 June 2021 khan Bialtu Pastor K. Lalnunpuia’n lungphum phumin sak tan a ni a, a dung feet 72 leh a vang feet 36 a liana tur a ni a, a hnuai hi Hall tur a ni a, Oct. 2021 khan a hnuai hall tur chung hi slab chhun zawh niin, Biak In ban tur hi tun din kim a ni.

KOHHRANA THIL THLENG CHHINCHHIAHTLAK TAK TAK TE

S. Chawngtui Local hi tunhma atanga ‘Mi hlim khawpui’ an tih thin a ni a, UPC huang chhunga Zoram dung leh vanga rawngbawltu tha tak tak ten rei tak tak chama rawngbawlna an lo neih tawhna hmun a ni. Tin, he Local hi North East India UPC te zinga rawngbawltu ropui tak Rev. H. Lalruata lawina Local a ni nghe nghe a ni.

TUN DINHMUN

S. Chawngtui Local ah hian tun dinhmun (2025 Half yearly Statistic Report) ah Member 302 (Mipa 153, Hmeichhia 149) an awm mek a ni.

2025-2026 Kohhran hruaitute :

• Chairman : Evan. C. Laldawla
• Secretary : Upa H. Lianchunga
• Treasurer : Upa PC. Roliana
• Statistician : Rbt. Laltawna