KOHHRAN DIN TURA HMALAK A NIH DAN:

Khawhri khuaah hian kum 1953 khan UPC kohhran hi a ding tawh a, hetih laia a dintu ber chu Pi Aihliri a ni. Rambuaiin a nan tak avangin kum 1967-ah Hnahthial-ah sawikhawm an ni a. Kohhran pawh chu a tiavai chu a ni ta mai a. Hun a lo kal leh deuh a, kum 1972-ah Khawhri-ah chhoh leh a ni a, Baptist Kohhran nen inawm-fin vek a ni a, Kum 1973 atangin inkhawm hranna an nei ta a ni.

A hmaa sawi tawh angin kum 1953-ah Biak In nei lovin Kohhran hi din a lo ni tawh a, rambuai avanga chhunzawm theih a nih loh hnuin kum 1972 atangin Baptist Kohhranho nen Biak In khatah an inkhawm ho thin a, heta an inkhawmnaah hi Pi Thanghliri chuan thu a sawi a, Pathian Thlarauvin pawlin Lalpa Thuthlung ropui tak chu a puang chhuak ta a, Baptist Kohhranho chuan rawngbawl ve an phal ta lo va; tichuan, September 1973 atang chuan an inkhawm hrang tan ta a ni.

Chuta tang chuan mei mit lovin Khawhri-ah chuan Pentecost Kohhran chu a ding ta a, tumah chuan Kohhran tha tak niin member pawh 80 bawr vel an lo ni ta a ni.

Kum 1987 hma lam hi Record hmuh tur a awm loh avangin Kohhranpui leh Department hruaitu hmasa te pawh kan tarlang lo mai e.

BIAK IN NEIH DAN LEH SAK CHHOH ZEL DAN :

Kum 1972-ah Baptist Kohhranho nen Primary sikul mau-rap in-ah inkhawm ho thin a ni a, kum 1973-ah inkhawm hran a ni a, kum 1974-ah Biak In atan mau-rap-in sak a ni. Kum 1977/1978 vel khan tuna Khawhri Community Hall awmna-ah hian mau-rap bawka sak leh a ni a, kum 1985 a lo nih chuan member pawh lo pung ve zelin tuna Biak In dinna hmunah hian Assam Type-in sak a ni leh ta a ni.

Tichuan, chu Biak In chu 2014-ah thiah a ni a, theih ang angin Kohhranhoten Biak In sakna tur sumtuakin Rs. 3,00,000/- lai nei ve ta-in, May 2014-ah chuan RCC-in sak chhoh tan a ni ve ta a, tunah (2021) chuan hawn mai theih tura peih ve a ni ta thuak mai. Biak In sakna atan hian Loan puk miah lovin Kohhranhote thahnemngaihnaa sak a ni thei hi a lawmawm hle a ni.

KOHHRANA THIL THLENG CHHINCHHIAH TLAK TE :

Loan la miah lova Biak In (RCC), a dung 60ft, a vang 21ft-a kan sa thei hi Kohhran member 80 bawr vel lek tan chuan, thil mak leh ropui tak, Pathian hnathawh lo lanna niin kan hria.

TUN DINHMUN :

Khawhri Local-ah hian tun dinhmun (2025 Half yearly Statistic Report) ah Member 68 (Mipa 30, Hmeichhia 38) an awm mek a ni.

2025-2026 Kohhran hruaitute :

• Chairman : Upa B. Lianzama
• Secretary : Rbt. FC. Lalsawmtluanga
• Treasurer : Bro. C. Lalbuatsaiha
• Fin Secretary : Rbt. H. Vanlalhriata
• Statistician : Rbt. F. Vanlaldika