KOHHRAN DIN TURA HMALAK A NIH DAN LEH KOHHRAN DIN CHHOH DAN

Cherhlun khuaah hian kum 1947 vela Mizoram-a harhna lo thleng kha lo thleng ve-in, hun a lo kal zel a, harhna kal zelah Baptist Kohhranah chuan lengkhawm hla duh lo leh khuang hniha zai duh lo te leh tawnghriatlohva tawng te duh lo an awm ta a. Tichuan, lengkhawm zai leh khuang hniha zai duh lamte chu an inkhawm hrang ta a; Lengkhawm hla an saka an khuang pu hi pa huaisen tak UPC dintute zing a mi Pu Sangzika a ni nghe nghe a ni.

Khuang hnih nena zai a, lengkhawm hla sak te chu dik lo leh Pathian thu lo riauva ngaihna a awm a, hlimsanna thlarau te chu Bible nena inmil lo riauva hriatnate a awm bawk a. Hengte avang hian hlim sangho leh khuang hnih nena zai ho te, lengkhawm hla sa thin hote chu en hranna leh hmuhsitna te, dodalna te a lo piang ta a, awm ho reng theih a nih loh avangin chhungkaw 5 te chu Baptist Kohhran atanga chhuakin Pi Darkhaii M/O Pu Thanzaua te inah an inkhawm hrang ta a ni.

Kohhran din a ni :

Ni 1-4. September 1954-ah Rev. Saihnuna leh Sailulak Kohhran Upa Pasaia, Pu Tumsanga leh N. Vanlaiphai Leilet-a mi unau thenkhatte chu Cherhlun-ah lo kalin rawngbawlna an nei a; Cherhlun khaw lal Pu F. Thangdula in-ah inkhawmna neih a ni. Tichuan, Ni 3 September 1954-ah UPC Kohhran lo zawm duh mi 21 te chuan hming an ziak ta a; a tuk Ni 4.9.1954-ah chuan Rev. Saihnuna chuan Kohhran chu a din ta a ni. Kohhran ding tir hi an inhmangaihin, tawngtai an taima em em a, Pathian awmpuina an chang nasa hle a ni.

Kohhran dintu Saihnuna hian Baptisma a chantir loh avangin, 1954 vek October thla tawp lamah District Pastor Rev. Zakamlova rawn kalin, Rachi-ah, Tuikhurah Baptisma a chantir ta hlawm a, hei hi Baptisma an channa hmasa ber a ni. Heta Baptisma chang nia langte chu Sawibuta, Sangzika, Lalruma, Bawihngura, Patea(Rothanga), Nuthimi Pa, Darkhai te an ni.

Tichuan, kum 1961-ah Rev. Saihnuna hi Cherhlun-ah lo kal lehin a rawngbawlna a tla tha hle a, Cherhlun khua pawh a sawi nghing hneh hle. A rawngbawlna atangin mi eng emaw zatin UPC lo zawmin member 300 atanga 400 bawr vel lai an lo ni ta a, heta tang hian Kohhran chu mei mit lovin a la kal ta zel a ni.

KOHHRAN DIN TIRA HRUAITUTE

Kum 1956-ah Rev Zakamlova rawn kalin kohhran form-na hmasa ber a nei ta a, chuta hruaitute chu :

• Chairman : Upa Sangzika
• Secretary : Upa Ngunawia
• Treasurer : Upa Zakhuma
• Rawngbawltu : Rothanga

Ram buai vangin Kohhran Document pawimawh hrang hrangte hmuh tur a awm tawh lo va, a din tirh laia Department hruaitute pawh hmuh theih a ni tawh lo a ni.

BIAK IN NEIH A NIH DAN LEH SAK CHHOH ZEL DAN

Cherhlun khuaa UPC Biak In lo ding tur hi hlim sang hovin a hma atanga lo hmu lawkin, an tawngtai laiin, tuna Biak In dinna-ah hian eng tak mai an hmu a, ‘Hetah hian Biak In a la ding ang’ an lo ti nghe nghe a ni awm e. Heta tawngaia eng hmutute chu Lalruma, Kapluaia leh Thanthiana te niin sawi a ni.

Kohhran din a nih khan Biak In an la neih loh avangin, Pu Bawingura, Pu Rothanga, Pu Thanzauva leh Pu Sawibuta te inah te an inkhawm chhawk thin a. VC-ah Biak In hmun tur an dil a, an pe thei lawk lo va, kum 1955 kum tirah tuna Biak In hmun hi pek an ni ta ni. An sawi danin, hruaitu hmasate chuan tawngtaia an dil atangin Thlarau Thianghlimin a hmuhtir niin an sawi nghe nghe.

Kum 1955-ah chuan maurap-in te takte-in Biak In chu an sa ta a, thutphah leh Pulpit atan rua an hmang a, Biak In hmasa ber hi Rev. Zakamlova’n a hawng a ni.

Kum 1962-ah Biak In hi sak that leh a ni a, a chung di, a bang mau hmanga sak leh niin, Rev. Lalthima’n a hawng a, ruai nen hun hman a ni.

Kum 1972-ah Biak In hi sak leh a ni a, a chung rangva, a bang atan thingzai hman a ni ta a, he Biak In hi Evan. Rodawla’n a hawng a ni.

Kum 1983-ah Biak In hi sak leh a ni a, a dung 42ft, a vang 24ft, a chung rangva, a bang tile-a sak a ni a, Rev. H. Lalruata, District Pastor-in a hawng a ni.

Ni 15.2.2010-ah Sr. Upa Ngunawia’n lungphum phumin Biak In(tuna mi) sa thar leh turin bul tan a ni a, a ban te phun niin hna tan tak tak a ni. Hetih lai hian Kohhranin Rs. 1,76,000/- chiah a nei a, Pathian chakna rinchhana sak chhoh zel niin Bank Loan te la-in theih tawp chhuaha sak a ni a, RCC (a dung 62ft, a vang 27ft, a liang 17ft)-a sak niin Ni 8.2.2019 khan Rev. R. Lalrosanga, Lunglei District Superintendent-in a hawng ta a ni.

TUN DINHMUN

Cherhlun Local-ah hian tun dinhmun (2025 Half yearly Statistic Report) ah Member 265 (Mipa 130, Hmeichhia 135) an awm mek a ni.

2025-2026 Kohhran hruaitute :

• Chairman : Upa F. Lalchangliana
• Secretary : Upa Lallianzama
• Treasurer : Upa C. Lalchangliana
• Statistician : Rbt. C. Lalpianmawia