KOHHRAN DIN CHHOH DAN

Zehtet khua hi Lunglei District chhim thlang lam Rualalung khua atanga 5KM-a hlaa awm a ni a. He khua hi in 120 niin a mi chengte hi Bru hnam an ni a, Bru khuaah chuan khaw lian pawl tak pawh a ni awm e. Tin, Kohhran din tirh chho hian Zehtet khua hi Motor kal pawh theih a nih loh avangin, kea kal ngai a ni a, a khuain hma a sawn tur ang pawhin hma a sawn pha lo niin a lang.

Zehtet khuaah hian Presbyterian Kohhrante chuan, sikulte dinin hna thawktu pawh mi sawm (10) lai awmin, damdawi lam thawktu Health Worker pawh pakhat an dah bawk. Tin, Kohhran lamah chuan Presbyterian leh Baptist Kohhran an awm thin a. Tun hma 1979-1983 vel khan UPC Kohhran pawh an lo awm tawh a. Nimahsela eng emaw harsatna kawng hrang hrang te avangin UPC kohhran chu a lo rem ta a ni.

Hun a lo kal zel a, kum 2004 a lo inher chhuak a, Zehtet khuaah hian UPC Kohhran din theih mai tur awma a lan avangin, Chawngte Kohhran chuan Pastor VL. Hmuaka (Bialtu Pastor) Speaker-a hmangin Crusade an buatsaih a. Ni 14.8.2004 ni-ah Crusade nei turin mi 11 an kal a. Amaherawhchu hemi tum hi chuan Kohhran din lovin an haw leh ta a ni.

Ni 11.9.2004-ah New Lungrangah Section Missions Board koh a ni. Hemia an thurel chuan, “Zehtet khuaah hian Crusade neih leh ni se, hemi hunah hian Kohhran chu din tum leh ngei ni se” tiin a rel a ni. A hun atan Ni 3.10.2004 (Sun) hmang tura ruat ngheh a ni. Ni 1.10.2004 (Fri) niin mi 13 an kal a, Ni 3.10.2004 (Sun) ni chuan Kohhran chu din a ni ta a, member pawh mi 38 seng luh nghal a ni. Kohhran hi Bialtu Pastor, Pastor VL Hmuaka’n a form nghal a. Hetiangin :

• Chairman : Upa Lalremkhuma
• Secretary : Upa Lalhmachhuana
• Treasurer : Bro J. Zonunkima

Sunday zing thawhlawm leh Buhfaitham sum kawltu (Treasurer) : Sist. Rohmingliani W/o Upa Lalremkhuma chu ruat ani bawk. Tin, Kohhran thar member seng luh takte hi Section Pastor, Pastor VL. Hmuaka’n Isua hmingin Baptisma a chantir vek bawk a ni.

BIAK IN

Tin, Ni 16.11.2004-ah Pukpui Bial Missions Department-in Pentecostal Revival Team te tirin, Zehtet hmunah hian Crusade neih a ni a. Kohhran hoten Biak in hmun an neih loh avangin, Pentecostal Revival Team te chuan an Speaker, Evan. K. Lallungmuana hovin Committee an nei a, Biak in hmun hi Rs. 2000/- in an leisak a ni. He Crusade chhung hian member 7 (pasarih) lawm luh an ni bawk. Chungte chu Evan LH. Lalbiaksanga’n Isua hmingin Baptisma a chantir a ni. Tin, Biak in hmun te neih a lo nih takah chuan, Pukpui Bial Missions Department te chuan Biak in bang tur tile leina leh, a tul dang atana hman atan Rs. 10,000 (singkhat) in an tanpui bawk. Chawngte Bial Missions Department te leh mipuite chu Pukpui Bial chungah an lawm hle a ni.

Tin, Biakin sak (Work Camp) hi Rahsiveng Bial Missions Department-in, “Kan lo tum ve ang e” an ti a. Ni 11.1.2006-ah Chawngte Bial Missions Department nena tang kawpin Chawngte atangin mi 11 leh Rahsiveng Bial atangin mi 11, an vaiin mi 22-in Biak in tha tak, a dung 30ft a vang 16ft-in an sa a, a chung rangva chu District Kohhranpuiin 5 bdls-in an khuhsak bawk a ni.

HMALAKNA LANGSAR

Chawngte Bial Kohhranpuiin, “Zehtetah hian Evangelist rawih ni se” a lo tih angin Bro. Lalramhluna of Mualthuam chu thla khata Rs. 2,500/- lawmman pein kum khat chhung a ruai ta a. Chawngte Kohhranpuiin a rawih hnu hian Lunglei District Missions Department-in Missions Field-ah puangin 2006 kum tawp, Lunglei District Missions Board neih a ni a. Tichuan, Evan R. Lalramhluna chu thawk zui turin a la zui ta a ni. Hemi hnu hian Evangelist hrang hrangin an thut zui a, chung mite chu hetiangin :

1. Evan. R. Lalremsiama (2009-2012)
2. Evan. Lalhriatmawia Tualzik (2013- 2014)
3. Evan R. Laldawngliana ( 2015-2016)
4. Evan. Muanpuia Kawlni (2017-2018 march)
5. Evan. C. Lalrinzuala (2018 May –
6. Evan R. Lalrokhawma (

TUN DINHMUN

Ni 3.3.2019 khan Setana hnathawh avangin Kohhranin hun harsa tak tawkin, Kohhrana member pawh tla hniam dawrhin mi 37 atangin mi 28-in Kohhran an chhuahsan a. Kohhran member pawh 9 kan lo ni ta a. Amaherawhchu, Lalpan a ropuina a puan chhuahna tur hmanrua leh kan pun leh zual zawkna tura Lalpa hun ruat a lo ni reng mai a, tun dinhmunah Kohhran member 45-a pungin, an vaiin Kohhran member 54 kan lo nei ve la ta a ni.

2025-2026 Kohhran hruaitute :

• Chairman : Upa Khawndawla
• Secretary : Upa Lalhmachhuana
• Treasurer : Rbt. Biakthansanga