Thenhlum Khua hi Lunglei District chhunga awm niin, Lunglei atanga khaw thlang lam 109 kms-a hlaa awm a ni. Khaw hmun rem tak leh chak lak nan pawha rem tak a ni. Tuna a awmna hi kum 1989-a khaw thar kaiin Sorkar Department pawimawh tak tak te dah a ni a, Kau Mini Hydel Project tui khuahna hmun a ni bawk. Tunah hian In 250 chuang a awm mek a ni. Kohhran Biak In, Pathian thu hrila rawngbawltu ten an lo tlawh fo tawh thin a, chung zinga rawngbawlna sul lo su hmasatu thenkhat han tarlang ila :

1. Pi Thanthuami a khawhming hriat loh.
2. Pu J Thantluanga of Darngawn.
3. Pi Hniangdawhi of Thigsai.
4. Pu H. Tebawnga of Tualbung.
5. Pu Biakmawia of Rawpui te hian sul lo suin kawng an lo sat a, heng Lalpa tana pasalthate hi he khawvelah awm tawh lo mahse, keini Thenhlum Local UPC te chuan kan theihnghilh ngai lo vang.

KOHHRAN DIN TURA HMALAK A NIH DAN :

A chunga thuhrila lo lut ta Pu T. Thantlunga leh Pi Hniangdawhi te hi a ruala lo kalin, rawngbawlna an lo nei a, he rawngbawlna neia an lo kal hian Pu C. Zahnuna (Sist C. Lalbiaki Pa) te Inah an innghat a ni. Hetih hun lai hian Mizoram Baptist Kohhran chiah a la awm a, Kohhran dang tan hmun a awm lo reng reng a ni. Anmahni thlengtu nih pawh chu, mi dem leh huat hlawhna mai a ni thin. Lalpa remruat, dan rual loh chu lo langin thlen In leh thusawina hmun tur thlengin rem a lo ruat fel diam a ni. Pu Lalbuanga, Middle School Headmaster Inah thu sawitir niin inkawm khawmna hun te an hmang thin a ni. Heta thusawitu hmasa ber hi Pi Hniangdawhi a ni a, Isaia Bung 2:1-3 thu hmanga thu sawiin Lalpan a thusawi mal a sawm hle mai a, an hlim hle a ni.

Hetih hun lai hian Baptist Kohhranah Thlarau hnathawh a thleng thin a, mahse an Kohhran hruaitu thenkhat ten Pathian hnathawhah ngai lovin an awihsak duh lo a ni. Mahse Thlarau thianghlimin a pawl te eng emaw zat an awm zel a, an awmna Kohhranah chep tiin leng lo intihna a lo awm ta a. Tichuan mikhual rawngbawltute nen chuan zan lamah te leh an hunawl neihah chuan inkawm hona te neiin, Pathian thu sawi hona te an nei thin a ni. Pu Zahnuna Inah an inkawm thin a ni. Anni rawngbawltute haw hnu pawh chuan, he khuaah hian Lalpan rawngbawl turin mi hrang hrang a tir lut zel a. tichuan mi hlimho chuan an awmna Kohhran chhuahsan a, United Pentecostal Church din zai an rel ta a, dodalna leh hmuhsitna nasa tak karah, heng chhungkuate hian kum 1963 January ni 3 khan Thenhlum tlangah United Pentecostal Church chu an din ta ni. Chung chhungkua te chu :

1. Pu Zahnuna te chhungkua
2. Pu Lalbuana te chhungkua
3. Pu Lalbuaia te chhungkua
4. Pu Zaiaithanga te chhungkua
5. Pu Lalthangvunga te chhungkua
6. Pi Siamliani te chhungkua
7. Pi Thanthuami
8. Pi Lalbani te an ni.

KOHHRAN DIN A NIH DAN LEH BIAK IN NEIH DAN LEH SAK CHHOH DAN :

Chhungkaw tlem te te ni hlawm mahse; Inkhawm hran te an lo duh ta a, Ni 3.1.1963 khan Pu Zahnuna te Inah inkhawmna hmasa ber neiin, Pastor Rotlaia, Lunglei atanga lo chhukin, Kohhran din a lo ni ta a ni. Kohhran hruaitu pawh form nghal an ni.

Chutianga Kohhran lo ding ve ta chu, Kohhranhoten a huhova Pathian fak nana mimal In hman reng thu awm suh, Biak In neih zai relin a hmun tur te, VC hnenah an dil ve ta a ni. Khaw hlui Pu Kila In hmun chu a ruak a ni tih hriain an dil ve ta a, VC te pawhin pein hnatlangin sak zai an rel ve a, a banah thingtuai, a chungah Siallu, a bangah dap leh a thut nan maupum khamin Biak In chu a lo ding ve ta a, a len zawng hi tun lai anga tehna mumal tak an nei lo va, a dung lam Patling hlam nga (5) (24Feet vel) leh a vang lam Patling hlam thum (3) (15ft vel) a ni. Pulpit atan pawh dap siam chawpin nuam ti takin Lalpa an lo fak ho za thin a ni. Hun lo kal zelin, Khawvelin changkan lam a pan zel a, kum 1994 khan a chung rangva, a bang Tile-in sak a ni ve ta a. A hma zawngin Dap rapin sak a ni. Tichuan hun a kal zel a, theih tawpa Biak In thar sa leh tura ruahmman a ni a, kum 2006 kum khan Pastor R. Vanlalenga hovin Biak In thar, RCC-in 60X30 a lianin sak a lo ni ve ta a ni. Khawthlang lamah chuan a tha pawl a ni ve thei ta a ni. Kohhran lo din atangin tuna Biak In luah lai hi vawi riat (8) sakna a ni.

Biak in sak hmasak ber atanga tuna luah lai thleng hian Kohhran chhungkua, mimal ten tha leh zung, sum leh pai an seng nasa em em a, tuna hetianga Biak buk pangngai tak tak a lo ding ve thei ta hi, Pathian malsawmna changa Kohhranho inlungrualna leh tanhona, inpek avang liau liau a ni. District Board ten a chung rangva hi min pe a ni.

KOHHRANPUI HRUAITU LO NI TAWH TE :

CHAIRMAN LO NI TAWH TE LEH NI MEK :

1. Bro. Lalbiaka
2. Upa Lalchhawna
3. Upa Vanlalthanga
4. Upa Liankunga
5. Upa Valliana
6. Upa Vanlalthanga
7. Upa Lalthuthlunga Sailo

SECRETARY LO NI TAWH LEH NI MEK :

1. Upa Lalbuana
2. Upa Lalthangvunga Sailo
3. Bro. Lalremsanga Sailo
4. Upa H. Lalhuapzauva
5. Upa H. Lalchhuanawma
6. Upa Lalthuthlunga Sailo
7. Upa RL Ngaihzuala

TREASURER LO NI TAWHTE LEH NI MEK :

1. Bro. C. Zahnuna
2. Upa Lalthangvunga Sailo
3. Upa R. Thangphunga
4. Upa H. Lalhuapzauva
5. Upa RL Ngaihzuala
6. Upa C.Lalhlupuia

VICE CHAIRMAN LO NI TAWHTE LEH NI MEK :

1. Upa Lalbuana
2. Upa Vanlalthanga
3. Upa Lalthangvunga Sailo
4. Upa Valliana
5. Evan Lalhmingliana Sailo

ASSISTANT SECRETARY LO NI TAWHTE LEH NI MEK :

1. Bro. R. Ramdinmawia
2. Upa C. Lalhlupuia
3. Bro. Sangkima Sailo

FINANCE SECRETARY LO NI TAWH :

1. Evan Lalhmingliana Sailo

SAWMAPAKHAT TREASURER NI TAWHTE LEH NI MEK :

1. Upa Lalthangvunga
2. Upa R. Thangphunga
3. Upa Lalthuthlunga Sailo
4. Upa H. Lalhuapzauva
5. Upa C. Lalhlupuia

BUHFAITHAM KAWLTU NI TAWHTE LEH NI MEK :

1. Sist. Lalbiakveli
2. Sist. NG. Lalhlimpuii
3. Sist. Biakliani

KOHHRANA THIL THLENG CHHINCHHIAH TLAK TE :

Kohhrana thil thleng chhinchhiah tlak tak tak chu sawi tur a awm nual ang, mahse a then a zar chauh han tarlang ila, thenkhat tan thil ho a ni mai thei a, keini tan erawh chuan a ho tlat si lo a ni. Chungte chu :

1. Kum 2016 leh 2017 chhung hian Pathian venna changin Kohhran member boral kan nei miah lo a ni.
2. Ni 1.3.2013 khan Kohhran (Local) Golden Jubilee ruai nena lawm a ni a, Upa Denghnuna ten a lawmna ruai hi an tum a ni. Souvenir 40 Copies tih chhuah a ni bawk.
3. 1995 September ni 25 khan UPC Kohhran Golden Jubilee lung phun a ni a, Upa Valliana te chhungin chawimawi nan vawk sum 6 (ruk) an pe a ni.
4. Kum 1992 Chrismas kha Kohhranhoten Chrismas kan hman hlim ber tum niin, Christmas atanga ruai theh tanin vawi 12 ruai nawn a ni.