Lungpuizawl Local Chanchin

He Kohhran hi Theiriat Bial chhunga awm, Hrangchalkawn nen veng inzawm deuh thawa awm a ni a. Zobawk leh Hrangchalkawn inkara awm a ni. Tun hma chuan UPC member awmte hi Hrangchalkawn Local-ah an lawi vek a, hun lo kal zelah member-te an lo pung a, inkhawmna a lo hla tham bawk nen, Rev. P. Rodawla bial laiin inkhawm hran duhna an nei ta a. Tin, 1995-ah V.C. hran an nei ta bawk nen, Local hrana din ve chu awm an ti viau a. Chu rilru chu a inhlawm nghet telh telh a, Ni 29.1.2003-ah Bro. Vanlalpeka chenna, Vety Quarter-ah in dan chungchangah nu leh pate chu an inhmu khawm a. Bro. Vanlaltlinga’n a kaihruai a. Adhoc Committee an din a. Chuta puipate chu :

Hemi hnu hian Section Board-ah in dan an duhna chu an thlen a, Section Board chuan an ngaihtuah a, an in dan chu an remti a. Ni 4.5.2003 chu in dan ni atan an ruat a. Biak In sakna tur chu an thawh belh zela a. V.C-ah Biak In hmun atan tuna a hmun hi an dil a, pek an ni. Mahse an la sa nghal mai thei lo va. Bialtu Pastor Rev. P. Rodawla’n Ni 4.5.2003 (Pathianni)-ah Kohhran puipate hetiang hian a form :

An in dan ni hian Rev. Zalawma, District Superintendent-in a hmanpui.

Ni 6.5.2003 Tuesday-ah Bialtu Pastor Rev. P. Rodawla ho bawkin Department dang hetiang hian form a ni :

Kohhran in dan tirh hian member 53 an ni a, mipa - 32, Hmeichhia - 21.

Biak in sak thu :

A hmaa sawi tawh angin V.C-in Biak In hmun a pek fel tawh chu Rev. P. Rodawla hovin Ni 16.10.2003-ah Revenue Department lamte nen teh a ni a. Biak In hmun thuah hian harsatna deuh an nei a. Mahse, an V.C President Bro. Lalrinmawia, kan Church Board member ni bawk thahnemngaihna leh felna avangin an teh fel thei a, an lawm hle.

Bialtu Rev. P. Rodawla’n Biak In lungphum a phum a, Biak In sakna tur sumtuak belh zel a ni a, Bial chhung Local hrang hrangin an pui nasa a, a lawmawm hle. Biak In tak neih hma hian Upa Lalbiakliana te in, la sak zawh loh deuh chu inkhawm theih nan buatsaih a ni a, chutah chuan hun rei fu chu an inkhawm rih a ni. Biak In sakna tur sum thawhtute leh an thawh zat chu hetiang hi a ni :

A khat tawkin pawisa tuak zel a ni a. Rs. 2,220/- an tlin chho ta a. Bial chhung Local hrang hrang atangin tanpuina, tha leh sum te hmuh belh a ni zel a. A chung tur Rangva chu District Kohhranpuiin a tumsak bakah, District LAD pawhin Rs. 3,000/- in an pui bawk. Dr. K. Lalchhuanawma, Vety Farm Manager-in Pulpit a pek bakah, a chhuat zutna tur Balu tin 20 leh Dar a pe bawk. Tin, Bro. Lalchuailova, Bazar veng Lungleiin tukverh darthlalang a tumsak vek a, Hrangchalkawnin Rs. 1,000/- leh Bro. C. Thasiama’n Rs.1,500/- in an tanpui bawk.

Member an tlem avangin an sa rei fu a, thingzai leh a bang Tile-in an sa a. Skirting pawh rangva an hmang a ni. A dung lam Ft 30; a vang lam ft 18-in an din a, a kawt lam in te neia sak a ni. Biak In sak nan tha 235 sen a ni.

Tichuan hetih laia Bialtu Pastor, Rev. P.C. Doliana’n Ni 25.3.2006 Inrinni-ah a hawng a, ruai theh a ni a, chhimtu pawh mi za chuang an ni. Theiriat Biala Local tin atangin he Biak In hawnna hi an hmanpui a. Ruai atan hian vawk leh ar talh a ni. Tuna an Biak in luah lai hi kum 2011-ah thiatin, a ren hlui te-a sa lehin a hmun sawn a ni a, Rev P. Lalthanga, Bialtu Pastor hovin hawnna an nei. Tunah hian Biak in thar sa turin an inruahman mek a, Ni 26.1.2026 (Thawhtanni) khan Bialtu Pastor, Rev. R. Lalsangzuala’n Biak in lungphum a phum a, ban khur laih hnatlang neih nghal a ni bawk.

Tun dinhmun :

Lungpuizawl Local-ah member 60 (kum 2025 report) an awm mek a, Upa - 3, Rawngbawltu - 2 an awm mek.