Sertlangpui khua hi Lunglei leh Buarpui inkar, Lunglei atanga hmar lam 50 km vel a awm a ni. In 100 khua niin mihring 500 atanga 600 inkar vel an cheng a, Kohhran pawh pathum Baptist, UPC Leh IKK te an awm a ni.

UPC LO DIN DAN :

Kum 1963 November thlaah Haulawng atangin, Pastor Zabuaia hovin Malsawma, Lalhlira, Kamlova leh T. Bualzika te, Sertlangpuiah UPC Kohhran din turin mi thahnemngai te lo kalin, Ni 15 November 1963-ah UPC Kohhran chu din a lo ni ta a ni. Hemi tum hian mi 26 velin Isua hmingin Baptisma an chang nghal a, hemi hma hian pu H. Sangzuala chu Thenhlum khuaah zirtirtu hna thawka a awm lai hian, Baptisma a lo chang tawh a. Ani hi Sertlangpui khua Isua hminga Baptisma chang hmasa ber a ni. Kohhran din tan tirha memberte chu H. Sangzuala, Taithuama, Thanzuala, Laltawnga, Hautlaia, Lalsiama, Dengkhuma, Dawlpinga, Chhiarkunga, Thanseia, Zasiami, Laldengi, Hualkungi, Biakliani, Zasangi, Saikhumi, Lalhmuaki, Rozama, Lalchuailova, Lalrawngbawla, Lalzarmawia, Lalrinawma, Rochhingpuii, Chalbuangi, Saithuami, Ngaihzuali leh Lalremi te an ni.

KOHHRAN HRUAITU HMASATE :

Kohhran upa hmasa ber chu upa Thanzuala a ni. Upa Thanzuala, Taithuama, Laltawnga, Hranghlira, Dawlpinga, Hautlaia leh H. Sangzuala te an ni a. Hranghlira hi Baptist upa a nih laia lo lut a ni.

BIAK IN :

Kohhran din a nih hian member an tam loh avangin, Biak in han din nghal mai a theih loh va, Pu Laltawnga leh Pi Laldengi te inah an inkhawm thin a, Kum 1964-ah Biak in hmasa ber tur chu sak tan a ni ta a ni. Kum 1966 rambuai lai, khaw hal khan biak in pawh hi a kang a. Kum 1972 hruai khawm kir leh hnu hian, Bawk te khawr leh a ni a, kum 1974-ah Biak In pangngai chu sak leh a ni ta a ni. Kum 1991 Cyclone thlipui tleh khan Biak In chu a chhem thlu a, Biak In kan neih tak lohah chuan, Kohhran in hrang hrangah an inkhawm kual thin a, hemi kum Favang lai hian tuna Pastor Quarter tlangah hian, bawk te khawh leh a ni a, Kum 1994-ah tuna Biak in hmun (a hma chuan Primary School hmun niin, 1991-a Cyclone tleh khan Primary School hi chhem thluin, Middle School bulah sak sawn a ni)-ah hian a vawi 3-na turin, Biak in hi sak leh a ni ta a. Tichuan hun a lo kal a, Kohhrante pawh kan lo pung ve zel a, a tum 4-na turin tuna kan Biak In luah lai hi kum 2009-ah sak tan leh a ni ta a ni. Ti hian Biak In pangngai hi tum 4, bawk te tum 2 sak a lo ni ve ta reng a ni.

DEPARTMENT LAM :

1. Ladies Auxiliary Department(LAD) : Hun a lo kal a, Kohhran pawhin punlam a lo pan ve zel a, kum 1974 March ni 20-ah Ladies Auxiliary Department chu din a lo ni ve ta a. President hmasa ber chu Sist. Sangkungi a ni.

2. Pentecostal Youth Department (PYD) : Kum 1973-ah thalai pawl chu din a ni a, Conqueror tih a ni. President hmasa ber chu Zasiami a ni. Mipa lam an awm loh avangin, a kum leh 1974-ah LAD tiin an thlak leh a ni. Tichuan hun a lo kal leh deuh a, kum 1977 October ni 11-ah, PYD chu din thar leh a ni ta a ni. President hmasa ber chu Hmarchhinga a ni. Kum 1982-ah Dist PYD Conference pawh an dawl ve tawh a ni.

BIAL CENTER-AH :

A tirah chuan Sertlangpui hi Bunghmun bialah dah a ni a, kum 1977 Bial inkhawmpui, Thenhluma neih tumin Sertlangpui chu Thuampui bialah sawn a ni. Kum 1982-ah Thuampui Bial tih chu Sertlangpui Bial tia thlak a lo ni ta a, hemi kum hian Pastor Quarters pawh sak nghal a ni. Pastor PC. Lunghnema chu pastor awm hmasa ber a ni a. Pastor Quarters hi tuna luah lai nen hian vawi 3 sak a ni tawh (Pastor Quarters awmna tlang hi tun hma chuan Pu Tila in tlang tih a ni thin).

TUN DINHMUN (2025) :

Tunah chuan Sertlangpui Local UPC pawh a din atanga kum 63-na a lo ni ve ta reng mai a, Kohhran pawhin nasa takin hma a sawnin, member pawh kan pung ve zel a, a tam ber dawttu kan ni ve mek. Kohhran member hi 160 vel an ni (report siam lai 2025)