Chhumkhum :

A khaw hming hi ‘Lukhum’tiha, a ‘Khum’ lai kan lam ang rik anga lam rik tur a ni. A awmna lai hi Lunglei District khaw thlang lam, Lungsen khaw thlen hma 9 Km vela awm, Chawngte panna kawng pêng thuam lai taka awm a ni. Tun hma deuh khan BRTF-in Camp an nei thin. Tin, Agriculture Department hmun pawimawh tak, Seed Farm awmna a ni bawk. Lungsen VC ram chhûnga awm a nih avangin, an phalnain khaw pangngaia awm an dil a, Kum 1981-ah khua angin an awm a, a din tirh chuan chhungkaw hnih chauh an awm a. Tichuan kum 1985-ah Rangte khua atangte-in mi tlem te-in an belh leh a, hêng mite hi Rangte khuaa UPC member ni sate vek an ni.

2023-ah chuan In 60 dawn lai awmin, mihring pawh 280 chuang lai an lo awm ta a ni. Mahniin VC an la nei lo va, Lungsen VC hnuaiah an la awm a, Village Council Chairman kaihhruaina hnuaiah an la awm mek a ni.

UPC din chhoh dan :

Ni 4 September 1985 (Zirtawpni)-ah Lungsen Bialtu Pastor, T. Bualzika hovin, bial chhung khaw hrang hrang, Lungsen atang te, a then Lungrang atang te,Rangte atang te-a kal khawmin, mi 70 chuang laiin, Revival buatsaih a ni a. Hetih lai hian Kohhran dang tumah an la awm lo, heta hman atan hian Lungsen ‘S’ Local UPC te chuan, Khuangpui leh Khuang tê an pe nghe nghe a ni. Tichuan, Biak In nei lo an nih avangin, District lamah dîlna an thlen a, pek leh tihsak an nih loh avangin PCI lam ten chu chu hriain an lo thlem a, Biak In sak an intiam a, chuta tang chuan, Kohhran dangah awmin, Kohhran chu sawi tur kan nei lo zui ta a ni.

Din thar leh dan :

Ni 6 August 2006 (Pathianni) hian Lungsen Bialtu Pastor, Rev. K. Lalchamliana a nih laiin, a kaihhruaina hnuaiah ama hovin, Mobile Crusade neih a ni a, hetah hian mi thahnemngaite chuan an lirthei eng emaw zât thawh chhuahpuiin, Mi 300 (Zathum) zet mai pungkhawmin, Pu Dines-a H/o Nazii te In kawng pêng lun lai takah chuan, inkhawmna neih a ni. Hetah hian Kohhran din nghal a ni a, NEI UPC ni turin member -19 (sawm pakûa) ziak lûtin, mi 8 (pariat) in Lalpa Isua hmingin Baptisma an chang a, Nau - 3 (Pathum) hlan a ni bawk.

UPC Kohhran a lo dinna tur hian, hetih laia Lungsen P/S 2nd OC, Bro. V. Zadinga chu thahnem a ngaiin, a tangkai hle a ni. Kohhran hruaitu in-form-na neih zui a ni a :

Kohhran Upa atân ruatte : 1. V. Vanchhunga    2. Vanlalliana

Kohhran hruaitute :

Kohhran ding tir mai an nih avangin, Upa V. Vanchhunga Inah hian hun eng emaw chen chu an inkhawm a, a hnu deuhah Church Auxiliary for Social Action (CASA) Godown chu an C.O te leh, Aizawl lam Hqrs. te biain, lehkha siamin fel fai taka bawhzui a ni a, vanneihthlak takin phalna hmuh a ni ta a ni. Chu Godown Building chu hun rei tak, Biak In atân hian luah a ni. Hetih lai hian a bul maiah, Biak In hmun tur chu remchang takin neih a ni leh ta a ni.

Biak in sak dan :

Biak in hmun neih a nih takah chuan, anmahniin Biak in sak mai an harsat si avangin, District-ah dil a ni a, Disrict Board vawi 156-na chuan Rs. 1,00,000/- sanction-in, chumi hmang chuan District-in tuna Biak in hi a sa ta a ni. Kohhrana lo dinna tura sulsutu leh tha leh zung, sum leh pai senga theih tawp lo chhuahtute hi, an fakawm takzet a ni.

Chhumkhum Kohhran dinna tur hian a bik takin, Bialtu Pastor Rev. K. Lalchamliana thahnemngaihna leh tumruhnate leh theihtawp tak meuh a chhuahna avang chauhvin, Kohhran hi din a ni kan ti lo thei lo va, Pathian hnathawh chu sawi lohah ngai ta ila. Tin, Biak In hmun neih theihna tur pawh hian, ama ruahmanna veka heng thil pawh hi awm a ni bawk. Lalpa’n ropuina chang rawh se.

Home Mission Field-ah :

Kum 2013 atangin District Mission Department-in Home Mission Field-ah puangin, Home Missionary-in an lo thut tawh thin a. District chhawra thawk tawh te : Evan. Muanpuia Colney, Evan. Lallawmsanga te an ni. Lungsen Bial chhawrin Evan Lalrokima Chhangte, Rbt. C. Lalhriatzuala te an thawk tawh bawk. Kum 2017 atangin Mission Field a nihna chu khar leh rih a ni. April 2023 atangin thawktu, Bial Missions bul tumin (Home Missionary) an ruai ve leh ta a ni.

Tun dinhmuna hruaitu ni mekte :

Tun dinhmunah Kohhran hi chhungkaw li (4), Home Missionary hovin an awm a, member hi 18 (Kum 2025) vel an ni mek bawk.