KOHHRAN CHANCHIN TLANGPUI

Sesawm khuaah hian Kohhran din a nih hma hian an chheh velah UPC a lo ding fur tawh a. Chuvangin UPC rawngbawltu Rev. Hrangchhina leh Rev. Chuauruma leh mi dang ten an paltlang tawh. Chung zingah chuan tirhkoh Tebawnga chuan Laisawral tlawh pahin kum 1964 March thlaah rawngbawlna a nei a, Laisawralah 8th March, 1964 Pathianni an hmang a. Chuta tanga chang relin rawngbawlna a nei ta a. Pu Lalhliapa te inah inkhawmna an buatsaih a, a rawngbawlna a tla tha bawk a. Ni 12 March 1964-ah Pu Lalhliapa te, Pu Lianhrima te, Pu Rothuama te, Pi Zairemthangi ten Isua hmingin tirhkoh Tebawnga kutah chuan Baptisma an chang ta a. A tam zawk chuan Ni 15 March 1964 Pathianni-ah an chang a, he mi ni hi Kohhran hming pu thama inkhawmna ni hmasa berah ngaih a ni ta a ni. Member 30 lai an ni nghal ta a ni.

Sesawm Kohhran a lo din hian Upa atan Lalhliapa, Dengbuaia, Lalchhana te ruat an ni. Heng bakah hian rawngbawltu atan hian Hualkunga te, Rothuama te, Lalkhuma te, Vanlalsawma te, Vanropuia te, Siamreia te an ni a. Thalai lamah chuan Lalhluama te, Hranglura te an ni. Kohhran din tirh atanga hun eng emaw chen chu Pu Lalhliapa te inah an inkhawm a, a lo hahthlak deuh bawk avangin Pu Dengbuaia te inah pawh inkhawm a ni thin. Baptist Kohhran atanga rawngbawlna nei sa Pu Lalhliapa te, Pu Dengbuaia te, Pu Hualkunga te kaihhruaina avangin Kohhran an changtlung sa viau a, a thlamuanthlak viau a ni.

HRUAITU HMASATE

BIAK IN

Kum 1965 atangin Biak in an puah tan a, Thingzai ren hmanga sak niin a chungah erawh chuan Di an hmang thung a, Tum 6 lai sa tha tawhin Biak in an sak that apiang hian Ruai buatsaih a ni thin a, tuna an luah mek hi Sesawm Vengchhak Local a lo pian takah chuan Sesawm Vengthlang tia a hming vuah a ni ta a. RCC-a sak a ni a, Biak in mawi hnai tak a lo ni ve ta a ni.

THIL THLENG CHHINCHHIAH TLAK

Sesawm Kohhran hi Kohhran nung tak mai niin, rawngbawltu hmasate sul lo sutna azarah Kohhranin hma a sawn em em a, Thlarau thianghlim awmpuina pawh an chang em em a ni. Thlarau lam hlimna pawh an chen nasain an tawng sang thei hle. Pathian chawimawina neih uar tak mai khua an ni a, chawimawi nana an ran hlan lo chhungkua khu an tam lo hle awm e. Hunpui an hman a piang hian chawimawina hian an chhunzawm deuh ziah thei thin a, mimalin an rante an thawh a, chutiang chuan hlim takin hun an hmang thin a ni. Chawimawina hlan chungchangah chuan, a bikin Upa Lalkeuva Sailo leh Upa Vanlalawia te hian Chawimawi nan an ran an hlan hnem hle mai a, Upa Lalkeuva hian vawi za chuang Pathian chawimawi nan a ran te leh Sum leh paiin hun a lo hmang tawh a, a zat tak a lo chhinchhiah loh avangin hriat theih a ni lo hi a pawi tak zet a ni. Upa Vanlalawia pawh hian vawi 46 lai mai Pathian chawimawi nan a ran te a lo hlan tawh bawk a ni. Thlarau lam hlimna an han chen a, an lam key 'Zik pik' leh 'Pik Zik' an tih te chu khaw dangin an neih ve loh a nih vangin a hmingthang hle a, chutiang ang key a han thlen te hi chuan, an lam hi hmuhnawm thlira thlirtute tan phei chuan thil hmuhnawm tak pawh a tling ve hial awm e. Chung lam Pathian ngaihah pawh lam ze ropui tak a ni ve ngei ang. Pathian malsawmna dawnga hlimna an han chen tak tak hi chu, kum 1984 kumah phei kha chuan, Pathian chawimawina an nei nasa bawk a, Baptist-ho vah chap ro vek hnuin Lo vah an tan ve thei chuah a ni. Miten, "Tam hruai, tam hruai," an ti a, mahse an vah chap pawh a la hrin dup laiin Lo hal an rawt ta mai a, an han hal a, thlawh hma tha pawh neia mawi lo, chumi kum chuan UPC-ho chuan buh an ngah ta em em a, pûr châwk nan khaw danga mite pawhin an hmang hial a ni awm e.

TUN DINHMUN

Sesawm Vengthlang Local-ah hian tun dinhmun (2025 Half yearly Statistic Report) ah Member 154 (Mipa 88, Hmeichhia 66) an awm mek a ni.

2025-2026 KOHHRAN HRUAITUTE