S. PHAILENG KHUA HI

S. Phaileng khua hi Kum 1974-a din a ni a. Khaw la upa lo tak a ni. Rambuai avanga khaw sâwi khâwmah Hnahchang khua chu Pangzawlah sâwi khâwm a ni a. Hun eng emaw chen Pangzawl lama an awm hnuah, Sorkarin mahni khaw lama let leh phalna (Order) a chhuah khan, Hnahchang pa hote chuan, Lalbuanga hmuna chhuk an rawt a. Lungrual takin Lalbuanga hmunah chuan an chhuk ta a ni. Heng zingah hian Rambuai hma, Hnahchang awm laia UPC lo ni tawh an awm nual a, chunghote chu Lalbuanga hmuna awm lai hian, Pu Saipianga inah an inkhawm thin a ni. Chutih lai chuan Pu Saipianga te chu Baptist Kohhran an ni nghe nghe.

Hun eng emaw chen Lalbuanga hmuna an awm hnuah, Hnahchanga kai duh leh, tuna an awmna, ‘Lungno’ hmuna awm duhten ban pharin an buk a, tichuan tuna an awmnaa awm hi an phar thlu ta a. Kum 1974-ah chuan he khaw hmun luah tur hian an kai phei ta a ni. Hemi hmun hi hman laiin Lalsangliana Lalna khua a lo ni tawh thin a, chumi hun lai pawh chuan Phaileng, an lo ti tawh thin a ni an ti. Phaileng khaw hming put chhan kan hriat dan tlanglawnah chuan, Phaiphek hmun a ni a, Phaiphek a tam em avangin, ‘Phaileng’ tih hming hi a lo put phah ta a ni an ti. Tunah hian In 60 vel leh mihring 330 vel an cheng mek a ni.

KOHHRAN DIN A NIH DAN

Phailenga an awm tan tirh kum 1974 atangin, hun hmasa lam tanga UPC lo ni tawh sa, eng emaw zatte chuan, Biak in nei lo mahse; mimal in, Pu V. Lalauva te inah te inkhawmin Kohhran pangngai angin an awm chho nghal a. Chungho chhanah chuan Rev. Ralianga’n rawngbawlna a nei a. Tichuan Kum 1975 February ni 26-ah, mumal zawkin Rev. Ralianga’n Kohhran a form ta a ni. Chuta hruaitu hmasate chu :

• Chairman : Pu Zatawna
• Secretary : Pu Thankima
• Kohhran form tirh hian member 66 lai an ni.

MEMBER PUN CHHOH DAN

Rev. Ralianga’n rawngbawlna nung tak a nei thin a, Kohhran dangte nen te pawh Debate te an nei thin a, vawi 3-lai an nei nghe nghe a ni. Debate an neih apiangin Baptisma chang tur an awm belh leh thin avangin, BCM lam hian debate chu an khap ta nghe nghe a. Kum 1976-ah phei chuan Baptisma chan runpui neiin, mi eng emaw zatin Rev. Ralianga kutah Isua hmingin Baptisma an chang a ni.

BIAK IN DIN CHHOH DAN

Kohhran a din tirh atangin Biak in nei lovin mimal inah hun eng emaw chen inkhawm thin a ni.

• Biak in 1-na : Kum 1976-ah Biak in hmasa ber chu din a ni a. Tuna Biak in ding lai hnung hnuaiah, tuna Upa. Vanlalduata in hmunah hian a ni. Biak in hmasa ber chu Maurap Ina sak a ni a, Ni 29 February 1976-ah Hnahthial bialtu Pastor, Rev. Ralianga’n hawnna leh Pathian hnena hlanna a nei a, Kohhranhote an hlim hle.
  
  An Biak in hmun chu a biru deuhva hriatna a awm a, Pu Chhawna kawm chhak tlang, tuna Biak in hmun ni ta hi, khawtlang hruaitute hnenah hruaitu ten an dil a. Hetih lai hi VC awm loh lai a ni a, Pangzawl atangin CA-in a bial a, VC awm loh chhunga mawh lo la turin, Pu K. Zaihnuna (2021-a Pangzawl Khawngbawk Upa ni mek) chu CA hian Charge a hlan rih a ni. Pu K. Zaihnuna chuan a lo pe ngawt ngam lo va, tichuan Pangzawl CA hnenah chuan lehkha a ziahsak a, Kohhran aiawhin Pu Saipianga ten Pangzawlah CA, Pu Laltuma hnenah chuan an han thlen ta a, vanneihthlak takin ani chuan, tun thlenga an Biak in hmun ni ta hi a lo pe ta a ni. Biak in hmun thar zau zawng chu : Hmar lamah 29 M, Chhim lamah 22 M, Chhak lamah 33 M leh Thlang lamah 34 M-a zau a ni. Hemi hmun petu Pu Laltuma chungah Kohhranhote an lawm em em a, an hre ve reng a ni. Tin, heng hi Pu K. Zaihnuna inpekna leh sulsut-na rah kan ti lo thei lo bawk.
• Biak in 2-na : Chutia an Biak in hmun awh leh duh lai tak an han nei ta chu, Kohhranhote an phur em em a, thawh hona pawh a that phah hle a ni. Thahnemngai takin Biak in hmun atan an buatsaih nghal a. Zan thla eng hnuaiah te, Petromax eng hnuaiah te, a hmun laiin an hnatlang ta suau suau mai a ni. Petromax hi Lunglei Venglai a mi, Evan. Lalzuithanga pek a ni a, Kohhranhote an lawmin, Pu Zuia hi an theihnghilh ngai dawn lo a ni.
  
  A hmun tur te laih zawh a nih chuan, Biak in hmasa chu thiatin a ren hlui chuan, Biak in chu an sawn chho ta a, he Biak in hi Ni 17.3.1983-ah Maurap bawkin sak peih a ni ta a. A hawnna programme hranpa siam a ni ta lo a ni.
• Biak in 3-na : Biak in sak vawi thumna hi Thingzaia sak a nih avangin, Pu Rosanga Sailo, 2021-a Pangzawl Khuanghlum Local Upa ni mek hian tlawmngaiin a saksak a. A ruhrel thingzai niin, a chung Rangva leh a bang, thum bawh kaihsawih a ni. A dung lam 36ft leh a vang lam 16ft-a sak a ni a, a satu Pu Rosanga chungah hian Kohhranhote an lawm hle a ni. Kum 1987-ah hawn a ni a, a hawnni leh thla leh hawngtu hi mumal taka chhinchhiahna kan hmuzo ta lo a ni.
• Biak in 4-na : Biak in sak vawi li-na hi chu Assam-type pangngai takin sak a ni a, Pu Biakthanga, Farm Veng, Lungleiin a han saksak a ni. A len zawng chu, a dung lam 36ft leh a vang lam 18ft a ni. Ni 8.7.1997-ah bialtu Pastor, Rev. PC. Nghakliana’n hawnna leh Pathian hnena hlanna a neihsak a ni. Hemi ni hian Bawng leh vawk talh a ni a, heng a hawnna senso hi Minister Pu. HL. Ruata’n a tumsak vek a, a chungah Kohhranhote an lawm hle a ni.
• Biak in 5-na : Khawvelin hma a sawn zel a, Kohhranhote rilru pawh a lo changkang zel a, Biak in hmasa a lo hluiin a lo tê tawh bawk nen, Biak in thar mawi tak, RCC ngeia din an rawt thlu ve ta a. Mistiri lamah an buai deuh a, thiam si, rawihna man tlawm bawk si an duh vang a ni. Tichuan, Pangzawl Venghlun a mi, Pu HC. Ramtharnghaka chu Kohhranhoten an han tah awh ta ringawt mai a. Ani chuan an harsatnate hriain, ama hlawh tur chu Kohhranhote ngam tawk a rel tir a, chu bakah, kar khatah vawi khat zel hnatlangin a thawhsak zui a ni.
  
  Ni 2.5.2017-ah, Bialtu Pastor, Rev. C. Hmingthanfala’n Biak in sak lungphum a phum a, Biak in sak chu tan a ni. A len zawng chu, a dung 60ft leh a vang 27ft a ni. Mawi leh nalh deuhin a sak dan tur hlimthla siam a ni a, chumi ang chuan an Mistiri chuan uluk takin a sa a, a sak zawh vek thlengin a thawk a, thahnem a ngai bawk a, uluk taka sa-in, mawi takin a chhuahsak a, Kohhranhote an lawm hle a ni. Tchuan, Ni 2.5.2020 (a sak bul tan atanga a kum thumnaah chiah) hawng tura an inbuatsaih laiin, Covid-19 hripui leng avangin 2021 thlengin an hawng thei ta rih lo a ni. An Biak in thar hi a mawiin a chhuanawm hle a ni. He Biak in mawi tak hi, Bro. R. Lalmalsawma Chanmari, Lungleiin Estimate a khawihsak a, a lem (Blue print) hi Bro. Lalnunsanga (Sangtea), Venglai Lungleiin a duansak a ni bawk.

THIL CHHINCHHIAH TLAK LEH JUBILEE

Thil chhinchhiah tlak : S. Phaileng Local hi a din tirh, Kum 1974 atangin kum 1985 thlengin Hnahthial bialah a awm a. Kum 1985, Pangzawl bial a lo din khan, Pangzawl bial huam chhungah awmin, Pangzawl bial an ni leh a. Kum 1986 atangin District Board rorelna angin, remchan zawkna avangin Haulawng bialah awmin, tun thlengin Haulawng bial an ni ta a ni.

Silver Jubilee : Ni 26.2.2000 khan an bialtu Pastor thar, Rev. PC. Rosanga, Speaker a hmangin, Silver Jubilee hlim takin an hmang a, Jubilee lung te phunin ruai nen hlim takin hun an hmang a ni.

TUN (2025) DINHMUN LEH HRUAITUTE

Tun (2025) dinhmun : Tunah (2025-ah) hian Kohhran hi chhungkua 17, member 86 an awm mek a ni.

2025-2026 Kohhran hruaitute :

• Chairman : Upa C. Lalthuama
• Secretary : Rbt. C. Vanlalsanga
• Treasurer : Rbt. C. Vanlalduata
• Statistician : Upa V. Lianzuala