HAULAWNG LALVENG LOCAL KOHHRAN CHANCHIN

Haulawng khua hi khaw upa tak a ni a, an khaw Centenary pawh an lawm daih tawh a ni. Haulawng Lalveng hi hman lai ata tawh Lal thut hmun, khaw hlun lam a ni a. Veng dang hi chu a khaw zauh zelna veng a tih theih awm e.

KOHHRAN LO DIN DAN LEH DIN NI

Haulawng Lalveng pa, Pu Lalruala te nupa hian 1961-ah Isua hmingin Baptisma an lo chang tawh a, an ni nupa hian UPC Kohhran a din theih nan thahnemngai takin an lo tawngtai fo tawh thin a ni.

February ni 28, 1962 atanga March ni 4, 1962 hmanga Lunglei Rahsiveng hmuna UPC General Conference hmanga lo kal, Evan. Saithanchhunga, Hmarchhak lam bial, Pastor Vankunga biala Tirhkoh hna thawk lai chu, inkhawmpui tiak veleh Haulawnga rawngbawl turin chah a ni a. Lunglei lam Pastor, Pastor Lalthima leh Evan. Hrangchhin’n an rawn tawiawm a, Mausen Upa ho leh Thalai thenkhat ten an rawn tawiawm bawk.

Kohhran a ding ta :
Evan. Saithanchhunga te rawngbawlna chu Lalpan mal a sawm hle mai a, Baptisma chang turte an lo awm ta a. Tichuan Ni 11.3.1962 (Sunday)-ah chuan, Baptisma chan runpui chu buatsaih a lo ni ta a ni. Hemi tuma Baptisma chang hmasa ber chu Pi Lalsangi a ni nghe nghe. Mi eng emaw zatin Lalpa thuthlung hmuin Baptisma an chang a, inkhawm hrang tham an ni nghal hial a ni. Hemi ni atang hian inkhawm hrang nghalin, hemi ni hi Kohhran din ni-ah pawm a ni bawk a ni.

Baptist Kohhran atangin an Rawngbawltu mi pawimawh tak tak an lo lut a, chungte chu - Pu Sawithanga, Pu Chalhnuna, Pu Chaltluanga leh Pu Ziktea te an ni. Anni hi Haulawng Lalveng Kohhran hruaitu pawimawh hmasate an ni.

Kohhran Form hma boruak :
Kohhran angin awm hrang mahse; hun eng emaw chen hruaitu tur ruat (form) chuang lovin an kal a, an phur a, an pung chak bawk si a, member 120 an tling thuai a. Chutia Committee bik pawh awm ta chuang lo chu, paho phur zualin inhmuh khawm rawtin ro an rel leh ngawt thin. Chung inhmu khawm hote chu Upa emaw, rawngbawltu emaw an ni chuang lo va, hetianga pulpit kai thei pawh ni lem lote thahnemngaihna hi a ropui thin tak zet a ni. An zingah Pu Hrangbuka chu hotu deuh berah an hmang a, mi dangte chu, Pu Lalchaia, Pu Saihranga (Haulawng Lal), Pu Dengbuaia, Pu Sawivela, Pu Lalkhama leh Pu Satkhama te ho an ni.
Zan tin an inkhawm thin a, an hlimin an phur em em a, an ri vut vut a ni ber mai. Mikhualin an rawn tlawh deuh reng a, mikhual neih loh lai an nei ngai mang lo. An inhaw chhawk reng bawk a, pawl dangin mak an ti thei hle thin.
Haulawng Lalveng UPC ding tir vanneihna em em pakhat chu, Haulawng Lal nupa-in an support tlat piah lamah an telpui tlat hi a ni. Mi ten hmusitin diriam viau thin mahse; Lalnu leh Lalpa avangin an ti tak tak ngam lo va, Kohhran a zahawm ru tlat a ni.

BIAK IN DIN CHHOH DAN

Kohhran a lo din hian Biak in an neih mai loh avangin, Pu Dengbuaia te inah an inkhawm thin. A in neitute inhawng em em mahse; member an lo pung zel bawk nen, Biak in sak zai an rel ve ta a.

• Biak in 1-na : Biak in hmasa ber tur chu, Kohhran din kum, 1962-ah tuna Biak in dinna hmunah hian an sa chho ta a. An phur tlang bawk a, Maurap inin an sa zo thuai a, he Biak in hi Pastor J. Laltluanga’n a hawng a ni. Lalpan Thlarau thianghlimin a luahpui a, an luah zan phei chuan Zion hlapui nena hun hmangin, zan dar 10:00 thleng an inkhawm nghe nghe a ni.
• Biak in 2-na : Hun lo kal zelah Biak in chu Maurap mai a nih avangin a lo rawp tan a. Tin, a lo te deuh tawh bawk nen. Kum 1965-ah Kohhran rorelnain Biak in sak ni se a tih angin an intuak chho leh ta a. Biak in sa tura an intintuah laiin, 1966-ah Ram a lo buai tak avangin Biak in an sa hlei thei ta lova. Kum 1968-ah an sa thei ta chauh a ni. Biak in pahnihna hi a dung 30 ft. leh a vang lam 15 ft-a zaua sak a ni a. Thingzai Ina sak niin, a chungah pawh Rangva an chih a, an chhuang ve hle a ni. He Biak in hi Bialtu Pastor, Rev. Hrangchhina’n hawnna leh Pathian hnena hlanna a nei a. Hlim takin Kohhranhovin he ni hi an hmang a ni.
• Biak in 3-na : Biak in te a lo hlui leh ta a, Kum 1975-ah Kohhran rorel khawlin, Biakin sak a rel leh ta a. Theih tawp chhuaha an intuak hnuah, 1976 kumah chuan Biak in chu a dung 36 ft leh a vang lam 18 ft-a lianin an sa leh ta a ni. Kohhranhote an tang bawk a, Thingzai Inin, a chung Rangva leh a bang pawh Tile ngat hmangin an sa zo leh ta a ni. Vanduaithlak takin Biak in 3-na hi kum 1991 kumah, Cyclone na tak lo tleh khan a chhem thluksak hlauh mai a, Kohhranhote rilru pawh a na hle a ni. Pu H. Sangkhuma ten inkhawmna nei ta lo, Kohhrante chu an inah lo dawlin Biak in sak thar leh hma (kum khat chuang) chu an inah an inkhawm thin a ni.
• Biak in 4-na : Khuarel chhiatna avanga Biak in an neih tak loh avangin, Biak in sa turin an inbuatsaih leh ta rum rum a. Kohhranhote an inlungrual bawk a, Biak in tha tak, Assam type-in a dung lam 40 ft leh a vang lam 22 ft-a lianin an sa peih leh ta a. He Biak in hi Rev. H. Chalchhunga’n hawnna leh Pathian hnena hlanna a nei a, Kohhranhoten ruai nen hlim takin an hmang a ni.
• Biak in 5-na : Hun a lo kal zel a, khawvel hmasawnna karah Biak in te chu lo hlui leh ta-in, Biak in tha zawk RCC ngeia sak ve tawh duhna a lo awm a. Tichuan Ni 4.7.2002-a Church Board Committee chuan, Biak in RCC ngeia sak ve tawh turin a rel ta a. Thahnemngai taka kum 5 zet an intuak hnuah Ni 19.5.2007-ah, Rev. Hrangchhina’n a Lungphum te phumin Biak in chu sak tan a ni ta a ni. Tichuan, thahnemngai taka sain Ni 16 February 2008-ah an luah lut ta a ni. A len zawng hi, a dung 55 ft leh a vang lam 27 ft a ni. A hawnna pangngai tak chu Kum 2011-ah Rev. R. Lalrosanga, District Superintendent-in a nei chauh a ni.

THIL CHHINCHHIAH TLAK TE LEH PASTOR CHHUAK TE

Kohhran a din tirh hian Haulawng Lal, Pu Saihranga leh a nupui Pi Chawngthiangi te nupa, Isua hminga Baptisma changa an lo lut hi a ropui hle. Kohhran an ti zahawmin an ti phuisui hle. Kohhran te hi Dar an pe nghe nghe.

District huap inkhawmpui (LAD inkhawmpui hlir) Vawi 3 dawl a ni tawh a, chungte chu :

• Ni 29.01.1983 Sunday hmangin (Inkhawmpui vawi 14-na)
• Ni 11.02.1989 Sunday hmangin (Inkhawmpui vawi 20-na)
• Ni 10.02.1990 Sunday hmangin (Inkhawmpui vawi 21-na)

Haulawng Lalveng Kohhran atanga Local 3 indang tawhte :

• Melveng local : 1970
• Hmuntlang ‘H’ local : 1971
• New Haulawng local : 2005

Haulawng Lalveng local atanga Pastor pali (4) chhuak tawhte :

• Rev. H. Chalchhunga : District Pastor/Superintendent thlengin Lalpan a chawisang a, Suptd. in a pension nghe nghe a ni.
• Rev. Hualzika
• Rev. Zalawma : District Superintendent mai bakah, General Mission Director leh General Sunday School Director thlengin a kaisang bawk.
• Rev. T. Bualzika

TUN DINHMUN LEH HRUAITUTE (2025)

Tun (2025) dinhmun :
Tunah hian Haulawng Lalveng Kohhran hi chhungkua 47, Kar chhuak chhungkua 2 niin, member 210 an awm mek a ni.

2025-2026 Kohhran hruaitute :

• Chairman : Upa Thanbanglova
• Vice Chairman : Upa Saichhingpuia
• Secretary : Evan. B. Zonunsanga
• Asst. Secretary : Upa H. Hrangchuailova
• Treasurer : Upa Lalhmunsanga Tlau
• Statistician : Rbt. H. Lalramsanga