Kohhran Din Dan

Mualthuam ‘S’ Khua hi ram buai avangin Tawipui ‘S’ khua-ah sawi khawm (Grouping) a ni a. He hmuna sawi khawm an nih lai hian, Pu Thangthuama (L) chuan Isua hmingin Baptisma a chang a. Tichuan, an khua Mualthuam ‘S’ a an kir leh hnu-ah, Pu Hrangnghilhlova te chhungkua leh Tawipui ‘S’ atanga an haw ruala pem lut, Isua hminga Baptisma changa Pentecost Kohhran lo ni tawh sa, Pu Kapliana (L) leh Pu Buanhmunga (L) te chhungkua nen, kum 1972-ah Kohhran lo din theih nan hma la-in bul an lo tan a. Thahnemngai taka Kohhran a lo din theih nana hma lain, mualah thusawina te an nei thin a. An rawngbawlna te Lalpa’n malsawmin, 1972, thal laiin Kohhran chu a lo ding ta a ni. He tih lai hian member 20 vel an ni.

Mualthuam ‘S’-a Pentecost Kohhran din a lo nih takah chuan, Evan V. Paliana leh Rev. Ralianga te chuan rawngbawlna an neih chhunzawm nghal a. Pu T Hengduna(L) te nupa leh Pu Zalawma(L) te nupa, Pu Chhunzova(L) te nupa leh Pu Aimawia(L) te nupa te chu Isua hminga Baptisma changin Pentecost Kohhranah an lo lut ve ta a.

Kohhran Hruaitu Hmasate

Heng mite hi Kohhran hruaitu hmasa te an ni:

Chairman hmasa ber atan Upa Thangthuama (L) ruat a ni a. Secretary hmasa ber tur atan Rbt. T. Hengduna(L) ruat niin, Treasurer atan Pu Chhunzova (L) ruat a ni bawk. Tichuan, mumal takin Kohhran chu a lo kal ve ta a ni.

Biak In Sak Thu

Zawi zawia lo pung ve zelin, Biak in sak te a lo tul ve ta a. Baptist Kohhran Upa, Pu Bualhranga chuan a in bul huan ram chu Biak in hmun atan pe-in, Pentecost Kohhran Biak in hmasa ber tur chu kum 1972, kum tawp lamah mau rapa sak a lo ni ta a. Kum 1973 March thlaah bialtu Pastor, Rev. Chuauruma’n a hawng a ni. Kohhran chu thang duang taka kal ve zelin, member pawh an pung chho ve zel a, Kum 1977-79 bawr vel khan Biak in te pawh sak that leh a ni.

Field-ah Hawn Leh A Ni

Chutia Kohhran chu thang duang tak leh chak taka a kal chhoh lai chuan, Kohhran mi thenkhatin van kohna chhangin, Lalpa hnenah an lo chawl a. A then nupui/pasal avang te leh chhungkaw rokhawlhna avanga hmun danga awm te a lo ngaih tak avangin, Mualthuam ‘S’ Pentecost Kohhran thang duang tak chu, kar lovah Kohhran fahrah tak a lo ni ta a. Kum 1994 kum a lo thlen meuh chuan, Lunglei District Mission Field-ah hial hawn a lo ngai ta a ni.

Kum 1994-ah chuan Lunglei District Mission Field Mualthuam ‘S’-a thawk hmasa ber turin Bro. P.C Lalhmingliana chu Evangelist hna thawkin Mualthuam-ah chuan a awm a. Kum khat a thawh hnu kum 1995-ah Bro. Lalringngheta’n thawk ve lehin, ani pawh kum khat bawk a thawk ve leh a ni. Kum 1996-ah Evan H. Lalthanmawia a thawk ve leh a, ani hian kum 1996-2000 thleng a thawk a, a thawh tan tirh kum, 1996 hian Member 36 vel an ni. Chutia, Mission field-a hawn a nih a, Evangelist te daha hmalak a nih takah chuan, Kohhran pawhin nasa takin hma a sawn a. Tin, Lunglei District Mission Department hma laknain Crusade te neih niin, theih tawpa Kohhran an pun chhoh theih nan hmalak a ni a. Chu mai bakah, Bial hrang hrangte pawhin rawngbawlna neiin, Crusade te an neihpui a. Thawktute thawhna leh mite thahnemngaihna te, Lalpan malsawmin member thar eng emaw zat seng luh an ni. Kum 1996 kum hian Biak in pawh sak that leh niin, kum 2000 November thlaah Rev. R Lalrosanga’n a hawng a ni.

Kum 2001 kum a lo thlen chuan Evan. H. Lalthanmawia thawh hun chu a lo tawp ve leh a (Evan. H Lalthanmawia hi Rotlang Field-ah sawn ni-in he hmunah hian kum khat a thawk a, kum 2002 kumah a chawl a ni). Mualthuam Field-ah chuan Evan. B Kamliana a thawk ve leh a. Kum khat a thawh hnu kum 2002 khan Mualthuam ‘S’ Mission Field chu khar a lo ni ta a ni.

Mualthuam ‘S’ Field khar a nih takah chuan Evan H. Lalthanmawia chu Mualthuam Kohhranhote sawmna avangin, Mualthuam ‘S’-ah chuan an chhungin an awm leh a. Tun thleng hian an inbengbel ta a ni.

Kum 2007-ah Biak in sak that leh a ni a, Dt. 14.03.2015 khan Bialtu Pastor Rev. P.C Nghakliana’n a hawng a ni. Chu Biak in chu thiah a ni tawh a, tunah hian RCC-in sak mek a ni.

Kohhran Hruaitu Hmasate (Department Nen) (1972-1980)

Kohhran Upate :
1. Upa Thangmhuama (L)
2. Upa Buanhmunga (L)

Rawngbawltute :
1. Rbt. T Hengduna (L)   2. Rbt. Hranghlira   3. Rbt. Ropianga (L)
4. Rbt. Aimawia (L)   5. Rbt. Hrangnghilhlova   6. Rbt. Chawnghnuna (L)
7. Rbt. Zalawma (L)   8. Rbt. Thangzuali (L)   9. Rbt. Sawimhuami (L)
10. Rbt. Liannguri

Kohhranpui Hruaitute :

Chairman :
1. Upa Thangmhuama (L)
2. Upa Buanhmunga (L)

Secretary :
1. Rbt. T Hengduna (L)
2. Rbt. Hranghlira
3. Rbt. Ropianga (L)

Treasurer :
1. Bro. Chhunzova (L)

Department Hruaitu Te :

P.Y.D. Hruaitu Te :

President :
1. Rbt. Hrangnghilhlova
2. Rbt. Zalawma (L)
3. Bro. H Ngurkhuma

Secretary :
1. Sist. Lalrinawmi (L)
2. Sist. Ramnghaki
3. Sist. Parmawii
4. Sist. Hmunmawii

Treasurer :
1. Sist. Hmunmawii
2. Sist. Ramnghaki

L.A.D. Hruaitu Te :

President :
1. Sist. Sawimhuami (L)
2. Sist. Nawniangi (L)
3. Sist. Nichuaii (L)
4. Sist. Liannguri

Secretary :
1. Sist. Nisii (L)
2. Sist. Lalrinawmi (L)

Tun Dinhmun

Mualthuam South Local-ah hian member 66 (kum 2025 report) ah an awm mek a, Upa - 3, Rawngbawltu - 6 leh Licence Holder - 1 an awm mek. Tunah hian Biak in RCC-in an sa mek a, a len zawng hi 54/25 Feet a ni. He Biak in hi Date 17 April 2025 khan Rev R. Vanlalenga, Bialtu Pastor-in a lung a phum.

Kum 2025-2026 Local hruaitute chu :

• Chairman : Evan H. Lalthanmawia
• Vice Chairman : Upa Lungruala
• Secretary : Upa Hmangaihzauva
• Asst. Secretary : Rbt. Lalnunthara
• Treasurer : Rbt. Lalzarzova
• Statistician : Rbt Lalremmawia