Kohhran Din Tan Dan

Kum 1952 March thla-a Mizoram Baptist Kohhran-in Biak in hawnna an nei a. He hun hmang tur hian Theiriat atangin mi hlim, Upa Rochhunga leh a thiante pali chu Mualcheng ‘S’-ah an lo kal a. Biak in hawn programme hmanga lo kal mi hlimte chu, Pu Lalsanga (Mualcheng ‘S’ khaw Lal), Pu Lianbuka, Pu Thangvela, Pi Saidii, Pu Zakiana, Pu Taikhuma te leh mi dang eng emaw zatin an tawiawm a. Hetia, mi hlimte tawiawm a nih tak zel avang hian Baptist Kohhran chuan an ngai thei ta lo va; Baptist Kohhran chhungkaw zingah chuan HLIMNA duh pawl te chu an lo awm chho ta a ni. Khaw dangah chuan, a lo thang ta zel a. Mi hlimho chu Mualcheng ‘S’-ah chuan an lo kal ta fo a ni.

Ralvawng khua atangin Chuaudenga, mi hlim rawngbawltu pawh ni lo a lo kal a; hetah hian, Pu Lalsanga chu Baptist Kohhran rawngbawltu a ni a. Pu Lalsanga chuan, Pu Chuaudenga chu hun a pe a (He tih lai hian rawngbawltu ni lo pawh hun an pein Maicham (Pulpit) pawh an luahtir mai thin). Mahse, a rawngbawlpui te chuan tha an ti lo hle a. Tichuan, Pu Sainghina Inah meeting neiin, nasa takin rawngbawltute chu an inhnial buai ta a, Pu Lalsanga chu a rawngbawltu nihna atangin an chawlhtir (Suspend) ta hial a ni.

Mualcheng ‘S’-ah chuan hlimna duh an awm a ni tih hriain, Theiriat atangin kum 1955 Krismas dawnah, Pu Senbuanga, Robuanga leh Pi Sapmawii te an lo kal a. Hun eng emaw chen an awm hnuin, Pu Lalsanga chuan tawnghriatloh chu a dawng ta a. Pu Lalsanga chu thil pawimawh tiin Theiriatah a zin a, a lo haw leh hnu chuan Kohhran Committee (Baptist) chuan, Pu Lalsanga tawnghriatloh chungchang chu an rel thlu ta a. Tichuan, Pu Lalsanga chuan a tawnghriatloh chu bansan a, hman tawh loh ai chuan Baptist Kohhrana rawngbawlna chawlhsan chu a thlang ta zawk a ni. A rawngbawlna chawlhsantir mai chu duh tawk lovin, Baptist Kohhran atang chuan hnawhchhuah a ni zui ta a ni.

Inkhawm hran tirha hun hmang tute chu :
1) Lalsanga   2) Khualchhawni   3) Lianbuka   4) Taikhuma
5) Hrangfami   6) Lalhnuaii   7) Padara   8) Zakiana te an ni.

Hlimna duhtute leh amah lo lainat a, lo khawngaihtute nen chuan Pu Lalsanga Inah chuan an inkhawm hrang ta a. Kum 1956 kum tirah chuan, UPC Pastor Lalthima chu lo kalin, Isua hmingin Baptisma a chantir ta hlawm a. Kohhran chu form mai lovin, Pu Lianbuka chu hotu berah an dah ta a ni. Kum tawp lam Dt. 12 October 1956-ah Pastor Lalthianghlima chu lo kalin, Kohhran chu a form ta a. Tichuan, kum Ni 12 October 1956-ah Mualcheng ‘S’ UPC Kohhran chu a lo ding ta a ni.

UPC Mualcheng ‘S’ Kohhran Upa leh Rawngbawltu hmasa berte chu :

Upa te :
1. Lianbuka
2. Lalsanga
3. Hrangchhuma

Rawngbawltute :
1. Buaitawna
2. Savawma
3. Zakiana
4. Padara
5. Taikhuma te an ni.

Kohhran Din A Nih Dan Leh Hruaitute Leh Bial Centre A Nih Dan

Mualcheng ‘S’-ah chuan Kohhran nghet tak din a nih bakah, kum 1958-ah chuan 'Mualcheng ‘S’' Bial tia vuah a lo ni ta a. Bialtu Pastor hmasa ber chu Pastor Zahlira, Khuanghlum khua a ni. Kohhran chu tluang takin a kal a; Amaherawhchu, Pastor Zahlira chu vanduaithlak takin a boral hlauh mai a, a aiawh turin Pastor J. Laltluanga, Thangte chu Mualcheng ‘S’ Bialah a lo awm ve leh a ni. Thuthlung chu a hma aia vawrh darhin, Kohhran pawh chak takin a pung chho nghal a. Kum 1963-ah Pastor Raltianga, Tarpho chu lo awm lehin, chumi hnu Kum 1966-ah Pastor Chuauruma chu a lo awm ve leh a ni. Kum 1977 atangin Mualcheng ‘S’ Bial tih chu, 'Tawipui Bial' tia thlak a lo ni ta a. Mualcheng South tia Bial hming a put chhung hi kum 19 lai a ni.

1956-a Kohhran Hruaitu te :

• Chairman : Upa Hrangchhuma
• Secretary : Rbt. Zakiana
• PRZ Treasurer : Upa Hrangchhuma

Upa te :
1) Lianbuka   2) Lalsanga   3) Hrangchhuma

Rawngbawltute :
1) Buaitawna   2) Zakiana   3) Savawma   4) Padara   5) Taikhuma

Biak In Neih Dan Leh A Sak Chhoh Dan

Kum 1956-ah chuan Kohhran a lo ding a, member eng emaw zat an lo nih sa avangin, a kum leh kum 1957-ah Mualcheng ‘S’ UPC Biak in hmasa ber chu Mau rapa sak a ni a. Tichuan, Kum 1956-ah Vawi hnihna chu Vai Diin sak a ni leh a. Kum 1969-ah Tawipuiah sawi khawm kan ni a, hemi khuaah hian Tawipuiah Biak in sak leh nghal a ni. Kum 1972-ah Tawipui atangin Mualcheng-ah kan let thla leh a. Kum 1973-ah Biak in Vai Di-in sak leh a ni a.

Kum 1994-ah Assam type-in Biak in sak leh a ni. Tuna kan Biak in luah mek hian Biak in hlui chu chhungkhungin kum 2008-ah sak tan leh a ni a, Concrete Buildinga sak a ni a. Kum 10 zet sak a nih hnuah Dt. 20.10.2018-ah Rev. C. Lalrintluanga, District Treasurer-in hawnna min neihsak a ni.

Kohhrana Thil Thleng Chhinchhiah Tlak Thenkhatte

1. Mualcheng ‘S’-a Kohhran (UPC) din hi Mualcheng ‘S’ Lal chhungkua atanga intan a ni.
2. Kum 1994-a Biak in sak hian Kohhran thawhhona a tha bawk a, Assam type-in luah theiha sak a ni. A dung feet 70, a vang feet 27 a ni a, a dung hi Varandah nen a ni.
3. Tuna kan Biak in luah lai Cement Concrete hi Nuai 60-vela Complete a ni a. A hnuai hi Chokaah hman a ni a. A dung hi Varandah nen feet 82 a ni a, a vang hi feet 38 a ni bawk. A chung hi Steel Structure a ni.
4. Sunday School Hall hi sak that tum a ni a, Cement Concrete-a sak leh tura hmalak mek a ni.
5. Kum 2006-ah Mualcheng ‘S’ Kohhran hian Golden Jubilee (1956-2006) hlim takin ruai nen ropui tak a lawm a ni.

Tun Dinhmun

Mualcheng South Local-ah hian member 539 (kum 2025 report) an awm mek a. Licence Holder -1, Upa -7, Rawngbawltu - 12 an awm mek.

Kum 2025-2026 Local hruaitute chu :

• Chairman : Upa M. Remkunga
• Vice Chairman : Upa Rothanga Sailo
• Secretary : Rbt. Zahmuaka Sailo
• Asst. Secretary : Rbt. C. Lalngilneia (Statistician)
• Treasurer : Rbt. T. Lalmawia