KOHHRAN DIN CHHOH DAN

Buknuam khua hi Lunglei chhim thlang lam Bru khaw lian ve tak, Zehtet atanga 5 KM vela hlaa awm a ni a. Buknuam khua hi in 50 nufa zeta lian niin Bru hnam awm khawmna a ni. Tin, Kohhran lamah Zehtet Home Missions Field huam chhunga awm a ni bawk a.

Buknuam khuaah hian tun hmain UPC Kohhran a lo ding tawh thin a, chumi hun lai vel chuan Lunglei District-a kan arsi liante zing a mi, Rev. Zalawma (L) chu Kohhran chhawrin Evangelist Teacher hna a thawk thin. Tichuan ani a lo chawlh takah chuan Upa Ngurkhuma (L) of Rangte chuan, a hmun ruak a rawn luah leh a ni. Tichuan, Evangelist Teacher-te an awm tak lovah chuan, Kohhran member awm chhun chhunte pawh chu pem zovin, Kohhran pawh chu a lo rem zo ta a.

Tichuan Buknuam khua hi Zehtet Home Missions Field huam chhunga awm tura rin luh a lo ni ta a. Field Evangelist Evan. R. Laldawngliana chuan ram te thli thlaiin a lo zuk tlawh pawh fo thin a ni. Ni 28.8.2015 a lo inher chhuah meuh chuan, Lunglei District Missions Department-in Free Evangelist-a kan neih lai, Evan. Lalthangkima of Vanhne chu Crusade turin a tir a, chumi tawiawm tur chuan mi 8 lai an thawk chhuak a, chung mite chu:

1. 1. Evan. R. Laldawngliana, Zehtet Home Missionary
2. 2. Upa Lalthanmawia
3. 3. Upa Khawndawla
4. 4. Upa Vanlalhruaia
5. 5. Henry Liankhuma
6. 6. Evan. Lalramchhana
7. 7. Vanlalpeka
8. 8. Lalthlamuana
9. 9. JB. Remkhuma

Tichuan, anniin Kohhranah Member thar eng emaw zat an lo seng lut ta a. Amaherawhchu, chumi inlawm luh lai chuan Kohhran mumal tak in-form a la ni lo va, Baptisma pawh an la chang lo a ni. Tichuan Chawngte Section-a Pastor, Rev. R. Vanlalenga hova thil thui tak thlir chungin, kum khat chhung Kohhran form lova en thlak phawt ni se an ti a.

Tichuan Kohhran form hma siin District Missions Department-in Evan. Muanpuia Colney chu tir ve lehin, ani rual hian Evan. R. Laldawngliana a kal tel bawk a, anni pahnih hian Kohhran member puitling mi pariat (8) te chu Isua Krista hmingin Baptisma an chantir ta a ni.

Baptisma an inchantir hnu chuan, Chawngte Section Pastor, Rev. R. Vanlalenga leh Evan. R. Laldawngliana te chu Buknuam khuaah kalin Ni 30.1.2017 niin Kohhran dinin form nghal a ni a, Kohhran form thara hruaitu hmasate chu:

Chairman	: Upa Thangliana
Secretary	: Rbt. Kumtharmawia
Treasurer	: Upa Sawikhawmrai

BIAK IN

Hetianga Kohhran form a lo nih takah chuan Biak in sa tura hmalak chhoh a ni a, Lunglei District Kohhranpui atangin New Church Constitution Allotment Fund Rs 3,00,000 pek a ni. Tichuan Biak in pawh chu a dung 30 ft, a vang 18 ft-a sak a ni a, he Biak in sa tur hian Chawngte Section-in Work Camp-in an sa a, Biak in sa tura Chawngte Section atanga thawk chhuakte hi mi 20 bawr vel an ni.

TUN DINHMUN

Kum 2025-ah Buknuam Local-ah hian Member 41 an awm mek a ni.

2025-2026 Kohhran hruaitute:

Chairman	: Upa Ukilmoni
Secretary	: Upa Thangliana
Treasurer	: Rbt. Lalremmawia