KOHHRAN DIN CHHOH DAN

Mautlang khua hi Lunglei chhim thlang lama awm a ni a. Kohhran bial thenah Chawngte biala awm a ni. Tun hma chuan Mautlangah hian Mizo hnam pangngai an lo awm tawh thin a. Rambuai avanga sâwi khâwm a nih hnuah Mizo hnam peng pakhat ‘Bawm’ hovin an luah leh a. Bawmhote pawh chu lo pem darh lehin Mautlang khaw dik tak ralah, khaw thar an din leh a. Tichuan, Mautlang khaw hming chu an chhawmtir ta a ni. Tin, tuna Mautlang Kohhran chanchin ziah a nih mek lai hian Mautlang khuaah hian in 50 (sawmnga) bawr vel an awm tawh a ni. Kohhran chungchang thu-ah chuan Mautlang khua hi UPC Kohhran awm lohna a ni a. Presbyterian Kohhran hlang awmna niin School te neiin thawktu pawh 2 (Pahnih) an nei a ni.

Tin, Lunglei District Mission Department-in Mautlang khua hi Zehtet Field huam chhunga a rin luh takah chuan Evan. R. Lalramhluna, Zehtet Home Missionary puibawm turin Chawngte bial Kohhranpui chuan, Casual Worker Upa. JB. Lalremkhuma of Zehtet chu kum 2007 chhung atan a rawih belh a. Tichuan anni 2 (Pahnih) hian field-ah rawngbawlna an nei tan ta a ni. Tichuan, 2007 kumah Mautlang khua hi tlawh pawh tanin, an theih ang tawkin rawngbawlna pawh an nei tan ta a, ram inhawng thei turah ngaiin hma lak chhunzawm a ni ta zel a ni. Mautlang khua hi UPC awm lohna khua mah ni se; Lalpan Kohhran a din theih nan mite thinlungah hna a thawk zel a. Tichuan Kohhran ding thei dinhmunah an lo awm ta hial a ni.

Ni 18.3.2007 a lo inher chhuah meuh chuan, Evan. R. Lalramhluna Zehtet Home Missionary leh Chawngte Bial Kohhranpuiin Casual Worker atana a lak, Upa JB. Lalremkhuma ten nasa taka ram an beihna, Lalpan malsawmin Kohhran tha tak din a ni ta a ni. Tichuan, Ni 18.3.2007 ni vek hian Chawngte Bialtu Pastor, Pastor VL. Hmuaka’n UPC (NEI) Kohhran member ni turin mi 40 (sawmli) a lawm lut a, Nau 10 (sawm) hlan nghalin, mi 13 ( sawmpathum) in Lalpa Isua hmingin Baptisma, Chawngvunga sa kah luiah an chang nghal bawk a ni. Tin, Bro. Lallawmsanga te inah inkhawmin, Thlarau lam revival ropui tak a lo thleng bawk a. Hetia Kohhran a lo ding thei ta hi Chawngte bial chhung Local hrang hrang te pawh an lawm em em a.

Tin, Bial chhung Local hrang hrang atangin Kohhran thar lawm turin an kal khawm a, chungte chu : Chawngte atang 6, Lungrang 5, Zehtet 4 leh PBC Field Worker Evan. Zosangzuala of Chawngte ‘C’ te an rawn tel a ni. Tichuan, 18 March 2007 chawhnu herah Mautlang Kohhran thar, bialtu Pastor, Pastor VL Hmuaka’n a form nghal a, hetiangin :

• Kohhran upa : Vanlalpeka, Zegola
• Rawngbawltu : 7

Church Board OB te :

• Chairman : Upa Vanlalpeka
• Secretary : Rbt. Lalthanzama
• Treasurer : Upa Zegola

Mautlang Kohhran thar form zawh a nih hnuin Biak in hmun tur pawh ngaihtuah nghal a ni a, Mautlang VC ten tuna Biak in dinna hi an pe nghal a. Chumi hnu-ah chuan Biak in din tura hma lak chhoh nghal a ni. Ni 4-6 May 2007 chhung hian Lunglei District Missions Department leh Chawngte bial tangkawpin Crusade neih chhunzawm nghal a ni a, Bro. R. Lalramhluna chu Speaker-a hman chhunzawmin hemi hun chhung la la hian Biak in hmun tur pawh laih nghal a ni.

Lunglei District Home Missionary Mautlang khua lo bial tawhte :

1. Evan. R. Lalramhluna of Mualthuam ‘N’
2. Evan. R. Lalremsiama of Sekhum
3. Evan. Lalhriatmawia Tualzik of Bualpui ‘H’
4. Evan. R. Laldawngliana of Sekhum
5. Evan. Muanpuia Colney of Haulawng
6. Evan. C. Lalrinzuala of Tlabung
7. Evan R. Lalrokhawma of Thangte

BIAK IN

Kum 2007 hun chhung hian Biak in sa tura chak taka hmalak zel a ni a, Zehtet Field Home Missionary Evan. R. Lalramhluna chuan District Kohhranpui remtihnain Lunglei khawpui chhung leh thingtlang khaw lian deuhah te, Biak in sakna tur a khawn kual a, mite khawngaihna leh inpekna avangin Biak in pawh sa thei an lo ni ta a ni.

Chawngte bial chuan Ni 25-29 March 2008 chhung Work Camp neih a ni. Member kalte hetiang hian : Chawngte Local - 3, Zehtet - 3, New Lungrang - 4, Lungrang ‘S’ - 1, Mualthuam ‘N’ - 1 leh hlawhfa mistiri 3. Mistiri hlawhfate hi ni khatah Rs. 300-in rawih a ni bawk. Mautlang Kohhran Biak in chu Ni 29.3.2008 (Inrinni) ah luah theih tura peih fel a lo ni ta a. Chu mai piah lamah chuan, he Biak in hi Mautlang khuaa, tile leh rangvaa in ding hmasa ber a ni bawk a, zanah luah lut nghalin Thlarauin Lalpa, an zingah telin nasa takin Lalpa an chawimawi a ni. Biak in luah luh zana thusawi hmasa ber chu Bro. Lalruaia (L), New Lungrang a ni. Kohhran pawhin Pathian malsawmna dawngin an kal chho zel a, Lunglei District Missions Department pawhin, Mautlang Local an duhsakna leh an veina tilang zelin, kum 2010-2011 khan Unaunu C. Lalchhandami of Venghlun chu Evangelist Teacher-in a rawih sak bawk a ni.

Kum 2020 a lo inher chhuah meuh chuan, hmana kan Biak in pawh chu luah zui hleih theih lohvin a lo awngrawp nasa ta hle mai a, kan harsatna kawng hrang hrangte chu Lunglei District Ladies Auxiliary Department te chuan hriain, Mautlang hmunah hian Rs 3,00,000 sengin bul min tansak a, kan sum neihin a tlin dawn lo nia a lan avangin Lunglei District Kohhranpuiin Rs. 95,000-in an rawn do let ve leh ta a ni.

TUN DINHMUN

Mautlang Kohhran chanchin ziah a nih hma hian Kohhran member 58 an awm a, member 27-a pungin tun dinhmunah 85 an lo ni ve leh ta a ni.

2025-2026 Kohhran hruaitute :

• Chairman : Upa Laldenga
• Secretary : Upa Lalrinmawia
• Treasurer : Rbt Lallungmuana