“Tin, an hnenah, ‘Khawvel zawng zawngah kal ula, thil siam zawng zawng hnenah chuan chanchin tha hi hril rawh u...” Marka 16:15 tia, Lalpa thu chah thlen dikna tur atana Pathian remruat chu, Mizoram chhim lamah pawh hrilh darhin a lo awm ta zel a. Pathian remruat hi Thlarau atang chauh lo chuan tu nge hre fiah thei ang le.

Tarpho khua chu :

Tarpho khua hi Mizoram chhim lam, Hnahthial District-a awm a ni a. Hnahthial atanga khaw chhak lam 26 Km-a hlaa awm a ni a. Tarpho khua hian UPC NEI chhim lamah dinhmun pawimawh tak tak a luah dan leh a chanchin te kan han sawi dawn a ni.

Kohhran lo din chhoh dan :

Kum 1952 chhovah, Tarpho khuaah hian hlimna nasa tak a lo thleng a. He hlimna changtute zing a mi, Pi Tawimeni chuan Tarphoah hian Pathian rawngbawltu tur, Hmar lam atanga an lo kal dawn thu, Thlarau lam atanga hriatna a lo dawng reng mai a. Tute nge an nih pawh hre chuang lovin, North Vanlaiphai leilet hmunah a hmuak turin a chhuak ve tawp mai a ni. Pu Sawichhunga Inah a thleng a, ni thum lai mai a cham a, a cham ni thum niah chuan Hmar lam atangin Pastor Lalbiakthanga leh Evan. Saihnuna, Tlangpui khua te chu N. Vanlaiphai leilet hmunah chuan rawn kalin, Pu Saichhunga inah chiah chuan an rawn innghat ve ta a ni.

Pastor Lalbiakthanga leh Evan. Saihnuna te chuan, Tarphoa rawngbawl tura kal an tum thu an han sawi chu, Pi Tawimeni pawh a hlim em em a ni. A tukah chuan Tarpho lam chu an pan za ta a, Pi Tawimeni Inah chuan an thleng ta nghe nghe a ni. Theih ang tawk tawka rawng an bawl hnu chuan an haw leh phawt a.

Kohhran a ding ta :

September 1952-ah chuan an hmabak hlen turin, Tarpho khuaah chuan an lo lut leh a, an lo kal hmasaka Evan. Saihnuna pawh kha, Pastor Saihnuna tih a lo ni tawh nghe nghe a ni. Pathian Thlarau hruaina hnuaiah rawng an han bawl ta a, an rawngbawlnain khawtlang a chiah hneh hle mai. Dt. 25th Sept, 1952 zan chaw ei khamah chuan, Chhim lama Pentecost Kohhran ding hmasa ber ni turin, Kohhran chu Form a lo ni ta a ni. Kohhran din a nih tak thu chu, a tuk Dt. 26th Sept. 1952-ah chuan puan a lo ni ta a a ni.

Hemi zan (a din zan) a hming ziak hmasa ber chhungkua te chu :

1. Pu Lalkama te chhung
2. Pu Zaduma te chhng
3. Pu Huatlinga te chhung
4. Pu Aichhinga te chhung
5. Pu Thantlira te chhungkua (Pu Thantlira hi Baptist Kohhran Local Pastor ni lai a ni. 1954-ah UPC Pastor atan lak a ni nghe nghe) te an ni.

Kohhran hruaitu hmasa berte chu hengte hi an ni :

Hmeichhe rawngbawltu hmasate :

1. Pi. Ngurkungi
2. Pi. Laizami
3. Nl. F.Aihnuni

Member pun chhoh dan :

Kohhran tiak tir, mite hmuhsit em em ni mahse; Lalpan a awmpui a, hlim takin hun an hmang kal ve zel a. Pu Lukawnga te, Pu Ralianga te pawhin an rawn zawm ve ta zel a. Ralianga hi a lo luh lai hian BCM Kohhran Upa atana thlan thar a ni nghe nghe. Thil hriat reng tlak tak pakhat chu, Kohhran lo pung zelah, Kohhran Chairman hnenah Chhawhchhi No.2 pe a, hming ziah dil te pawh an awm nawk nghe nghe.

Rambuai Nghawng :

Vanduaithlak takin kum 1966-ah Mizoram chu rambuaia puan a lo ni a, Sorkar lamin Tarpho khua pawh Hnahthial lamah a sawi khawm a. Kum 1967 Februaty ni 7-ah Hnahthialah chuan an chhuk a ni. Tarpho khua chu luahtu awm lovin a lo tiavai zo ta a ni. Hnahthial lamah chuan Tarpho khua awmna tura an tih vengah chuan awmin, chutah pawh chuan Pu Ralianga hovin Kohhran chu an tinungin an kalpui chho zel a, a hmingah pawh, Tarpho khaw hming chawiin an din chho ve ta zel a, chumi kal zel chu, tunah Hnahthial Venglai tiin, Bial Hqrs. hial a lo ni ta.

Tarpho khua luah leh a ni :

Kum 1973-ah Sorkar lamin mahni khaw hlui lama let leh a phal tak avangin, Tarpho lamah pawh chuan mi tlem te an let leh a. A tirah chuan let leh an tam loh avangin, Kohhran bik sawi lovin hmun khatah, BCM te nen an inkhawm ho thin. Kum 1974 a lo inher chhuah leh chuan, a hrangin UPC chu Form thar leh a ni a. Pu Ropianga (L) inah inkhawmna neih thin a ni. Khuaa kir leh hnua Kohhran hruaitu hmasate chu hengte hi an ni :

1. Pu Ropianga
2. Pu Hrangzika
3. Pu Lalmawia
4. Pu MC.Lengthanga te an ni.

Biak in sak chhoh dan :

Kohhran a din atang hian an inkhawm hrang nghal a, Biak in erawh an la nei mai lo va. Pu Lalkama Inah an inkhawm phawt a, a tul dan angin midang inah pawh an inkhawm kual mai thin.

Biakin 1-na :

Kum1953-ah, Biak in pakhatna chu sain, Maurap inin an sa a. An sak peih hnuah, Pastor Lalbiakthanga’n hawnna leh Pathian hnena hlanna a nei a, Kohhranhote an hlim hle a ni.

Hun lo kal zelah, Maurap mai a nih avangin Biak in te a lo tha tawh lo va, a te tawh bawk si a, sa tha turin an inbuatsaih a, Thingzai ngeia sak an tum avangin, thing te an zai a, theih tawp an chhuah a. Biak in sa ngei tura hma an lak mup mup laiin, rambuaiin a rawn nang ta hlauh mai a, Biak in 2-na tur sa thei lovin an tiavai ta rih a ni.

Biak in sa leh tura an intuak mup mup lai khan, an khuaah rawngbawltu, Pu Bawihdailova, Sailulak khua a awm a, an Biak in sak dan tur Thlarau atangin a hmu a, hetiangin a sawi, ‘A dunglam hlam-6, a vanglam hlam-3 tur a ni ang’ tiin. Kohhran hoten ‘rel dawn ta tak tak ila, kan hlam a inang si lo va, tu hlam ber nge maw kan hman dawn ni ang le’ an ti fiamthu thin a, an hlimpui phian.

Biak in 2-na :

Rambuai zawh a, Hnahthial lam atanga Tarphova an kir leh hnu, 1974-ah Kohhran Form thar leh a ni. Pu Ropianga (L) te inah inkhawmna an nei thin a. A kum leh, 1975-ah Biak in chu an din thar leh ta a. Hlim leh lungrual taka Biak in an sak zawh chu, September 1975-ah, Evan. Lalthanzauva, Cherhlun khua chuan hawnna leh Pathian hnena hlanna a nei a ni.

Biak in 3-na :

Hun a lo kal zel a, Biak in hmun hmasa chu hralhin, tuna Biak in hmun hi neih a ni a. Pi Ngurkungi te ho nen, Biak in tlang chu rawt hniamin Biak in chu Assam type-in rel a ni leh a. District-in a chung min rawn khuhsak bawk a, 1992-ah chuan Biak in tha tak an lo sa peih leh ta a ni.

Biak in 4-na :

Kohhranhote kan lo thang ve zel a, Biak in hmasa a lo hlui ve zel bawk nen. Tin, tun laiah ram a changkangin mite rilru a lo sang ve zel a, Biak in pawh RCC in ngeia sak duhna a lo piang ve leh ta a. Kum 2019 atangin, Biak in hlui chhung khungin an rel ve leh ta mup mup mai a, Kohhran member an tam lo na a, an inlungrual a, an inpe zo bawk a, an hnatlang thawk pawh an hmuhnawm thin hle. Covid avanga ram pum huap a, kan buai leh harsat karah, 2021-ah a liang an chhung fel tawh a. Lalpa zarah Biak in mawi leh tha tak an nei ngei ang.

Tarpho local atanga chhuak mi ropui te :

Pastor Chhuak tawhte :

1. Pu Thantlira
2. Pu. Ralianga
3. Rev.VL. Hmuaka (Secretary hmasa ber fapa)

License Holder te :

1. Evan. Ropianga (L)
2. Lalnunmawii (BW)

Tarpho Local tana hun pawimawh thenkhat :

1. Kohhran a din tirh 1952 hian nuho pawl din ve nghal a ni.
2. Kum 1956 March ni 24-ah, Tarpho hmunah Circle Conference nghah/dawl a ni a. Chutih lai chuan Chhim leh Hmar inkawpin neih thin a la ni. Hemi inkhawmpuiah hian Palai 53 an lo kal a, khaw 13 an kal lo. Hemi tuma rorelah hian, Chhim leh Hmar chu inkawp tawh lovin, Chhim lam hi a hranin Circle-in awm ve tawh ila, tih an rel thlu a, Chhim Circle bialtu atan, Pastor Lalthima ruat a ni nghe nghe a ni.
3. Kum 1958 atangin Buhfaitham neih ve tan a ni a. Thla khatah vawi khat khawn thin a ni a. Tualchhung sum hnar ber a ni.
4. Kum 1961-ah Pu Tialthanga (Rev.VL. Hmuaka pa) hovin PYD din a ni a, tun laia tawngtai tlanga an hman, Hmawng hnuaiah hian an din a ni. District leh General lam nen an inthlun zawm lem lo.
5. Kum 1961-ah tho hian naupang pawl (PCD) kan tih tak hi an din tawh bawk.
6. Kum 2002, September-ah, Tarpho Local Golden Jubilee ropui taka lawm a ni a. Rev. Ralianga’n an sawm angin Jubilee Lungphun a hawng a ni.

Tarpho UPC mi bik :

Rev. Ralianga :

Pastor Ralianga hi khawvel zirnaah a sang lo hle. Lalpa avang zawk erawh chuan mi ropui, mi bik, a tih loh theih loh a ni. Pulpit tlang mai ni lo, khawhar in leh a remchanna hmun apianga Pathian thuthlung tuipuia sawi thin a ni. Ram pawh a la thei hle.

Vawi khat chu Pastor Ralianga leh BCM Pastor F. Lalrammawia, BD chu Isua Pathianna chungchangah Debate nei tura tih an ni a, an in-debate ta alawm. An tang dun nasa mai a, khaw lum lai a ni a, Pastor Ralianga thlan tla chu a vei lamah Nl. Liantlingin a lo hruksak a, a ding lamah Nl. Nunmawiin a hruksak bawk a, an han tichho zel a, a tawpah chuan Pastor Ralianga’n hnehna a chang ta. He an debate atang hian Kohhrana mi tangkai tak tak, Lalpan min pek belh ta nual a ni. Chungte chu, Pu Chalmawia (Evan. F. Rawngbawla pa, Leite) te, Pu Hrangchama te, Pu Ruma te leh mi dang eng emaw zat te an ni.

Lalnunmawii :

Sist C. Lalnunmawii hi Kohhran a din tirh ata, Kohhranin hun harsa leh khirh ber ber a tawh lai pawh a, hmangaihna nena vuan tlattu a ni. Bible women te niin, a theihna dan danin nu chan a chang tlat a, tun thlengin min la dampui a, Kohhranin kan thlamuanpui le a ni. Kum 2021 khan ‘ZONUBIRU’ Award (Mizo nu chawimawina) hlan a ni nghe nghe a. Hetianga ram leh khawtlang ang zawng pawha chawimawina a dawng hi, kan chhuang takzet a ni.

Tun huna kohhran dinhmun :

Kohhran member hi pung ve zel mahila tlemte a kar, pemchhuak te, kohhran danga kal leh ta lawp lawp te boral ta te, an awm ve zel a, chuti chung chuan pun lam an pan ve zel a, tunah hian Mrmber 80 vel chiah an ni.

Tun hun a hruaitute :

Tun (2025) a Kohhran hruaitute dinhmun chu hetiang hi a ni :