Lunglei khawpui chhunga rawngbawltu hmasa : Kohhran din a nih hma hian, UPC Pastor Lalthianghlima’n rawng a lo bawl tawh a, mi tam takin lo tawiawmin, an lo tuipui hle tawh a ni. Daipawnah a fianrial thin a, a fianrial tawngtai riin mi tam tak nun a hneh hle thin a ni.

Kohhran a ding ta : Tichuan, Kohhran member lo awm sate chuan inkhawmpui tur an zawng a, Hauruang thleng thlengin an dap vel a, a tawpah chuan kum 1958 velah Lungleh Kohhran tiin bul an lo tan ta a, kum 1958 March thlaah Lunglawn hmuna Circle Conference-ah pawh Lungleh Kohhran aiawhin Pi Lalsikhupi chu palai a ni nghe nghe. Hun a lo kal leh det a, Baptist Kohhran lam atangin rawngbawltu ni sa, Pu Hrangmawia te an lo lut leh ta a, Kohhran record-ah Kohhran puitling taka an indin hun chu Ni 15 March, 1959 a lo ni ta a ni.

Hruaitu hmasa berte : Chairman : Upa Hrangmawia
Secretary : Saiengliana
Treasurer : Saikhuma

Upate : Upa.Hrangmawia,Upa. Chhawntluanga,Upa. Dengsaia,Upa. Laiveta
Rawngbawltute : Bro. Saiengliana,Bro. Lalzaruaia, Sist. Lalsikhupi, Sist. Sapbawii, Bro. Lalbela, Bro. PC. Thansanga, Sist. Hrangliani.

Inkhawmna hmasa : Kohhran din tirh hian inkhawmna buatsaih ve nghal a ni a, Upa Hrangmawia Inah te, Upa Chhawntluanga Inah te, Upa Laiveta Inah te leh Upa Dengsaia Inah te inkhawm thin a ni. Member fel taka chhinchhiah thlap a ni lo va, Member 80 – 100 inkar chu ni ngeia hriat a ni. Tel chiah si lo, duhna neia rawn chhim vetu pawh mi eng emaw zat an awm.

Hetianga Kohhran a la din hma hauh hian, Bro. Hrangmawia rilru-ah Baptisma chan duhna lian tak a lo awm a, tlawm leh zah pawh dawn zo tawh lovin, a awmna Kohhran (Baptist)-ah eng harsatna nge a tawh dawn pawh ngaihtuah dim dem lovin, Chhim Mualchengah Baptisma chang turin a phei ta a, tichuan Baptisma chang hmasa ber a ni ta a ni. Kohhran ding tir thawm chu a nain, an lo awmna (Baptist) Kohhran rilru pawh a na a ni ang, ensan tur tih thawm te pawh a ri nawk a, mahse ensan tak tak chu a awm ta lem lo a ni.

Rahsiveng hi Lunglei khawpui chhungah UPC Kohhran dinna hmasa ber niin, Veng hrang hranga thlarau miten rawn bawm nghalin, Rahsiveng hi thlarau Headquarterspawimawh tak a ni nghal a, hun eng emaw chen an awm khawm hnuah veng hrang hrangah in dangin UPC Kohhran chu a lo darh ta zel a ni.

BIAK IN HMASA BER:- Kum 1960 khan Village Council-ah Biak In hmun tur dil a ni a, vanneihthlak takin tuna Biak In dinna hmun hi pek an ni a,Kohhranhote an phur tlang em em a, zan rei tak tak thlengin Petromax eng hnuaiah Biak In hmun laiin an hnatlang thin a ni. USA-a UPCI General Superintendent, Arthur T. Morgan leh General Secretary Wynn T. Stairs te chu Kum 1960/1961 khan Mizoramah an lo kal hlauh mai a, Rahsiveng chu Headquarters Biak In atan tiin a chung tur Rangva an leisak bakah, a phurh man nen lam an tumsak a, Kohhran-hote an lawm hle. Biak In ren atan thing te zaiin, Kohhran-hote an hlim em em a ni. Hetih laia Aizawl lam atanga rawn awm, Police-ten Biak In saknaah hian an thawh hlawk tlang hle niin a lang. Pu Sainghina Police Dahrawk-te nupain Rs. 1,000/- an pek hmangin Tile (ACC Plain Sheet) phek 72 zet lei a ni.

Biak In hmasa ber 48’x24’-a lian chu a ruhrel thingzai, a bang Tile, a chung Rangva niin 17.12.1961-ah luah luh a ni a, Rev. Harry E. Scism-an March ni 3, 1962-ah a hawng ta a ni.

BIAK IN SAK VAWI 2-NA : Biak In hmasa zak hawn a nih atanga kum 24 naah, Biak In thar sa tura hmalakna leh hnatlang hmasa ber chu Ni 10.10.1986-ah neih a ni a, Bialtu Pastor Rev. PC. Lunghnema’n tawngtainain hnatlang bul tanna hi a hlan a, Ni 17.10.1987-ah Bialtu Pastor Rev. PC. Doliana’n lungphum phumin Ban khur laih nghal a ni. Kut thlak hmasa bertu chu Rev. Lalthima a ni. Biak In pahnihna sak chhung hian Kohhranin harsatna namen lo a tawk a, mahse Pathian awmpuina leh kaihhruaina avangin 60’x30’ a lian, RCC Structure-in sak zawh a ni a, ban khur laih tan atanga kum 12-naah chuan hawn theiha peih fel a lo ni ta. Ruahmanna hrang hrang te siam a nih hnuah, November ni 14, 2004 khan North East India Unit-a General Superintendent nilai, Rev. K. Satinvela’n a hawng a, tisa leh thlarau-ah ruai ropui tak thehin hlim takin hun hman a ni.

BIAK IN SAK VAWI 3-NA:- Kum 2013 atangin Biak In sa tha tura ruahmanna siam leh a ni a, a len zawng hi 80’x40’ niin, RCC Structure-in a chhawnga sak tura tih a ni a, a chung Biak In, a hnuai Hall ni tura ruahman a ni. Biak In sak hnatlang hmasa ber chu April ni 26, 2014-ah neih a ni a, Group hrang hrang 12-ten hemi ni hian ban khur laih hna an thawk a ni. Biak In saknaah hian Kohhranhote kan inpumkhat thain kan lungrual em em a, mimal leh chhungkua ten sum leh tha kan thawh nasain, Department hrang hrangte pawh tumah tlanchhe bik awm lovin kan tang ho a, a lawmawm takzet a ni. Tichuan, Kohhranhote thawhrimna leh thahnemngaihna Lalpa’n a hria a, Biak In sak tan atanga kum 3 leh thla 8-ah luah luh theiha peih a lo ni ta a, Ni 20.12.2017 (Nilaini)-ah Biak In thar luahna hun hman niin, nilengin Kohhranhoten Thingpui hmeh tui tak nen Pathian faka zai ho a ni.

DEPARTMENT HRANG HRANG DINHMUN:- 1. SUNDAY SCHOOL DEPARTMENT : Sunday School Department hi Kohhran din ruala ding ve nghal nia ngaih a ni a, hun hmasa lamah chuan Sunday School hi Pathianni zingah neih thin a ni. Church Board-in a rel angin kum 2019 atang chuan Manual dung zuiin Puitling Sunday School leh Naupang Sunday School siam hran a ni ta a ni.

2. MISSIONS DEPARTMENT : Missions Department hi a din tan hriat chian a ni lo va, Ramthim rawngbawlna kawngah Kohhranpui nen innghengin hma lak thin a ni. Sumtuak nan fehchhuah, hnatlang leh 2nd Sunday thawhlawmte hman a ni thin a, Ni 14.06.1992 atang chuan chhung tinte thawh tur tukin, Envelope hmangin lak khawm thin a ni ta a ni.

3. PENTECOSTAL YOUTH DEPARTMENT : Pentecostal Conquerer tiin, 06.02.1966-ah din a ni a, President hmasa ber chu Evan. Lalthanzauva a ni. Pu Lalthanzauva hi Lunglei District PYD (Conquerer) hmasa ber a ni bawk. PYD-te hian Ni 06.02.2016-ah Kum 50-na an lawm a, Kohhran huapin hlim takin Golden Jubilee hi hman a ni.

4. LADIES AUXILIARY DEPARTMENT : Ni 04.08.1964 zana Kohhran rawngbawltu Committee, Pu Dengsailova ina neih chuan Pi Lalsikhupi leh Zakamlovi’n Hmeichhe Committee din theihna an dil chu an phalsak a, hemi dung zui hian Hmeichhe pawl hi din niin a lang a, chu chu District huapa Hmeichhe pawl din tura bul tanna a ni a tih theih ang. ( Pi Lalsikhupi te hmalakna kal zelah Kohhranpui District Board chuan District huapa Hmeichhe Pawl din chu a phalsak a ni). Hmeichhe Pawl hian Buhfaitham khawn leh tanpui a ngaihnaa Kohhran tanpui zelin Ni 28.02.1966 (Thawhtanni zan) atangin an mahni pualin an inkhawm hrang ta a ni.

5. PENTECOSTAL MEN DEPARTMENT : Pentecostal Men Department hi Ni 25.02.1993-ah din a ni a, a din tirha hruaitute chu President - K. Lalhmachhuana, Secretary - ZD. Vanlalrema, Treasurer - F. Lalzawngliana, Sr. Adviser - Upa L.H. Sanghluna te an ni. PMD hian Kohhran mamawh ngaihtuah leh phuhruknaah nasa takin hna an thawk thin. Lunglei District-ah chuan Rahsiveng hi PMD din hmasak berna pawl niin, kum 2018 khan Silver Jubilee lawm a ni a, Kohhran huapin ruai nen hlim takin lawm a ni.

6. PENTECOSTAL CHILDREN DEPARTMENT: Pentecostal Children Department hi Ni 08.01.1980-ah din a ni a, Leader (President) hmasa ber chu Upa F. Lalenga a ni. PCD hi naupangte Pathian thu zirtirna leh an Talent haichhuah hna thawktu an ni a,Kohhran kalzel tur buatsaihna hmun a nih avangin a pawimawh hle a ni.

7. JUNIOR PENTECOSTAL YOUTH DEPARTMENT: Jr. PYD hi Ni 12.12.2017-ah din a ni a, a din tirha hruaitute chu President - Rbt. C. Lalroliana, Secretary - Rbt. C. Vanlalena, Treasurer - LHV. Lalhmingchhuani, Vice President - Eddie Zonunkima, Asst. Secretary - David Lalmawizuala, Fin.Secretary -Saihmingthanga Sailo, Adviser – Evan.V.Lalduhawma-te an ni.

Tun dinhmun: Rahsiveng Local-ah hian member 760 (2025 report) an awm mek a. Upa - 10, Rawngbawltu - 8, B/W - 2, Ordination Licence - 2, Gen. Licence - 3, Local Licence -1 an awm mek.

Department member : PYD 263, LAD 162, PCD 149, PMD 75 an awm mek a ni.

Kum 2025-2026 Local hruaitute : Chairman : Upa C. Vanlalduha
Vice Chairman : Evan. V. Lalduhawma
Secretary : Evan. K. Lalmuankima
Asst. Secretary : Upa C. Lalbiakenga
Treasurer : Evan. Laldinpuia Sailo
Upa R. Lalhmunsiama
Statistician : Rbt. C. Vanlalena