HAURUANG LOCAL CHANCHIN

Hauruang-ah hian Kohhran din a nih hmain, Bro. Denghulha chuan 1966 khan Isua hmingin Baptisma a lo chang tawh a, ani hi Baptisma chang hmasa ber a ni. Mi dang awm ve lo ta chu Baptist Kohhranah a lawi ve ngawt a. Hetih lai hian Pi Nubiali (Pu Hrangmawia Rahsiveng Nu) chu a fanu Thanzauvi, Pu Denghulha nupui chu tlawhin Hauruang-ah hian a kal thin a, thahnemngai takin Baptist Biak Inah a theih tawkin rawngbawlna a nei thin. Pulpit em chang lo mahse; a theih ang tawk tawkin Pathian thu a tlangaupui thin a, mahse an Kohhran Upa Pu Biakkunga chuan thu a sawi zel a phal ta lo va, chuvang chuan thusawina hun a nei thei ta lo a ni.

Ram a lo buai a, sáwi kháwm a lo nih khan Hauruang hi Grouping Centre a ni a; tichuan Vanhne, Thuampui, Runtung leh Pachang lam atang a lo pemte nen Ni 16.12.1969 khan Hauruang Kohhran chu din a lo ni ta a ni. Hetih lai hian Kohhran member pawh 300 lai an tling a ni. He Kohhran din nana a puipa leh sulsutute chu heng mite hi an ni :

Chairman : Upa Liankunga
Secretary : Evan C Hrangkhuma
Treasurer : Bro Thansanga
Evan Hmingthanga
Upa Lianhranga

Kohhran din tirh hian Biak In neih nghal a ni lo va, Upa Liankunga inah inkhawm phawt a ni a; a din kum 1969 hian Biak In din tura hmalak nghal a ni a, member-te an phurin hruaitute an mawng a zang tlang bawk a, rei lote-ah Biak in pawh sak zawh nghal a ni. Biak In hi Dap rap te-a sak a nih avangin, tuna luah lai hi vawi nga sakna a ni tawh a ni. Tunah hian Biak In lian leh tha zawk sak tum a hmalak mek a ni.

Tun dinhmun: Hauruang Local hi member 278 (kum 2025) an ni mek a. Licence Holder - 1, Upa - 5, Sr. Upa - 1, Rawngbawltu - 5 an awm mek. LAD member - 64, PYD member -105, PCD member - 71, PMD member - 25 an awm mek.

Kum 2025-2026 Local kohhranpui hruaitute : Chairman : Upa PC. Biaksanga
Vice Chairman : Evan. C. Rochhiara
Secretary : Upa Lalchhuanawma
Asst Secretary : Rbt. C. Lalrinchhana
Treasurer : Upa Chuaudingliana
Statistician : Rbt. Lalramhmuaka