Rangte khua :

Rangte khua hi kum 1952 khum khan luah tan a ni a, hetih hun lai hian Lungsen Lal, Lalsavuta awpna hnuaiah awmin, kum 1954 khan Mizoram sawrkarin Lal a ban/tih tawp hnu khan VC neih niin, tun thlengin VC kaihhruaina hnuaiah khawtlang hi a la kal chho mek a ni.

Kohhran a lo pian dan :

Kum 1962 February thla a lo nih chuan, Lo nei mi tih takah Lo vatin chhung tin an buai hlawm hle. Khaw chhunga mikhual lo lut chu tute nge an nih pawh ngaihsak hman an awm lo va, Pu Luaia (Baptist Kohhran Secretary) Inah lutin, ani chuan tha taka lo dawngsawngin, mikhualte chuan mi hlim vak vel an nih thu an sawi mai a, hetih hun laia Kohhran awm chhun chu Baptist Kohhran chauh hi a ni. Inkhawm hun a lo nih chuan, chung mi hlimho chuan inkhawmnaah thu tlem an sawi a, rei lo te an cham hnu chuan chung mi hlimho chu an hawng leh mai a. Kum 1962 August thla a lo nih chuan mi hlimho chu an lo lang leh ta a,chung mi hlimte chu, Pastor Chuauruma, Evan. Laltluanga, Liankhuma, Lalnunthara leh Tlanglawma te an ni. Chumi tuma an lo lang leh chu tan an la nasa hle mai a, an kawm theih ang ang kawmin, In nghak Nuho len chilhin an ngamtlak deuh Inah phei chuan, an birh tlut tlut a ni ber mai. Inkhawm hun a lo nih chuan, thusawi turin ruai lo mahse; remchang lain thu tlem an sawi ve a, chuta tang phei chuan an tlangnel sawt viau mai. Pathianni a lo nih chuan, inpawl hona nei turin an sawm a, inpawl hona an neih tam hnuah phei chuan, an thu ngaithlatu pawh an tam sawt viau mai, a hnuah phei chuan Baptist Kohhran hotute beng hial a thleng ta a, Rotlang (Chhumkhum)a an tirhkoh rawih lai, tirhkoh Sanga chu an rawn tira, chumi hnuah Pastor Sialngena leh Pastor Hrangchhingpuia te chu an rawn tir leh a, anni nen pawh hian mi hlimho chu Pathian thua inhnialna te neiin an hnial hneh si lo va, an beidawn avangin hmunpui atangin an hotute hial an lo kal ta a, mahse kawngro a su lem lo.

Kohhran a lo piang ta :

Pastor Chuauruma te (Mi hlimho) rawngbawlna chuan khawtlang a chiah hneh hle mai a, mi eng emaw zatin UPC-ah pakai an duh ta a, Baptisma chang duh te an awm takah chuan, khua atanga hla lo te, Damte luiah a hmasa ber atan Baptisma khur hawn a ni a, chuta Baptisma chang hmasate chu : Hc. Rualkhupsanga, Neihkima (Neihmunga), LH. Lalkipsana, Sanninlova leh Rangkipthanga te an ni. Tin, a hnu lawkah Baptisma khur hawn leh niin, Pu Lalkipthanga hovin mi eng emaw zatin Baptisma an chang leh ta a ni. Ni 16.09.1962 (Pathianni)-ah chuan Pu Neihkima te Inah inkhawmna neiin, Rangte khuaah UPC Kohhran a lo piang ta a ni. Tin, Kohhran a lo pian tirh hian member 33 an ni a, Kohhran a lo pian takah chuan a hmasa ber atan Kohhran puipa turte pawh, Pastor Chuauruma hovin ruat an ni a,chung mite chu Lalkipthanga, Rangkipthanga, Hc. Rualkhupsanga, Neihkipthanga leh Neihkima (Neihmunga) te an ni.

Kohhran a lo pian takah chuan Biak in din a lo ngai ta a, Kum 1963 khan Biak in hmasa ber chu Maurap-a sak niin, kum 1967-ah Maurap bawka sak that a ni a, hemi kum hian Mizoram buai avangin Lungsenah hruai khawm (sawi khawm) a ni a, kum 1972-ah Lungsen hruai khawm atanga an let leh khan, Rangte khaw chhung luah nghal lovin, khaw bul hnaiah (Thlawh bawk tia hming vuahin) an khawsa a, hetah hian a vawi thumna atan an sa leh a ni. Tin, hemi hnu kum 1973-ah Rangte khaw chhung luah lut lehin, tuna Pu Pc. Lalbiakthanga In hmunah hian Biak in sak leh a ni a, kum 1975-ah tuna kan Biak in hmunah hian Thingril, a banah hmangin sak leh a ni a, kum 1981-ah Thingzai hmanga Biak in sak leh niin, kum 1994-ah Thingzai bawka sak that leh a ni. Kum 1996-ah Cylone (Thli chhia) a tleh khan Biak in a tih chhiat avangin, inkhawm/luah lailawk atan Maurapa sak leh a ni a, hemi hnu kum 1998-ah Thingzai bawka sak that leh niin, kum 2005 khan tuna kan Biak in luah lai hi RCC-a sak tura ruahmanna siam niin, tuna kan luah lai mek hi a dung 60ft. leh a vang 30ft.-a nghetin sak a ni ta a ni.

Rangte North Local hming put chhan :

Hun a lo kal ve zel a, member pawh an lo pung ve zel a, member 500 dawn an lo nih tak avang leh, member pun belh zel beiseina avangin Ni 29 January 2006-ah, Church Board Committee vawi 1-na, Rorel No.1-na chuan Rangte UPC Kohhran chu Local 2-a then ni se tiin a rel a, Bialtu Pastor hriattir a nih hnuin, Ni 19 March 2006-ah bialtu Pastor, Pastor K. Lalchamliana ruahmanna leh kaihhruianain Local pakhat ni thin chu, Local pahnihah then a ni. In dang thar zawk chu a hmingah ‘Rangte South Local’ tia vuah a ni ta a, Local pahnih a awm takah chuan ‘Rangte Local’ tih chu a remchang tawh lova hriat a nih avangin, Ni 18 June 2006-a Church Board Committee Rorel 1-na angin, ‘Rangte North Local’ tia vuah a lo ni ta a ni. Kum 2025 report siam lai hian member 363 an ni mek.

Kohhran hruaitu hmasate : 1962-1965

Kum 2025-2026 Local hruaitute chu :