KOHHRAN DIN A NIH DAN :

Ni 30.5.1993 (Pathianni) khan, bialtu Pastor leh Kohhran kal khawm rorelna chuan, Sesawm UPC Kohhran chu Kohhran pahnihah a then a rem ti a. Ni 31st May 1993 (Thawhtanni) chuan Kohhran hming phuah niin, inkhawm hran a ni a. Bialtu Pastor hriatpuinaa Kohhran hming neia kan inkhawm hran ni hmasa ber (May ni 31, 1993) chu, Kohhran din tan ni atan pawm a ni. Chu mi hma chuan Sesawm-ah hian UPC Kohhran pakhat awmin 'Sesawm UPC' tih a ni thin.

SESAWM VENGCHHAK KOHHRAN DIN HMA KOHHRAN NIH PHUNG:

Kum 1964 a lo her chhuak a, UPC thuhriltu Pu Tebawnga a lo kal a, Sesawm mi hlim tam takin a thu sawi an awih a. Ni 15 March 1964 Pathianni a lo her chhuah chuan, Sesawm khua-ah pawh UPC a lo ding ve ta. Sehung tuikhurah Baptisma khur hawngin, he hunah hian Baptisma chan a ni a. Sesawm atanga Isua hminga Baptisma chang hmasate: Pu Lianhrima, Pu Lalhliapa (He mite hi Pafa an ni) Pi Zairemthangi (Pasaltha Sawibunga tunu), Pu PC. Rothuama te an ni. Sesawm Pentecost Kohhran chu din chhoh a ni ta.

BIAK IN :

1. Kohhran din tirh hian Pu Lianhrima te inah an inkhawm thin a. Biak in hmasa ber hi Upa Dengbuaia'n inkhawmna tura a pek, a buh in (Chhekin) a pek chu a ni.
2. Biak in pahnihna hi Thingtuai ban, a chungah Di chihin, Thutphah pawh, mau pum ram khawm a ni a. Zoram a lo buai a, Kum 1966-ah ramhnuaiah tlan chhiat a ni. Khua hal niin, biak in chu zuah duh hle mahse, in hal kangin a kang kai ta ni.
3. Tlan chhiat (1966) hnuah 1968 khan khua chhuah leh a ni a. Biak in pawh kharpa tuai mai maia sak leh a ni a. A chung Laisua chih a ni. Kum 1969 khan khaw khawm a ni a, khua rauhsan a ni leh ta.
4. Sawi khawm kir leh hma chu Kawnpui 'W'-ah, Thenhlum Local te nen Biak in khatah lawi dun a ni. Kum 1972-ah chuan, mahni khaw lam an pan leh tan a, Sesawm chhuk hmasate chu Upa Rothuama inah an inkhawm a. 1973-ah Biak in palina chu tun din leh a ni.
5. Kum 1978-ah, Thingzai hmangin, Assam type-a sak a ni. A chung atan Mau dap, Saphuhawna chih a ni. A bang pawh Thumbawh kaihsawih a ni. He biak in hi thuam that reng niin, a chung te thlak a ni a, Local pahnih a pian hnu thlengin a ding a ni.

SESAWM VENGCHHAK KOHHRAN A LO PIANG TA:

Ni 30.5.1993 (Sunday) a ni a, Sesawm Local Church Board rorel chuan ban pharin Kohhran pahnih din hi phar tluk a ni. Bialtu Pastor, Pastor Lalchhara hriatpuia Sesawm Local, Local hniha then chu ruahmanna tha pawh awm chuang lovin a piang ve tawp a. Kohhran hming siam rem vat a ngai si a, Bialtu Pastor-in Local pahnih hming phuah mai tur a hriat mai loh avangin, bial PYD Secretary/ Treasurer Upa H. Thangkunga hnenah Kohhran hming phuah turin a ngen ta tawp mai a.

Upa H. Thangkunga chuan Sesawm UPC tih kha a theih tawh dawn si lo va, hman lai atang tawha veng then danin Sesawm UPC hming putu zawk awm lovin, 'Sesawm Vengchhak' tiin a han phuah a. United Pentecostal Church, Sesawm Vengchhak Local a awm ta. 'Vengchhak a awm chuan Vengthlang a ni leh mai ang chu' tiin Sesawm Vengthlang Local tih a ni ve leh ta a. Ni 31.5.1993 (Monday) atang chuan, a hrangin inkhawm hranna a ni ta a. Sesawm Vengthlang Local chuan Sesawm UPC biak in chu luahin, Sesawm Vengchhak Local erawh Bro PC. Zoliana, Kohhran din tirha Local Treasurer te inah inkhawm a ni thung. Sesawm Vengchhak Local a lo din hian members 95 kan ni.

BIAK IN HMASA ZAWK:

Sesawm Vengchhak Local hi duh vang renga awm a ni lo va. Kohhran rorel inbakaih thil avanga lo piang a ni a. A lo din tantirh chuan Kohhran hian neih a nei lo va. Hlim taka zai hona turin khuang kan nei lo. Plastic bur leh khawnvartui bur te vuain kan zai thin. Dar vuak tur kan nei lo va, belthleng te kan vaw mai thin. Biak in kan neih mai loh avangin hun rei tak chu Bro PC. Zoliana te inah kan inkhawm.

Kohhran ding thar ta chu Biakin kan mamawh tih kan hria a, target dang dang pawh hlamchhiah chuang lovin, kan theih ang angin kan tuak a. Tuna Biak in kan sakna hmunah hian Assam type-in a dung feet 30, a vang feet 15-in sak a ni a. Biak in bang tur tile leh rangva pawh Marpara lamah hnatlangin phurh thin a ni. Biak in sak peih a nih hnuin bialtu Pastor, Pastor T. Bualzika'n Pathian mite Pathian biak nana hman atan a hawng a. Biak in hmun hi hmun awih vek a nih avangin hnatlangin, kut ngata laih zawl a ni. Biak in hmasa zawk chu kum 21 dingin (1994-2015) 2015 khan thiah a ni ta ni.

BIAK IN PAHNIHNA:

Tuna kan Biak in hi a dung 57 ft leh a vang 24 ft niin, Concrete-in sak a ni a. Biak in sak that dawn, a hmun lei laih zau hnatlang neih hmasak berin, mi 142 (naupang nen) kan hnatlang a. Member 170 chuang lekah hnatlang kan tha hle. Biak in hlui chhung khunga sak hnanin 2015 khan luah tan a ni a. Tuna kan biak in tun din nan hian cheng nuai nga (500000) vel chauh hmanral a ni a. Hnatlang kut a tam zia a hriat theih mai awm e.

Ni 12 March 2016 khan bialtu Pastor, Pastor R. Lalramhluna chuan Pathian hnaih duh a, inhlan thar duhte hman atan a hawng a ni. Biak in hawn hi theih ang tawka ropuiin hman a ni a. Bunghmun bial chhung Local tin leh Thenhlum bial member zawng zawng sawmin, khawtlangin ruai ropui tak theh a lawm a ni.

KOHHRAN A DIN TIRHA HRUAITUTE:

1. KOHHRANPUI

• Chairman: Upa C. Pasena
• Secretary: Upa Lalhluama
• Treasurer: Bro. PC. Zoliana

2. MISSION DEPARTMENT

• Superintendent: Bro. Liansanga
• Secretary & Treasurer: Bro. J. Lalthangliana

3. SUNDAY SCHOOL DEPARTMENT

• Superintendent: Upa C. Pasena
• Secretary & Treasurer: Bro. C. Buhzatluanga

4. P.Y.D

• President: Bro. J. Lalthangliana
• Vice President: Bro. Lalhlima
• Secretary: Bro. Lalthanmawia
• Asst. Secretary: Bro. Lalnuntluanga
• Treasurer: Sis. Remsangpuii
• Fin. Secretary: Sis. Rothanglianai
• Adviser: Upa. H. Thangkunga

5. L.A.D

• President: Sis. Dangliani
• Vice President: Sis. Biakmawii
• Secretary: Sis. H. Hualchhingi
• Asst. Secretary: Sis. Lalhniangi Sailo
• Treasurer: Sis. Romani
• Fin. Secretary: Sis. Darhmingliani
• Senior Adviser: Bro. C. Liansanga
• Hminpui lut Treasurer: Sis. Lalduhawmi

6. P.C.D.

• Convener: Bro. C. Lalbiakngheta, Bro. H. Vanlalrawna, Sis. Zamawii, Sis. Lalhlupuii, Sis. Laldinpuii

KOHHRANA THIL THLENG CHHINCHHIAH TLAK

1. Sesawm Local atanga Local pahnih a pian hnuin, Sesawm Vengchhak Local hian ni 21-23 March 1995 khan bial Conference a dawl ve.
2. Kum 1995 khan Biak in hmasa zawk hawn a ni.
3. 12.3.2016 khan tuna biak in (Biak in pahnihna) hi hawn a ni.
4. Ni 31 May 2018 khan, Sesawm Vengchhak Local Silver Jubilee ropui taka lawm a ni.
5. Kum 2017 (mau tam kum) Krismas leh kum thar vuakvet-ah khan, Pathian chawimawina ruai vawi 7 theh a ni.

TUN DINHMUN :

Sesawm vangchhak Local-ah hian tun dinhmun (2025 Half yearly Statistic Report) ah Member 183 (Mipa 101, Hmeichhia 82) an awm mek a ni.

2025-2026 Kohhran hruaitute:

• Chairman: Upa Buangtheuha
• Secretary: Rbt. Lalhmingsanga
• Treasurer: Upa Lallawmkima
• Statistician: Evan. H. Vanlalhruaia